ទិន្នន័យមួយចំនួនបានបង្ហាញថា ប្រទេសចិនបានចាប់ផ្ដើមដំណាក់កាលដំបូងនៃការពិសោធន៍វ៉ាក់សាំងការពារមេរោគកូរ៉ូណាថ្មី ស្របពេលដែលអ្នកវិទ្យាសាស្ត្រនានានៅលើពិភពលោកស្វែងរកវិធីដើម្បីទប់ទល់នឹងមេរោគនេះ។
ការចាប់ផ្ដើមពិសោធន៍វ៉ាក់សាំងរបស់ចិននេះបានធ្វើឡើង បន្ទាប់ពីមន្ត្រីសុខាភិបាលសហរដ្ឋអាមេរិកបាននិយាយកាលពីសប្ដាហ៍មុនថា ពួកគេបានចាប់ផ្ដើមការពិសោធន៍ដើម្បីវាយតម្លៃលើវ៉ាក់សាំងដែលអាចទៅរួចមួយនៅក្នុងទីក្រុង Seattle រដ្ឋ Washington។
កិច្ចប្រឹងប្រែងរបស់ចិននេះបានចាប់ផ្ដើមកាលពីថ្ងៃទី ១៦ ខែមីនាកន្លងទៅនេះ គឺក្នុងថ្ងៃតែមួយដែលសហរដ្ឋអាមេរិកបានប្រកាសអំពីការពិសោធន៍វ៉ាក់សាំងនៅទីក្រុង Seattle។ ការពិសោធន៍វ៉ាក់សាំងរបស់ចិនត្រូវគេរំពឹងថានឹងបន្តរហូតដល់ចុងឆ្នាំនេះ។ នេះបើយោងតាមទិន្នន័យចុះថ្ងៃទី ១៧ ខែមីនា របស់ការិយាល័យចុះបញ្ជីពិសោធន៍ថ្នាំពេទ្យរបស់ប្រទេសចិន។
មន្ត្រីមួយរូបនៃគម្រោងដែលឧបត្ថម្ភដោយរដ្ឋាភិបាលចិននេះ បានប្រាប់កាសែត AFP នៅថ្ងៃអាទិត្យនេះថា៖ «ក្រុមអ្នកស្ម័គ្រចិត្តក្នុងគម្រោងពិសោធន៍វ៉ាក់សាំងការពារជំងឺ COVID-19 ដំណាក់កាលទីមួយនេះ បានចាប់ផ្ដើមទទួលការចាក់វ៉ាក់សាំងនេះរួចហើយ»។
អ្នកស្ម័គ្រចិត្តចូលរួមចំនួន ១០៨ នាក់ អាយុពី ១៨ ដល់ ៦០ ឆ្នាំ នឹងត្រូវទទួលការចាក់វ៉ាក់សាំងនេះដែលចែកចេញជា ៣ ក្រុម ដោយទទួលបានវ៉ាក់សាំងនេះក្នុងបរិមាណផ្សេងៗគ្នា។ ពួកគេទាំងអស់គឺជាពលរដ្ឋនៃទីក្រុង Wuhan ដែលជាកន្លែងដែលមេរោគនេះបានផ្ទុះឡើងដំបូងបង្អស់កាលពីចុងឆ្នាំមុន។
ស្របពេលដែលជំងឺ COVID-19 នេះ បន្តឆ្លងរាលដាលនៅទូទាំងពិភពលោក ហើយរដ្ឋាភិបាលនានាបង្កើនវិធានការការពារ ក្រុមហ៊ុនឱសថសាស្ត្រ និងមន្ទីរពិសោធន៍នានានៅជុំវិញពិភពលោកកំពុងប្រឹងប្រែងពេញទំហឹងដោយមិនបង្អែរបង្អង់។
នៅពេលបច្ចុប្បន្ននេះ មិនទាន់មានវ៉ាក់សាំងណាមួយ ឬក៏ថ្នាំពេទ្យណាមួយដែលមានការអនុម័តផ្លូវការនៅក្នុងការព្យាបាលជំងឺនេះនៅឡើយទេ។ កន្លងមក ជំងឺ COVID-19 នេះបានសម្លាប់មនុស្សជាង ១ ម៉ឺន ៣ ពាន់នាក់នៅទូទាំងពិភពលោក។
សម្រាប់ថ្នាំពេទ្យ Remdesivirដែលបង្កើតដោយក្រុមហ៊ុន Gilean Sciences របស់សហរដ្ឋអាមេរិក កំពុងស្ថិតនៅក្នុងដំណាក់កាលចុងក្រោយនៃការពិសោធន៍នៅទ្វីបអាស៊ី ហើយគ្រូពេទ្យនៅប្រទេសចិនបានរាយការណ៍ថា ថ្នាំពេទ្យនេះបានបង្ហាញពីប្រសិទ្ធភាពនៅក្នុងការប្រយុទ្ធប្រឆាំងនឹងជំងឺ COVID-19 នេះ៕