ប្រព័ន្ធផ្សព្វផ្សាយរដ្ឋរបស់រុស្ស៊ីបានថ្លែងថាប្រេងគុណភាពអន់ប្រមាណ៣.៧០០តោនបានកំពប់ចូលក្នុងច្រកសមុទ្រKerch បន្ទាប់ពីកប៉ាល់២គ្រឿងរបស់រុស្ស៊ីបានរងការខូចខាតយ៉ាងធ្ងន់ធ្ងរបង្កឡើងដោយអាកាសធាតុខ្យល់ព្យុះ។
កប៉ាល់២គ្រឿងនេះដែលមានឈ្មោះថាVolgoneft 239 និង Volgoneft 212 ដឹងប្រេងប្រមាណ៩.២០០ តោនដែលជាប្រភេទប្រេងម៉ាស៊ុតធន់ធ្ងន់និងគុណភាពអន់។ វីដេអូបង្ហោះលើបណ្តាញសង្គមបង្ហាញឱ្យឃើញថា ប្រេងពណ៌ខ្មៅនោះបានអណ្តែតឡើងតាមរលក។
ក្រសួងស្ថានការណ៍គ្រាអាសន្នរុស្ស៊ីបានថ្លែងថាប្រតិបត្តិការសង្គ្រោះបន្ទាន់បានធ្វើឡើងកាលពីថ្ងៃអាទិត្យ បន្ទាប់ពីកប៉ាល់២គ្រឿងនេះបានបញ្ជូនសញ្ញាគ្រោះថ្នាក់ហើយក្បាលកប៉ាល់មួយបានរងការខូចខាត។ នាវិកម្នាក់បានស្លាប់ដោយសារតែការខូចខាតនេះ៕