ប្រទេសចិនកាលពីថ្ងៃព្រសហ្បតិ៍នេះ បានព្រមចុះកិច្ចព្រមព្រៀងផ្តល់ទិន្នន័យផ្នែកជលសាស្ត្រពេញមួយឆ្នាំដល់គណៈកម្មការទន្លេមេគង្គ (Mekong River Commission) ដើម្បីចែករំលែកព័ត៌មានដែលជួយដល់ការព្យាករណ៍ទឹកជំនន់និងគ្រោះរាំងស្ងួតឲ្យបានកាន់តែប្រសើរនៅតាមបណ្តាប្រទេសជាប់ដងទន្លេមេគង្គ។ នេះបើយោងតាមគណៈកម្មការទន្លេមេគង្គដែលមានមូលដ្ឋានក្នុងទីក្រុងវៀងច័ន្ទន៍ប្រទេសឡាវ។
សេចក្តីប្រកាសព័ត៌មានរបស់គណៈកម្មការនេះដែលចេញផ្សាយកាលពីថ្ងៃទី២២ខែតុលា បានឲ្យដឹងថាកិច្ចព្រមព្រៀងនេះ ត្រូវបានចុះហត្ថលេខាក្នុងកិច្ចប្រជុំមួយដែលបានធ្វើឡើងតាមបណ្តាញអ៊ីនធឺណិតរវាងក្រសួងធនធានទឹករបស់ចិននិងគណៈកម្មការទន្លេមេគង្គដែលមានសមាជិក៤ប្រទេស។
ការចុះកិច្ចព្រមព្រៀងរវាងចិននិងគណៈកម្មការទន្លេមេគង្គនេះធ្វើឡើង ក្រោយពីមានការរិះគន់លើប្រទេសចិនថា ប្រទេសកម្មុយនីស្តមួយនេះដែលជាប្រទេសជាប់ដងទន្លេមេគង្គខ្សែទឹកខាងលើបានគ្រប់គ្រងលំហូរទឹកទន្លេមេគង្គរួមនេះដោយគ្មានតម្លាភាព ដែលធ្វើឲ្យប៉ះពាល់ដល់បណ្តាប្រទេសជាប់ដងទន្លេមេគង្គខ្សែទឹកខាងក្រោមរួមមានកម្ពុជា ថៃឡាវនិងវៀតណាម៕