ចំណងទាក់ទងរវាងគណបក្សកាន់អំណាច និងគណបក្សប្រឆាំងនៅកម្ពុជា កាន់តែមានសភាពដុនដាបខ្លាំងឡើងក្នុងសប្តាហ៍នេះ បន្ទាប់ពីមានការវាយតប់ពីសំណាក់ហ្វូងមនុស្ស ទៅលើតំណាងរាស្រ្តរបស់គណបក្សប្រឆាំង២រូប ខណៈពេលដែលតំណាងរាស្រ្តទាំង២រូបនេះបានចាកចេញពីសភាជាតិ។ ហេតុការណ៍ដែលត្រូវបានសង្ស័យថា ជាស្នាដៃរបស់អ្នកគាំទ្រគណបក្សកាន់អំណាចនេះកើតឡើងបន្ទាប់ពីមានការព្រមានពីលោកនាយករដ្ឋមន្រ្តី ហ៊ុន សែន ដែលថា ប្រទេសកម្ពុជានឹងមានសង្រ្គាមស៊ីវិល ប្រសិនណាគណបក្សរបស់លោកចាញ់ឆ្នោតនៅឆ្នាំ២០១៨ខាងមុខនេះ។
ការវាយប្រហារយ៉ាងសាហាវឃោរឃៅកាលពីពេលថ្ងៃត្រង់នៅថ្ងៃច័ន្ទទៅលើតំណាងរាស្រ្តរបស់គណបក្សប្រឆាំង២រូបនេះ គឺជាការរំលឹកយ៉ាងច្បាស់ថា ភាពតានតឹងក្រោយការបោះឆ្នោតរបស់កម្ពុជាកាលពីឆ្នាំ២០១៣ មិនទាន់ធូរស្រាលនៅឡើយទេ។
ការវាយប្រហារនេះ ត្រូវបានគេជឿថា ជាស្នាដៃរបស់ជនដៃដល់របស់គណបក្សកាន់អំណាច បន្ទាប់ពីមានការបរាជ័យនូវវប្បធម៌សន្ទនារវាងលោក នាយករដ្ឋមន្រ្តី ហ៊ុន សែន និងមេដឹកនាំគណបក្សប្រឆាំង គឺលោក សម រង្ស៊ី កាលពីដើមឆ្នាំនេះ។ យោងតាមទ្រឹស្តី ការវាយប្រហារនេះ គឺជាដំណើរការមួយដែលធ្វើឲ្យភាពតានតឹងកាន់តែមានសភាពខ្លាំងក្លាឡើង។
ក្រុមជនដៃដល់ បានវាយតប់អ្នកតំណាងរាស្រ្តទាំង២រូប ខណៈពេលដែលពួកគេបានចាកចេញពីសភាជាតិ ដោយចាប់អូសពួកគេចេញពីរថយន្ត និងធ្វើការវាយតប់បណ្ដាលឲ្យរងរបួសធ្ងន់។ សាក្សីដែលបានឃើញហេតុការណ៍នោះបាននិយាយថា ប៉ូលិស និងកងសន្តិសុខដែលយាមនៅក្បែរនោះ មិនបានជួយអន្តរាគមន៍ដល់អ្នកតំណាងរាស្រ្តទាំង២រូបនោះទេ។ ឥឡូវនេះ អ្នកតំណាងរាស្រ្តទាំង២រូបនោះ កំពុងសម្រាកព្យាបាលនៅមន្ទីរពេទ្យក្នុងប្រទេសថៃ។
អំពើហិង្សានេះកើតឡើងភ្លាមៗ បន្ទាប់ពីអ្នកគាំទ្ររបស់គណបក្សប្រជាជនកម្ពុជារាប់រយនាក់បានធ្វើការតវ៉ាប្រឆាំងនៅក្រៅសភាជាតិ ដោយទាមទារឲ្យអនុប្រធានគណបក្សប្រឆាំង គឺលោក កឹម សុខា លាលែងពីតំណែងជាអនុប្រធានរដ្ឋសភា។
ហេតុការណ៍នេះ កើតឡើងស្របពេលដែលលោកនាយករដ្ឋមន្រ្តី ហ៊ុន សែន ទាមទារឲ្យតុលាការកម្ពុជាកាត់ទោសលោក កឹម សុខា ពីបទព្យាយាមផ្ដួលរំលំរដ្ឋាភិបាល។
នៅក្នុងការផ្សាយលើកញ្ចក់ទូរទស្សន៍កាលពីថ្ងៃពុធនេះ លោក ហ៊ុន សែន បានថ្កោលទោសទៅលើការវាយប្រហារនេះ និងបញ្ជាឲ្យតាមចាប់ខ្លួនអ្នកពាក់ព័ន្ធទាំងអស់នោះ។ នៅក្នុងសេចក្ដីថ្លែងការណ៍របស់លោក លោក ហ៊ុន សែន ក៏បានទទូចថា គណបក្សកាន់អំណាចមិននៅពីក្រោយរឿងនេះទេ។
គណៈកម្មាធិការរបស់រដ្ឋាភិបាលដែលមានសមាជិកជាមន្រ្តីរបស់គណបក្សប្រជាជនកម្ពុជាត្រូវបានផ្តល់ភារកិច្ចឲ្យស៊ើបអង្កេតលើរឿងដែលបានកើតឡើងនេះ។
អ្នកវិភាគនយោបាយ គឺលោក អ៊ូ វីរៈ ដែលជាស្ថាបនិកនៃវេទិកាអនាគតដែលជាអង្គការស្រាវជ្រាវនយោបាយក្នុងស្រុកនិយាយថា មនុស្សជាច្រើនជឿថា សមាជិករបស់គណបក្សប្រជាជនកម្ពុជា គឺជាអ្នកទទួលខុសត្រូវលើរឿងនេះ។
លោក អ៊ូ វីរៈ បានថ្លែងថា «ខ្ញុំគិតថា មានភស្តុតាងគ្រប់គ្រាន់ មានវីដេអូគ្រប់គ្រាន់ ក្នុងការបង្ហាញថា វាកើតឡើងមកពីសមាជិករបស់គណបក្សកាន់អំណាច ប៉ុន្តែខ្ញុំគិតថា សំណួរគឺនៅត្រង់ថា តើពួកគេនឹងត្រូវបានដាក់ទោសទៅលើការប្រព្រឹត្តនេះដែរឬទេ?»
លោកបានបន្ថែមថា មនុស្សម្នាមានការសង្ស័យថាតើគណៈកម្មាធិការស៊ើបអង្កេតពិតជាធ្វើការងាររបស់ពួកគេដោយមិនលម្អៀងដែរឬទេ។
លោក អ៊ូ វីរៈ បានបន្តថា «ខ្ញុំមិនជឿទេ ថាយើងអាចទុកចិត្តបាន ថាការស៊ើបអង្កេតនឹងអាចដាក់សំណាញ់ចាប់អ្នកដែលត្រូវទទួលខុសត្រូវទាំងអស់នោះបាន ក៏ប៉ុន្តែខ្ញុំគិតថា ពួកគេប្រហែលជាអាចចាប់ខ្លួនមនុស្សពីរឬបីនាក់ ហើយរដ្ឋាភិបាលកាន់អំណាចអាចលាតត្រដាងថា វាជាហេតុផល ដែលបញ្ជាក់ថា ពួកគេមិននៅពីក្រោយខ្នងនៃការវាយប្រហារនេះទេ។ ខ្ញុំគិតថា ទស្សនៈរបស់សាធារណៈជន នឹងនៅតែបន្តមានមន្ទិលសង្ស័យ បើទោះបីជា វាជាការពិតក៏ដោយ»។
លោក អ៊ូ វីរៈ បានកត់សម្គាល់ថា លោក ហ៊ុន សែន មិនបានលើកឡើងអំពីហេតុការណ៍ទីពីរដែលបានកើតឡើងដោយសារជនដៃដល់ កាលពីថ្ងៃច័ន្ទ ក្នុងអំឡុងពេលដែលក្រុមអ្នកតវ៉ា បានគប់ដុំថ្មចូលក្នុងផ្ទះរបស់លោក កឹម សុខា អស់រយៈពេលប៉ុន្មានម៉ោង ខណៈពេលដែលភរិយា និងមនុស្សម្នាដទៃទៀតកំពុងភ័យខ្លាចនៅខាងក្នុងផ្ទះ ហើយប៉ូលិសមិនបានរារាំងក្រុមអ្នកតវ៉ានោះ»។
កងកម្លាំងប្រដាប់អាវុធរបស់កម្ពុជា បានចូលរួមក្នុងការតវ៉ាក្នុងសប្តាហ៍នេះ។ មានទាហានមួយក្រុមដែលត្រូវបានគេថតរូបឃើញថា មានកាន់បដាទាមទារឲ្យលោក កឹម សុខា ចុះចេញពីតំណែង។ មន្រ្តីជាន់ខ្ពស់របស់រដ្ឋាភិបាល បានគាំទ្រសកម្មភាពរបស់ទាហានទាំងនេះ ថាជាសេរីភាពក្នុងការបញ្ចេញមតិ។
ហេតុការណ៍ទាំងអស់នេះកើតឡើងក្រោយពីមានការព្រមានធ្ងន់ៗជាច្រើន ពីសំណាក់ លោក ហ៊ុន សែន ក្នុងរយៈពេលប៉ុន្មានខែចុងក្រោយនេះ ដែលថានឹងមានសង្រ្គាមស៊ីវិលកើតឡើង ប្រសិនណាគណបក្សប្រឆាំងឈ្នះការបោះឆ្នោតអាណត្តិក្រោយ ដែលនឹងធ្វើឡើងនៅឆ្នាំ២០១៨ខាងមុខនេះ ហើយលោក ហ៊ុន សែន ក៏បានប្រើពាក្យសម្តីវាយប្រហារធ្ងន់ៗជាច្រើន ទៅកាន់លោក កឹម សុខា និងមេដឹកនាំគណបក្សប្រឆាំង លោក សម រង្ស៊ី ផងដែរ។
សម្រាប់លោក សម រង្ស៊ី ដែលនឹងត្រូវវិលត្រឡប់មកកម្ពុជាវិញប៉ុន្មានថ្ងៃខាងមុខនេះ បានធ្វើការរិះគន់លើការវាយប្រហារទៅលើមន្រ្តីតំណាងរាស្រ្តរបស់គណបក្សប្រឆាំង ថាជាយុទ្ធសាស្រ្តរបស់ លោក ហ៊ុន សែន ក្នុងការ «ប្រើប្រាស់វិធីសាស្រ្តហ្វាស៊ីស ដើម្បីក្រាញនឹងអំណាច»។
ប៉ុន្មានសប្តាហ៍ចុងក្រោយនេះ អ្នកវិភាគមួយចំនួន រួមទាំងលោក អ៊ូ វីរៈ ដែលជានាយកនៃវេទិកាអនាគត បានបញ្ចេញការភ្ញាក់ផ្អើលថា គណបក្សប្រជាជនកម្ពុជា ដែលត្រូវបានចោទប្រកាន់ថា បានប្រើប្រាស់វិធីសាស្រ្តបំភិតបំភ័យនិងហិង្សា ដើម្បីក្តោបក្តាប់អំណាចនោះ ហាក់ដូចជាចាប់ផ្តើមធ្លាក់កូដរួចទៅហើយ។
លោក អ៊ូ វីរៈ បាននិយាយថា «ការបោះឆ្នោតជាតិ ដែលជាការបោះឆ្នោតដ៏សំខាន់បំផុតនោះ នឹងមកដល់ក្នុងរយៈពេលជិត៣ឆ្នាំខាងមុខ ដែលនេះជារយៈពេលដ៏យូរទៅមុខទៀត។ ដូច្នេះ ខ្ញុំគិតថា ប្រសិនបើ គណបក្សកាន់អំណាច ចាប់ផ្តើមអនុវត្តវិធីសាស្រ្តទាំងអស់នេះ ដែលតាមពិតទៅវាលឿនពេក និងមានលក្ខណៈក្មេងខ្ចី នោះប្រហែលជាយើងអាចនឹងឃើញនូវស្ថានភាពនឹងនរនៅមុនពេលមានព្យុះភ្លៀង»។
ក្នុងពេលនេះ លោក វីរៈ រំពឹងទុកថា គណបក្សប្រជាជនកម្ពុជា នឹងបន្តអនុវត្ត គោលនយោបាយដែលខ្លួនបានព្យាយាម និងសាកល្បង ក្នុងការប្រើប្រាស់តុលាការដើម្បីចាត់ការលោក សម រង្ស៊ី និងប្រើប្រាស់វិធីសាស្រ្តរុកគួនផ្នែករាងកាយ ទៅកាន់លោក កឹម សុខា៕
ប្រែសម្រួលដោយ ហុង ចិន្តា