អ្នកវិភាគនិយាយថា វីដេអូដែលត្រូវបានគេចែកចាយយ៉ាងច្រើននៅលើបណ្តាញសង្គមរបស់ចិន ហាក់ដូចជាមានបំណងបង្ហាញពីភាពស្មោះត្រង់ចំពោះលោកប្រធានាធិបតី Xi បន្ទាប់ពីមានរបាយការណ៍អំពីការបោសសម្អាតសមាជិកក្នុងគណបក្សខ្លួននាពេលខាងមុខ ដែលសមាជិកបក្សទាំងនេះត្រូវបានគេមើលឃើញជាយូរមកហើយថា ជាមូលដ្ឋានអំណាចសម្រាប់ក្រុមប្រឆាំងនៅក្នុងគណបក្សកុម្មុយនិស្ត។
នៅក្នុងគណបក្សកុម្មុយនិស្តចិន លោកប្រធានាធិបតី Xi ត្រូវបានគេគិតថា លោកបានចាត់ទុកក្រុមយុវជនជាក្រុមប្រឆាំងដ៏ធំនៅក្នុងគណបក្ស។ ការយល់ឃើញរបស់លោក Xi ក៏ត្រូវបានគាំទ្រដោយលោកប្រធានាធិបតីមុនគឺលោក Hu Jintao និងលោក Li Keqiang នាយករដ្ឋមន្រ្តីនាពេលបច្ចុប្បន្នផងដែរ។
យោងតាមលោក Willy Lam អ្នកជំនាញផ្នែកនយោបាយនៃអ្នកមានអំណាចចិន ដែលមានមូលដ្ឋាននៅក្រុងហុងកុង បានឲ្យដឹងថា តាមរយៈការធ្វើឲ្យក្រុមប្រឆាំងចុះខ្សោយនោះ លោកប្រធានាធិបតី Xi ចង់ផ្ញើសារថា សម្ព័ន្ធយុវជនមិនមែនជាកម្លាំងស្ថិតស្ថេរក្នុងការរារាំងលោកមិនឲ្យក្តោបក្តាប់អំណាចផ្ទៃក្នុងបក្សទៀតឡើយ។
ការក្តាប់យកអំណាចរបស់លោក Xi
ចាប់តាំងពីឆ្នាំមុនមក សម្ព័ន្ធយុវជនរបស់គណបក្សនេះត្រូវបានលោក Xi រិះគន់យ៉ាងខ្លាំង។ នៅដើមឆ្នាំនេះ គណៈកម្មាធិការកណ្តាលសម្រាប់តាមដានផ្នែកវិន័យរបស់បក្ស បានព្រមានដល់សម្ព័ន្ធនេះជាសាធារណៈ ចំពោះកំហុសឆ្គងធំៗចំនួនបួនដែលរួមមាន «បញ្ហាការិយាល័យធិបតេយ្យ បញ្ហារដ្ឋបាល បញ្ហាអភិជន និងការកម្សាន្តហួសហេតុ» ដែលការព្រមាននេះបានបើកផ្លូវដល់លោក Xi ក្នុងការអនុវត្តផែនការកែទម្រង់ ដែលរួមមានទាំងការកាត់បន្ថយថវិកាជិត៥០ភាគរយផងដែរ។
លោក Lam បាននិយាយថា៖ «លោក Xi Jinping និយាយថា សម្ព័ន្ធនេះមិនអាចតំណាងឲ្យមហាជនបានទៀតទេ។ សម្ព័ន្ធមិនបានបម្រើដល់ពលរដ្ឋចិនវ័យក្មេង ឬសមាជិកវ័យក្មេងរបស់បក្សនោះទេ។ សម្ព័ន្ធនេះបានចំណាយប្រាក់យ៉ាងច្រើនលើសលប់ទៅលើពិធីជប់លៀង និងដំណើរកម្សាន្តនៅជុំវិញប្រទេសនិងកិច្ចការមួយចំនួនទៀត។ អ្នកអាចនិយាយបានថា ការបោសសម្អាតសម្ព័ន្ធយុវជននេះមិនមែនជារឿងគួរឲ្យភ្ញាក់ផ្អើលនោះទេ»។
រូបភាពនេះត្រូវបានយកចេញពីវីដេអូឃោសនារបស់ចិនដែលមានចំណងជើងថា «នេះជាប្រទេសចិន»។
ការឃោសនាប្រឆាំងនឹងអាមេរិក
អ្នកតាមដានស្ថានការណ៍យល់ថា ដោយសារមាននិន្នាការប្រឆាំងនឹងអាមេរិក សម្ព័ន្ធនេះបានបញ្ចេញវីដេអូរយៈពេលពីរនាទីនៅលើគណនី Weibo របស់ខ្លួន ដើម្បីបង្ហាញពីភាពស្មោះត្រង់។
វីដេអូទាំងនេះបានព្រមានអ្នកទស្សនាចំពោះអ្វីដែលខ្លួនបាននិយាយថា ជាការគំរាមកំហែងគាំទ្រដោយអាមេរិក ដើម្បីបញ្ឆេះឲ្យមាន «បដិវត្តន៍ពណ៌» នៅក្នុងប្រទេសចិន ដែលស្រដៀងទៅនឹងបដិវត្តន៍នៅអ៊ុយក្រែន ហ្សកហ្ស៊ី (Georgia) និងនៅអារ៉ាប់។
វីដេអូមួយ ក្នុងចំណោមវីដេអូទាំងនោះ ត្រូវបានគេបង្ហោះសារជាថ្មីនៅលើគណនី Weibo របស់ភ្នាក់ងារស៊ើបអង្កេត Supreme People's Procuratorate ដោយសារវីដេអូនោះ និយាយចំៗទៅលើក្រុមតស៊ូមតិផ្នែកសិទ្ធិមនុស្ស និងនិយាយអំពីអ្នកដែលកំពុងត្រូវជំនុំជម្រះ ដែលអាជ្ញាធរយល់ថា បានឃុបឃឹតជាមួយនឹងភ្នាក់ងារបរទេសដើម្បីបំផ្លាញប្រទេសចិន ជាជាងការផ្សព្វផ្សាយពីនីតិរដ្ឋ។
ក្រុមអ្នកតាមដានស្ថានការណ៍និយាយថា សារនេះបានធ្វើឲ្យសម្ព័ន្ធនេះមានភាពល្បីល្បាយ និងមានការនិយាយយ៉ាងច្រើននៅលើប្រព័ន្ធបណ្តាញសង្គម ខណៈដែលសារនេះក៏បង្ហាញដែរថា គណបក្សកុម្មុយនិស្តយល់ថា វាជាបញ្ហានយោបាយ និង បញ្ហាច្បាប់។
វីដេអូទាំងពីរបានយកយុវជនជាគោលដៅ ដោយសារគេបានយកតន្រ្តីដ៏ល្បីមកដាក់ក្នុងវីដេអូនោះ រួមមានទាំងការច្រៀងបែបរ៉េប (rap) ហើយបានធ្វើឲ្យមនុស្សរាប់លាននាក់ទស្សនាក្នុងរយៈពេល២៤ម៉ោងបន្ទាប់ពីបានចេញផ្សាយរួចមក។
ការបោសសម្អាតក្នុងសម្ព័ន្ធយុវជន
ក្រុមអ្នកវិភាគរំពឹងថា ការបោសសម្អាតលើក្រុមយុវជននាពេលខាងមុខនេះ នឹងបង្កើនការខ្វែងគំនិតគ្នារវាងលោក Xi និងលោក Li កាន់តែខ្លាំង ខណៈពេលដែលមេដឹកនាំកំពូលរបស់ប្រទេសទាំង២រូបនេះបានយកចិត្តទុកដាក់លើអាទិភាពគោលនយោបាយ រួមមានវិសមភាពប្រាក់ចំណូល និងកំណែទម្រង់សេដ្ឋកិច្ចនោះ។
ប៉ុន្តែ តើបញ្ហានេះ នឹងធ្វើឲ្យលោក Li ចុះចេញពីតំណែងឬយ៉ាងណា?
លោក Jon Taylor សាស្រ្តាចារ្យវិទ្យាសាស្រ្តនយោបាយនៅសាកលវិទ្យាល័យ St. Thomas នៅក្នុងក្រុង Houston រដ្ឋ Texas បានសរសេរនៅក្នុងអ៊ីម៉ែលឆ្លើយតបមកកាន់ VOA ថា៖ «ប្រហែលអញ្ចឹងហើយ។ មានពាក្យចចាមអារ៉ាមជាយូរមកហើយថា លោក Wang Qishan ប្រធានគណៈកម្មាធិការកណ្តាលតាមដានផ្នែកវិន័យ នឹងឡើងជំនួសតំណែងនាយករដ្ឋមន្រ្តីរបស់លោក Li»។
លោកសាស្រ្តាចារ្យបានបន្ថែមថា ប្រសិនបើការបង្រ្កាបនេះទទួលបានជោគជ័យ ក្រុមផ្សេងៗទៀត ដូចជាក្រុមរបស់លោក Jiang Zemin នៅសៀងហៃ ឬក្រុមសម្ព័ន្ធយុវជនរបស់លោក Hu អាចនឹងចាញ់ក្រុមនៅខេត្ត Zhejiang ដែលមានក្រុម Gang of Princelings ជំនាន់ទី២ ក្រុម Shaanxi និងក្រុមដែលស្ម័គ្រស្មោះនឹងលោក Xi។
លោក Taylor បានសរសេរនៅក្នុងអ៊ីម៉ែលថា៖ «នៅពេលដែលក្រុមសម្ព័ន្ធយុវជនកុម្មុយនិស្តនៅតែជាក្រុមដ៏ធំមួយក្នុងចំណោមក្រុមផ្សេងៗនៅក្នុងគណបក្ស លោក Xi នឹងបន្តធ្វើការរួបរួម និងពង្រឹងអំណាចរបស់លោក»។
ក្រុម Gang of Princelings គឺជាក្រុមមនុស្សជំនាន់ក្រោយរបស់ក្រុមមន្រ្តីកុម្មុយនិស្តល្បីៗ និងមានឥទ្ធិពលនៅក្នុងប្រទេសចិន រួមមានលោក Xi និងលោក Bo Xilai ដែលត្រូវបានគេបណ្តេញចេញពីតំណែង ខណៈដែលក្រុម Shaanxi សំដៅដល់សមាជិកគណៈកម្មាធិការកណ្តាលអចិន្ត្រៃយ៍ចំនួន៧រូបរបស់បក្ស ដែលមានកំណើតនៅខេត្ត Shaanxi រួមទាំងលោក Xi ផងដែរ។
នៅចំពេលមានការប្រជែងអំណាចនេះ គណបក្សកុម្មុយនិស្តចិនបានចេញផ្សាយនូវឯកសារដែលមានចំណងជើងថា «សំណើស្តីពីកំណែទម្រង់គណៈកម្មាធិការកណ្តាលរបស់សម្ព័ន្ធយុវជន» ដោយមានការផ្លាស់ប្តូរខ្លះ ក្នុងគោលបំណងអនុវត្តការងារកែប្រែរចនាសម្ព័ន្ធស្នើឡើយដោយលោក Xi ទៅលើអង្គការចាត់តាំងរបស់គណៈកម្មាធិការនេះ។
បើយោងតាមទីភ្នាក់ងារសារព័ត៌មាន Xinhua សម្ព័ន្ធនេះនឹងធ្វើការកែប្រែប្រព័ន្ធដឹកនាំរបស់ខ្លួន ធ្វើឲ្យប្រព័ន្ធបុគ្គលិករបស់ខ្លួនមានប្រសិទ្ធភាព និងធ្វើកំណែទម្រង់លើគណៈកម្មការដែលធ្វើការសម្រេចចិត្តនៅក្នុងកម្រិតផ្សេងៗជាច្រើន។ ជាការឆ្លើយតប សម្ព័ន្ធនេះបានសន្យាថានឹងធ្វើឲ្យល្អប្រសើរនូវការងារនៅថ្នាក់មូលដ្ឋានរបស់ខ្លួន ដែលមានបំណងបញ្ជូលមនោគមវិជ្ជាដល់ពលរដ្ឋចិនក្មេងៗ។
សម្ព័ន្ធដែលត្រូវបានបង្កើតឡើងនៅក្នុងក្រុង Shanghai កាលពីឆ្នាំ១៩២០ ធ្លាប់ជាកន្លែងចាប់ផ្តើមនៃមនុស្សល្បីរបស់បក្សរួមមានទាំងលោក Hu និងលោក Li ក្នុងចំណោមមនុស្សជំនាន់មុនរបស់ពួកគេជាច្រើនទៀត។
មិនមែនជាកន្លែងបណ្តុះបណ្តាលទេពកោសល្យ
ប៉ុន្តែ ឥឡូវនេះ នៅក្រោមការដឹកនាំរបស់លោក Xi ការទទួលខុសត្រូវក្នុងការបណ្តុះបណ្តាលមនុស្សមានទេពកោសល្យនឹងត្រូវបញ្ចប់។
លោក Lam បាននិយាយថា៖ «អ្វីដែលលោក Xi Jinping បាននិយាយនោះគឺថា សម្ព័ន្ធយុវជនកុម្មុយនិស្តមិនគួរដើរតួជាកន្លែងសម្រាប់បណ្តុះបណ្តាលមេដឹកនាំនាពេលអនាគតទៀតទេ ប៉ុន្តែសម្ព័ន្ធនេះគួរតែផ្តោតលើការងារមនោគមវិជ្ជាក្នុងចំណោមសមាជិកបក្សក្មេងៗ និងសមាជិកបក្ស ដើម្បីធានាថា ពួកគេនឹងអាចទទួលបានជោគជ័យផ្នែកមនោគមវិជ្ជា ដូចជាការស្មោះស្ម័គ្រនឹងរបបសង្គមនិយមជាដើម»។
ប៉ុន្តែ កំណែទម្រង់ដែលមានបំណងពង្រីកឥទ្ធិពលនយោបាយរបស់សម្ព័ន្ធនេះក្នុងចំណោមពលរដ្ឋចិនក្មេងៗដើម្បីទទួលបានភាពស្មោះស្ម័គ្ររបស់ពលរដ្ឋទាំងនោះចំពោះគណបក្សកុម្មុយនិស្តនោះ អាចជាគំនិតអភិរក្សជ្រុលដែលមិនទទួលបានការគាំទ្រពីយុវជនច្រើននោះទេ។
លោក Chen Wei សាស្រ្តាចារ្យវិទ្យាសាស្រ្តនយោបាយនៅសាកលវិទ្យាល័យ Renmin និយាយថា៖ «បើយើងមើលទៅលើការណែនាំរបស់ពួកគេ កំណែទម្រង់យុវជននឹងមិនមែនជាគំនិតថ្មី និងសេរីនិយមនោះទេ។ ផ្ទុយទៅវិញ វាត្រូវបានគេធ្វើឡើងដើម្បីផ្សព្វផ្សាយពីការគោរពតាមមនោគមវិជ្ជារបស់ខ្លួន»។
លោកបានបន្ថែមថា កំណែទម្រង់នោះនឹងមានការពិបាកក្នុងការទាក់ទាញមនុស្សដែលមានគំនិតសេរីនិយម និងមាននិន្នាការក្នុងការជ្រើសរើសអ្វីមួយដោយខ្លួនឯង៕
ប្រែសម្រួលដោយ ប៊ុន ប៉េងហ៊ុយ