កម្លាំងកងរាជអាវុធហត្ថខេត្តព្រះវិហារបានរកឃើញគ្រឿងញៀនជាងមួយតោន ដែលសមត្ថកិច្ចអះអាងថា ត្រូវបានក្រុមឧក្រិដ្ឋជនយកមកផ្លុងចោលនៅទីតាំងមួយក្នុងខេត្តនេះ។ នេះបើតាមមន្ត្រីជាន់ខ្ពស់នៃអាជ្ញាធរគ្រឿងញៀន។
អ្នកនាំពាក្យអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ ថ្លែងប្រាប់វីអូអេថា គ្រឿងញៀនដែលប្រទះឃើញកាលពីថ្ងៃសៅរ៍ ត្រូវបាននាំចូលមកពីតំបន់ត្រីកោណមាស និងថា មកទល់ពេលនេះ សមត្ថកិច្ចមិនទាន់រកឃើញម្ចាស់គ្រឿងញៀននេះនៅឡើយទេ។
លោកថ្លែងថា៖ «បើនិយាយរឿងរកល្មើសជន កំពុងរកល្មើសជន។ ឥឡូវស្ថិតនៅលើការស៊ើបអង្កេតថា នរណាជាម្ចាស់»។
លោក អេង ហ៊ី អ្នកនាំពាក្យកងរាជអាវុធហត្ថទូទាំងប្រទេស បានបដិសេធមិនអត្ថាធិប្បាយលម្អិត ដោយស្នើឱ្យទាក់ទងទៅខាងតុលាការខេត្តព្រះវិហារវិញ។ ប៉ុន្តែបើតាមបណ្តាញព័ត៌មានក្នុងស្រុក ថ្នាំញៀននេះគឺជាម៉ាទឹកកក។
វីអូអេមិនទាន់អាចសុំការអត្ថាធិប្បាយពីលោក សួស សុខដារ៉ា ស្នងការនគរបាលខេត្តព្រះវិហារបាននៅឡើយទេ។
បើតាមសារព័ត៌មាន Freshnews ដែលដកស្រង់សម្តីអាជ្ញាធរពាក់ព័ន្ធ គ្រឿងញៀនទាំងនោះត្រូវបានរកឃើញនៅក្នុងរថយន្តមួយគ្រឿង ដែលផ្ទុកគ្រឿងញៀន ៣៣ការ៉ុង ស្មើនឹង១.០២០កញ្ចប់ ដែលមានទម្ងន់សរុប ១.០២០គីឡូក្រាម។ បើតាមសារព័ត៌មានដដែល ក្រុមឧក្រិដ្ឋជនបានយកគ្រឿងញៀនទាំងនោះទៅផ្លុងចោលនៅខាងមុខវិទ្យាល័យជ័យសែន ក្នុងស្រុកជ័យសែន ខេត្តព្រះវិហារ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ប្រាប់វីអូអេថា បញ្ហាការរីករាលដាលគ្រឿងញៀនគឺជាក្តីកង្វល់ដ៏គួរឱ្យព្រួយបារម្ភ និងថា គ្រឿងញៀននេះបានសាយភាយទៅតាមមូលដ្ឋាន។ លោកបន្ថែមថា គ្រឿងញៀនបានបំផ្លាញធនធានមនុស្ស ព្រមទាំងសង្គមជាតិផងដែរ។
លោកបញ្ជាក់ថា៖ «បញ្ហាគ្រឿងញៀន កាលណាតែកើតច្រើន នាំឲ្យប៉ះពាល់ដល់ការអភិវឌ្ឍប្រទេសជាតិ។ ទី១ កម្ពុជាយើងអាចជាប់ចំណាត់ថ្នាក់មិនល្អនៅលើពិភពលោក បើសិនជាគ្រឿងញៀនហ្នឹងវារីករាលដាលខ្លាំង។ អ៊ីចឹងវាប៉ះពាល់ទៅដល់ការអភិវឌ្ឍប្រទេសជាតិ វិនិយោគទុន បញ្ហាសន្តិសុខ សណ្តាប់ធ្នាប់នៅក្នុងសង្គម និងបញ្ហាផ្សេងៗទៀតដែលកើតឡើង»។
បើតាមលោក អំ សំអាត កំណើនគ្រឿងញៀនក្នុងសហគមន៍មូលដ្ឋាន គឺជាក្តីកង្វល់និងជាការព្រួយបារម្ភខ្លាំងដែលប៉ះពាល់ដល់ការអភិវឌ្ឍធនធានមនុស្ស សន្តិសុខ និងសុវត្ថិភាពសហគមន៍ ព្រមទាំងធ្វើឱ្យយុវជនមួយចំនួនបោះបង់ការសិក្សា និងឈានទៅប្រឡូកក្នុងក្រុមបងតូច បងធំជាដើម។
គួរបញ្ជាក់ថា លោកនាយករដ្ឋមន្ត្រី ហ៊ុន ម៉ាណែត ធ្លាប់ថ្លែងថា រដ្ឋាភិបាលនឹងខិតខំលុបបំបាត់ការជួញដូរ និងការប្រើប្រាស់គ្រឿងញៀនឱ្យអស់ពីកម្ពុជា ក្រោមការដឹកនាំដោយមន្រ្តីជាន់ខ្ពស់នៃស្ថាប័នពាក់ព័ន្ធ រួមមានក្រសួងមហាផ្ទៃ និងយុត្តិធម៌ផងដែរ។ រដ្ឋាភិបាលកម្ពុជាអាណត្តិទី ៧ ក៏បានយកចិត្តទុកដាក់ខ្ពស់លើការបង្ក្រាបគ្រឿងញៀន ខណៈគ្រោងចំណាយថវិកាជាង ១១លានដុល្លារអាមេរិក ក្នុងឆ្នាំ ២០២៤ ដើម្បីដោះស្រាយបញ្ហាគ្រឿងញៀន តាមរយៈគោលនយោបាយ «ភូមិ ឃុំ សង្កាត់ មានសុវត្ថិភាព» និងការលើកកម្ពស់ប្រសិទ្ធភាពនៃប្រព័ន្ធយុត្តិធម៌៕