មន្រ្តីជាន់ខ្ពស់ម្នាក់របស់កូរ៉េខាងជើងដែលបានរត់ផ្តាច់ខ្លួនទៅប្រទេសកូរ៉េខាងត្បូងនាពេលថ្មីៗនេះបានចែករំលែកអ្វីដែលខ្លួនបានដឹង និងឆ្លុះបញ្ចាំងពីអ្វីដែលខ្លួនលោកពណ៌នាថាជា ស្ថានភាពកាន់តែដុនដាបទៅៗនៅក្នុងរបបផ្តាច់ការ និងសម្ងាត់របស់មេដឹកនាំកូរ៉េខាងជើង លោក Kim Jong Un។ លោកបាននិយាយថា៖ «ការដឹកនាំរបស់លោក Kim Jong Un ជិតផុតរលត់ហើយ»។
លោក Thae Yong-ho ដែលជាអតីតអគ្គរដ្ឋទូតរងរបស់កូរ៉េខាងជើងប្រចាំនៅក្រុងឡុងដ៍ ដែលបានរត់ផ្តាច់ខ្លួនទៅកូរ៉េខាងត្បូងកាលពីខែកក្កដាបាននិយាយថា៖ «ក្រុមអភិជនដែលបានគាំទ្រសង្គមកូរ៉េខាងជើងលែងជ្រោមជ្រែងលោក Kim Jong Un ទៀតហើយ។ ប្រព័ន្ធដឹកនាំបែបបុរាណរបស់កូរ៉េខាងជើងកំពុងតែបែកបាក់ហើយ»។
ឥឡូវនេះ លោកThae ជាអ្នកវិភាគនៅវិទ្យាស្ថានសម្រាប់យុទ្ធសាស្រ្តសន្តិសុខជាតិ ឬជាភាសាអង់គ្លេសថា Institute for National Security Strategy ដែលជាអង្គការស្រាវជ្រាវមួយមានទំនាក់ទំនងជាមួយនឹងទីភ្នាក់ងារស៊ើបអង្កេតជាតិ (National Intelligence Service) របស់កូរ៉េខាងត្បូង ។
ការបែកអារម្មណ៍ស្រមើរស្រមៃ
អំឡុងពេលនិយាយទៅកាន់អ្នកកាសែតអស់ជាច្រើនម៉ោងនៅក្រុងសេអ៊ូលកាលពីចុងខែមករា លោក Thae បានថា ការបែកអារម្មណ៍កាន់តែខ្លាំងរបស់លោកជាមួយនឹងមេដឹកនាំវ័យក្មេងរបស់កូរ៉េខាងជើង ដែលបានឡើងកាន់តំណែងកាលពីខែធ្នូ ឆ្នាំ២០១១ បានឈានដល់ចំណុចកំពូល ក្នុងរយៈពេល១២ខែចុងក្រោយនេះ នៅពេលដែលលោក Kim កំណត់យក «គោលដៅបែបជ្រុលនិយម» មួយ ដើម្បីសម្រេចឲ្យបាននូវសមត្ថភាពអាវុធនុយក្លេអ៊ែរចម្ងាយវែងជឿជាក់បាននៅត្រឹមឆ្នាំ២០១៧ ខណៈដែលសហរដ្ឋអាមេរិក និងកូរ៉េខាងត្បូងកំពុងប្រឈមនឹងអន្តរកាលនយោបាយ។
ទោះបីជាមានការដាក់ទណ្ឌកម្មពីសហគមន៍អន្តរជាតិកាន់តែច្រើនក៏ដោយ កាលពីឆ្នាំមុននេះកូរ៉េខាងជើងបានធ្វើការសាកល្បងអាវុធនុយក្លេអ៊ែរចំនួនពីរដង ដោយមានការបាញ់បង្ហោះកាំជ្រួចមីស៊ីលចំនួន២៤គ្រាប់ និងបានបង្ហាញថា ខ្លួនប្រហែលនឹងធ្វើការសាកល្បងកាំជ្រួចមីស៊ីលឆ្លងទ្វីបក្នុងពេលឆាប់ៗនេះ។
បន្ទាប់ពីលោក Thae សម្រេចចិត្តរត់ផ្តាច់ខ្លួនទៅប្រទេសកូរ៉េខាងត្បូង លោកត្រូវចំណាយពេល និងត្រូវពឹងលើសំណាងដើម្បីរត់គេចជាមួយគ្រួសារលោកនៅក្រុងឡុងដ៍។ លោក Thae និយាយថា សម្រាប់អ្នកការទូតនៅបរទេស កូរ៉េខាងជើងជាទូទៅតម្រូវឲ្យទុកសមាជិកគ្រួសារម្នាក់នៅក្នុងប្រទេសកូរ៉េខាងជើង ជាអ្នកឈរជើង ដែលជួនកាលត្រូវបានចាត់ទុកដូចជា «ចំណាប់ខ្មាំង» ដើម្បីរារាំងការរត់ផ្តាច់ខ្លួនរបស់អ្នកការទូតទាំងនោះ។
លោកនិយាយថា៖ «របបដឹកនាំរបស់លោក Kim Jong Un បានរំលោភបំពានលើសេចក្តីស្រឡាញ់រវាងឪពុកម្តាយ និងកូន ដើម្បីគ្រប់គ្រងអ្នកការទូតកូរ៉េខាងជើង»។
លោក Thae មិនបានប្រាប់ពីរបៀបដែលលោកបានរត់គេចខ្លួននោះទេ ប៉ុន្តែលោកអាចនាំយកកូនៗទាំងពីររបស់លោកមកក្រុងឡុងដ៍ជាមួយ។ នៅពេលលោកជួបជុំជាមួយគ្រួសារលោករួច លោកបានជិះយន្តហោះទៅរកសេរីភាពនៅកូរ៉េខាងត្បូង។
ទោះជាយ៉ាងណាក៏ដោយ លោកមានការស្តាយក្រោយ ដោយសារតែសាច់ញាតិដទៃទៀតដែលលោកទុកចោលនៅកូរ៉េខាងជើងអាចនឹងត្រូវបានគេដាក់ទោស និងបញ្ជូនទៅជំរុំអ្នកទោសដោយសារការផ្តាច់ខ្លួនរបស់លោក។
រូបឯកសារ៖ មេដឹកនាំកូរ៉េខាងជើងលោក Kim Jong Un (កណ្តាល)។
បដិវត្តន៍ទីផ្សារ «កណ្តូប»
លោក Thae និយាយថា សព្វថ្ងៃនេះ ការកើនឡើងនៃទីផ្សារ «កណ្តូប» ខុសច្បាប់ អំពើពុករលួយដ៏ច្រើន និងលំហូរព័ត៌មានពីខាងក្រៅកំពុងធ្វើឲ្យសាធារណជនមិនសប្បាយចិត្ត និងធ្វើឲ្យអន់ថយសមត្ថភាពគ្រប់គ្រងបែបបុរាណរបស់រដ្ឋាភិបាលកូរ៉េខាងជើងក្នុងរក្សាសណ្តាប់ធ្នាប់ ដោយការគំរាម និងការសំឡុត។
ការកើនឡើងនៃចំនួនអ្នកលក់ដូរតាមផ្លូវខុសច្បាប់ ប៉ុន្តែជារឿយៗត្រូវបានគេអត់ឱនឲ្យ ដែលអ្នកលក់ដូរទាំងនោះផ្លាស់ប្តូរទីតាំងយ៉ាងឆាប់រហ័សដូចសត្វកណ្តូបនោះ បានជួយដល់ដំណើរការសេដ្ឋកិច្ចក្នុងស្រុក បន្ទាប់ពីការដួលរលំប្រព័ន្ធនៃរដ្ឋកុម្មុយនីស្តកាលពីប៉ុន្មានទសវត្សរ៍មុន។
ប៉ុន្តែទីផ្សារឯកជនដែលកំពុងលេចឡើងនេះក៏ធ្វើឲ្យមនុស្សម្នាមានការខឹងសម្បារនឹងការរឹតត្បិតដែលចាត់ឡើងដោយរដ្ឋ ប៉ុន្តែពួកគេលែងសូវខ្លាចមន្រ្តីសន្តិសុខ និងប៉ូលិស ដែលមានទំនោរកាន់តែខ្លាំងទៅរកការទាមទារសំណូកជាជាងការអនុវត្តច្បាប់។
រូបឯកសារ៖ លោក Thae Yong-ho ដែលជាអតីតអគ្គរដ្ឋទូតរងរបស់កូរ៉េខាងជើងប្រចាំនៅក្រុងឡុងដ៍ ចេញមុខនៅក្នុងប៉ុស្តិ៍ទូរទស្សន៍របស់កូរ៉េខាងត្បូង។
លោក Thae និយាយថា៖ «កាលពីប៉ុន្មានឆ្នាំមុន ការប្រឆាំងបែបនេះគឺគ្មាននរណាម្នាក់អាចស្រមៃដល់នោះទេ ពីព្រោះថា ប្រព័ន្ធកូរ៉េខាងជើង គឺជាប្រព័ន្ធមួយដែលមនុស្សត្រូវគោរពតាមការណែនាំរបស់អាជ្ញាធរ»។
លំហូរព័ត៌មាន ដែលភាគច្រើនតាមរយៈភាពយន្តនិងរឿងភាគល្បីៗរបស់កូរ៉េខាងត្បូង ដែលបានធ្វើឲ្យពួកគេដឹងថា សេរីភាព និងភាពរីកចម្រើនដែលមាននៅពិភពខាងក្រៅ កំពុងតែចូលទៅក្នុងសង្គមបិទជិតរបស់កូរ៉េខាងជើងកាន់តែច្រើនឡើង។
លោកThae កំពុងតែផ្តល់ការគាំទ្រទៅដល់ការចែករំលែកព័ត៌មានពីពិភពខាងក្រៅទៅក្នុងប្រទេសកូរ៉េខាងជើង ដែលលោកបាននិយាយថា នេះនឹងដូចជាបាចសាំងទៅលើកំហឹងរបស់សាធារណជនឲ្យឆេះឆាបឆួល ហើយជាចុងក្រោយនឹងមានការបះបោរដែលនឹងផ្តួលរំលំរបបដឹកនាំរបស់គ្រួសារត្រកូល Kim។
ការគាបសង្កត់
អតីតអ្នកការទូតរបស់កូរ៉េខាងជើងរូបនេះបានប្រៀបធៀបការខឹងសម្បារដែលកំពុងតែកើនឡើងនៅក្នុងប្រទេសលោក ទៅនឹងស្ថានភាពនៅក្នុងសហភាពសូវៀត មុនពេលនៃការដួលរលំរបស់សហភាពនោះ និងសេចក្តីសង្ឃឹម ថានឹងមានលទ្ធផលសន្តិភាពមួយដែលបញ្ចប់ ជាមួយនឹងប្រទេសកូរ៉េតែមួយដែលមានលិទ្ធិប្រជាធិបតេយ្យ និងការរួបរួម។
ទោះជាយ៉ាងណា ក៏មានហានិភ័យមួយដែលថា រដ្ឋាភិបាលក្រុងព្យុងយ៉ាងនឹងឆ្លើយតបជាមួយនឹងបាតុកម្ម ដោយកម្លាំងបាយឃោរឃៅ និងការគាបសង្កត់ ដូចដែលចិនបានធ្វើ បន្ទាប់ពីមានបាតុកម្មនៅទីលាន Tiananmen កាលពីឆ្នាំ១៩៨៩។
លោក Thae បានព្រមានពីលទ្ធភាពដែល សហរដ្ឋអាមេរិក ឬកូរ៉េខាងត្បូងអាចនឹងធ្វើការវាយប្រហារតាមអាកាសទៅលើកូរ៉េខាងជើង។ លោកនិយាយថា សកម្មភាពយោធាបែបនេះទំនងនឹងបញ្ឆេះឲ្យមានសង្គ្រាម។
រូបឯកសារ៖ បុរសម្នាក់មើលកម្មវិធីទូរទស្សន៍មួយដែលបង្ហាញពីរូបថតចុះផ្សាយដោយសារព័ត៌មាន Rodong Sinmun របស់កូរ៉េខាងជើងស្តីពីការបង្ហោះកាំជ្រួចមីស៊ីល «Pukguksong2» និងមេដឹកនាំកូរ៉េខាងជើងលោក Kim Jong Un នៅស្ថានីយរថភ្លើងក្រុងសេអ៊ូល ប្រទេសកូរ៉េខាងត្បូង កាលពីថ្ងៃទី១៣ ខែកុម្ភៈ ឆ្នាំ២០១៧។
លោកក៏បានព្រមានពីការបំពេញតាមចិត្តលោក Kim Jong Un តាមរយៈការសម្របសម្រួលលើទណ្ឌកម្ម ឬការបញ្ចប់សមយុទ្ធយោធារបស់កូរ៉េខាងត្បុង និងសហរដ្ឋអាមេរិក ដើម្បីផ្អាកសកម្មភាពបង្កើតនុយក្លេអ៊ែរមួយរយៈពេល។ លោកនិយាយថា វាគ្រាន់តែជា «អន្ទាក់» មួយ ដែលនៅទីបំផុតនឹងធ្វើឲ្យកូរ៉េខាងជើងក្លាយជាប្រទេសនុយក្លេអ៊ែរស្របច្បាប់ ដូចដែលបានកើតឡើងរួចទៅហើយជាមួយនឹងប្រទេសឥណ្ឌា និងប៉ាគីស្ថាន។
លោកនិយាយថា លទ្ធភាពនៃការធ្វើរដ្ឋប្រហារយោធានៅកូរ៉េខាងជើងមានតិចតួច ដោយសារតែមេដឹកនាំទាំងនោះនៅមានភាពស្មោះត្រង់ជាមួយនឹងលោក Kim នៅឡើយ។ ទោះជាយ៉ាងណា លោកបានកត់សម្គាល់ថា មនុស្សជាច្រើននៅក្នុងជួរកងទ័ពក៏មានអារម្មណ៍តានតឹងជាមួយនឹងប្រព័ន្ធនៃការដឹកនាំសព្វថ្ងៃផងដែរ។
លោក Thae បាននិយាយថា មេដឹកនាំក្នុងក្រុងព្យុងយ៉ាងមិនខ្លាចការវាយបករបស់ចិនទៅលើកម្មវិធីនុយក្លេអ៊ែររបស់ខ្លួននោះទេ ដោយសារពួកគេគិតថា រដ្ឋាភិបាលក្រុងប៉េកាំងសុទ្ធចិត្តទទួលយកអាវុធនុយក្លេអ៊ែរពីកូរ៉េខាងជើង នៅតាមព្រំដែនរបស់ខ្លួន ជាជាងប្រជែងជាមួយនឹងប្រទេសកូរ៉េប្រជាធិបតេយ្យនិងរួបរួមគ្នាមួយដែលចងសម្ព័ន្ធជាមួយនឹងសហរដ្ឋអាមេរិក៕
ប្រែសម្រួលដោយ ប៊ុន ប៉េងហ៊ុយ