អ្នកទស្សនាការប្រកួតកីឡាបាល់ទាត់នៅពហុកីឡាដ្ឋានជាតិអូឡាំពិកបានបញ្ចេញសំឡេងគាំទ្រកងរំពងពេញពហុកីឡាដ្ឋានជាតិអូឡាំពិកដ៏ចំណាស់ ខណៈពេលដែលកីឡាករបាល់ទាត់ជម្រើសជាតិកម្ពុជាប្រកួតជាមួយនឹងក្រុមសិង្ហបុរី កាលពីសប្តាហ៍មុន ក្នុងវគ្គជម្រុះបឋមអាស៊ីដើម្បីឈានចូលការប្រកួតពានរង្វាន់បាល់ទាត់ពិភពលោក។
មានមនុស្សជាង៦ម៉ឺននាក់បានមកមើលការប្រកួតផ្ទាល់របស់ក្រុមជម្រើសជាតិ ដែលត្រូវបានគេហៅក្រៅថា ជាអ្នកចម្បាំងក្រុងអង្គរ។
ការប្រកួតនៅពហុកីឡាដ្ឋាននេះមានការពេញនិយម ដោយអ្នកគាំទ្របានទៅទស្សនាផ្ទាល់ ហើយនៅលើបណ្តាញផ្សព្វផ្សាយសង្គម Facebook មានការជជែកពិភាក្សាអំពីលទ្ធផល និងរបៀបនៃការលេង ក្រៅពីនោះក៏មានការទិញផលិតផលកីឡាជាច្រើន ដូចជាអាវក្រុមជម្រើសជាតិ។
ដោយមានបិទរូបទង់ជាតិកម្ពុជានៅលើថ្ពាល់ យុវនារី ជុន សុខឃីម ដែលជានិស្សិតមកពីសាកលវិទ្យាល័យភូមិន្ទភ្នំពេញ បានទៅមើលការប្រកួតជាលើកទីមួយជាមួយមិត្តភក្តិរបស់នាង។
«មកមើលផ្ទាល់ថ្ងៃនេះ មកលើកទឹកចិត្តឲ្យកីឡាករកម្ពុជារបស់យើង ឲ្យមានកម្លាំងចិត្តកាន់តែខ្លាំង ហើយនិងឈ្នះការប្រកួតនេះ»។
លោក ឃួន ឡាបូរ៉ាវី ជាខ្សែប្រយុទ្ធនៃក្រុមជម្រើសជាតិកម្ពុជា បាននិយាយថា លោកមានការរំភើបចំពោះព្រឹត្តិការណ៍នោះ។ លោកនិយាយថា អស់រយៈពេល១០ឆ្នាំហើយ ដែលលោកបានលេងកីឡាបាល់ទាត់នេះ ហើយការប្រកួតកន្លងមកមានអ្នកទស្សនាពេញកៅអីនៅកន្លែងមានដំបូលតែប៉ុណ្ណោះ។
«ជំរុញទឹកចិត្តឲ្យប្រឹងលេងកាន់តែខ្លាំង។ ពេលខ្លះលេងអត់ដឹងហត់ទេ នៅពេលមានមនុស្សមើល ហ៊ោច្រើន»។
លោកនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានឲ្យដឹងថា សន្ទុះនៃការគាំទ្ររបស់យុវជនកម្ពុជាក្នុងពេលបច្ចុប្បន្នគឺដោយសារការលេងរបស់កីឡាករបាល់ទាត់ ជាពិសេសយុវជនមានបច្ចេកទេសលេងល្អជាងមុន បន្ថែមលើស្ថិរភាពនយោបាយ និងកំណើនសេដ្ឋកិច្ច។
«ទើបនឹងពេលថ្មីៗនេះ មានការពុះកញ្រ្ជោលដោយសារការលេងរបស់យើងជាលក្ខណៈអន្តរជាតិនេះមានលទ្ធផល ដូចខ្ញុំបានបញ្ជាក់ខាងដើម គឺមានការត្រសងជាមួយគេ មានចាញ់ មានឈ្នះ មានស្មើទៅតាមសមត្ថភាព ដែលយើងមាន អាចធ្វើបាន»។
លោក កែម ឡី អ្នកស្រាវជ្រាវកិច្ចការអភិវឌ្ឍន៍សង្គម មើលឃើញថា វិស័យកីឡានៅក្នុងប្រទេសកម្ពុជាមានការកើនឡើងយ៉ាងខ្លាំង ទាំងក្រុមកីឡាករ និងអ្នកគាំទ្រ ដោយសារការរីកចម្រើននៃបច្ចេកវិទ្យា ដែលធ្វើឲ្យមានភាពងាយស្រួលក្នុងការសិក្សាស្វែងយល់អំពីសក្តានុពលវិស័យកីឡាបរទេសតាមរយៈអ៊ីនធឺណិត និងការវិវត្តរបស់កម្ពុជា ដែលអនុញ្ញាតឲ្យយុវជនមានឱកាសលេងកីឡាបានច្រើន ក៏ដូចជាការយកចិត្តទុកដាក់ពីក្រសួងអប់រំ យុវជន និងកីឡា។
លោកបានមើលឃើញផលចំណេញពីការគាំទ្រនេះទៅលើវិស័យសេដ្ឋកិច្ច និងវប្បធម៌ ទោះបីជាវិស័យកីឡានេះនៅមានកម្រិតតិចតួច។
«កាលណាមានការគាំទ្រកាន់តែច្រើន គណៈកម្មការអូឡាំពិក គណៈកម្មការកីឡា ឬមួយក៏ក្មេងៗដែលចូលលេងកីឡាហ្នឹងមានលទ្ធភាពច្រើនក្នុងការហាត់បន្ថែមទៀត ពីព្រោះគាត់មានឱកាសផ្សាយពាណិជ្ជកម្ម។ គាត់មានឱកាសលក់សំបុត្រ។ គាត់មានឱកាសវិនិយោគទៅលើវិស័យកីឡា។ អាហ្នឹងវាប្រសើរ» ។
កាលពីប៉ុន្មានឆ្នាំមុន វិស័យកីឡាបាល់ទាត់មិនសូវទទួលបានការគាំទ្រប៉ុន្មានទេ។
លោក តុង សុប្រាជ្ញ បានតាមដានវិស័យកីឡាបាល់ទាត់នៅប្រទេសកម្ពុជាអស់រយៈពេលជាង៣០ឆ្នាំមកហើយ។ លោកបាននិយាយថា ការដែលប្រជាជនឈប់គាំទ្រកាលពីមួយរយៈមុន គឺដោយសារនិន្នាការនយោបាយខុសគ្នានៃថ្នាក់ដឹកនាំសហព័ន្ធបាល់ទាត់កម្ពុជា ការកំណត់គ្រាប់បាល់មុនការប្រកួត ដោយគ្មានចំណាត់ការដំណោះស្រាយជាដើម។
ប៉ុន្តែ លោកទទួលស្គាល់ថា បច្ចុប្បន្ននេះការប្រកួតបាល់ទាត់ប្រសើរច្រើនជាងមុន ហើយការលេងមានលក្ខណៈគួរឲ្យចាប់អារម្មណ៍ច្រើនជាងមុន ទោះបីជាក្រុមកីឡាករជម្រើសជាតិប្រកួតចាញ់ក៏ដោយ។
«ឥឡូវទោះបីជាពួកគាត់លេងចាញ់ ប៉ុន្តែធ្វើឲ្យអ្នកមើលអស់ចិត្ត»។
កាលពីដើមខែមិថុនានេះ កម្ពុជាបានទទួលសិទ្ធិធ្វើជាម្ចាស់ផ្ទះការប្រកួតកីឡាអាស៊ីអាគ្នេយ៍ SEA GAME សម្រាប់ឆ្នាំ២០២៣ជាផ្លូវការ នៅពេលដែលកម្ពុជាបានចូលរួមប្រកួត SEA GAME នៅក្នុងប្រទេសសិង្ហបុរី។
ក្រុមជម្រើសជាតិបាល់ទាត់កម្ពុជាមានប្រវត្តិមិនដែលឈានដល់វគ្គពាក់កណ្តាលផ្តាច់ព្រ័ត្រឡើយ នៅក្នុងការប្រកួតកីឡាអាស៊ីអាគ្នេយ៍។
លោក បូរ៉ាវី កីឡាករជម្រើសជាតិ មានការជឿជាក់ទៅលើក្រុមជំនាន់ក្រោយសម្រាប់ការប្រកួតនាពេលអនាគតនោះ ដោយសារពួកគេមានឱកាសបានហ្វឹកហាត់ពីក្មេង ខុសពីជំនាន់លោក ដែលចាប់ផ្តើមហាត់នៅពេលដែលលោកមានអាយុ១៨ឆ្នាំទៅហើយ។
នាពេលអនាគត លោក កែម ឡី បានស្នើឲ្យមានការយកចិត្តទុកដាក់ពីក្រសួងអប់រំ ដោយគួរតែធ្វើការវិនិយោគទៅលើវិស័យនេះបន្ថែម ជាពិសេសផ្តល់ការបណ្តុះកុមារ ដែលមាននិស្ស័យទៅលើកីឡាដើម្បីឲ្យពួកគេមានការហ្វឹកហាត់ពីវ័យក្មេងទៅ ដើម្បីឲ្យមានសន្ទុះខ្លាំង។
លោក សៅ សុខា បានឲ្យដឹងថា និរន្តរភាពនៃការគាំទ្រនេះគឺអាស្រ័យលើទំនាក់ទំនងរវាងកីឡាករ និងអ្នកគាំទ្រ។ លោកបានលើកឡើងថា សហព័ន្ធកីឡាបាល់ទាត់កម្ពុជាកំពុងធ្វើការផ្សព្វផ្សាយពាក្យស្លោក «ម្នាក់សម្រាប់ទាំងអស់គ្នា ទាំងអស់គ្នាសម្រាប់ម្នាក់» ដើម្បីឲ្យមានការគាំទ្រលើវិស័យបាល់ទាត់នេះកាន់តែប្រសើរឡើង៕