ប្រទេសកម្ពុជា នៅតែរក្សាចំណាត់ថ្នាក់ថេរ ក្នុងនាមជាប្រទេសដែលគេយល់ថាមានកម្រិតអំពើពុករលួយខ្ពស់ដដែល ហើយនៅតែឈរក្នុងលំដាប់ថ្នាក់ទាបជាងគេបំផុតក្នុងចំណោមប្រទេសជាសមាជិកអាស៊ានទាំង១០។ នេះបើយោងតាមសន្ទស្សន៍នៃការយល់ឃើញពីអំពើពុករលួយឆ្នាំ២០១៧ ដែលបានចេញផ្សាយដោយអង្គការតម្លាភាពអន្តរជាតិនៅថ្ងៃព្រហស្បតិ៍ ទី២២ ខែកុម្ភៈនេះ។
សន្ទស្សន៍ដែលកំណត់ដោយអង្គការប្រយុទ្ធប្រឆាំងអំពើពុករលួយ ដែលមានមូលដ្ឋាននៅក្នុងប្រទេសអាល្លឺម៉ង់នេះ បង្ហាញថា កម្ពុជា ទទួលបានពិន្ទុតែ២១លើ១០០ ហើយពិន្ទុនេះ នៅតែដដែល ដោយឥតមានការផ្លាស់ប្តូរក្នុងរយៈពេល៤ឆ្នាំចុងក្រោយនេះ។
ប្រទេសដែលទទួលបានពិន្ទុ ១០០ មានន័យថា ប្រទេសនោះស្អាតស្អំបំផុត។ ប្រទេសដែលឈរលំដាប់ខ្ពស់ជាងគេក្នុងសន្ទស្សន៍នៃការយល់ឃើញពីអំពើពុករលួយនៅឆ្នាំ២០១៧ គឺប្រទេសនូវែលសេឡង់ ដែលទទួលបានពិន្ទុ ៨៩។ ចំណែក ប្រទេសដែលនៅបាតក្រោមគេបង្អស់គឺប្រទេសសូម៉ាលី ដែលទទួលបានពិន្ទុត្រឹមតែ៩ប៉ុណ្ណោះ។
យោងតាមសន្ទស្សន៍ដដែលនេះ ប្រទេសកម្ពុជា ស្ថិតនៅចំណាត់ថ្នាក់ទី១៦១ ក្នុងចំណោមប្រទេស១៨០ ដែលអង្គការនេះ បានធ្វើការសិក្សាស្រាវជ្រាវអំពីការយល់ឃើញពីអំពើពុករលួយក្នុងវិស័យសាធារណៈ។
កាលពីឆ្នាំមុន កម្ពុជា ទទួលបានចំណាត់ថ្នាក់ទី១៥៦ ក្នុងចំណោមប្រទេស១៧៦៕