វ៉ាក់សាំងបង្ការជំងឺកូវីដ១៩ប្រភេទស៊ីណូវ៉ាក់(Sinovac)ចំនួន១លាន៥សែនដូសត្រូវបានបញ្ជូនមកដល់កម្ពុជា កាលពីព្រឹកថ្ងៃអង្គារ ដែលនេះជាជំនួយឥតសំណងរបស់រដ្ឋាភិបាលចិន។
នេះជាវ៉ាក់សាំងមួយផ្នែកនៃជំនួយវ៉ាក់សាំងរបស់ចិនសរុបចំនួន២០លានដូស ដែលនឹងត្រូវផ្តល់មកកម្ពុជានាពេលខាងមុខ។
ប្រាប់អ្នកសារព័ត៌មាននៅអាកាសយានដ្ឋានអន្តរជាតិភ្នំពេញ អ្នកស្រី យក់ សម្បត្តិ រដ្ឋលេខាធិការក្រសួងសុខាភិបាល ថ្លែងថា នៅក្នុងដំណាក់កាលទីមួយនេះវ៉ាក់សាំងចំនួន៥លានដូសនឹងត្រូវបញ្ជូនមកកម្ពុជា។ អ្នកស្រីបន្ថែមថា នៅថ្ងៃស្អែកនេះនឹងមានការបញ្ជូនវ៉ាក់សាំងជាង៣លានដូសទៀតពីប្រទេសចិន។
បើតាមអ្នកស្រី យក់ សម្បត្តិ វ៉ាក់សាំងបង្ការជំងឺកូវីដ១៩ដែលជាជំនួយនេះ គឺជាលទ្ធផលនៃការពិភាក្សាគ្នាតាមប្រព័ន្ធទូរសព្ទរវាងលោកនាយករដ្ឋមន្ត្រី ហ៊ុន សែន និងប្រធានាធិបតីចិន លោក ស៊ីជិនពីង កាលពីថ្ងៃទី១៨ ខែមីនា ឆ្នាំ២០២២។ អ្នកស្រីបានអំពាវនាវឱ្យប្រជាពលរដ្ឋកម្ពុជាទាំងអស់មកចាក់វ៉ាក់សាំង ជាពិសេសដូសជំរុញ ទី៣និងទី៤ ដោយសារមានតែវ៉ាក់សាំងទេដែលអាចបង្ការកុំឱ្យឆ្លងកូវីដ១៩ ឬបើឆ្លងក៏មិនឈឺធ្ងន់ធ្ងររហូតដល់ស្លាប់ឡើយ។
លោក Wu Guoquan ទីប្រឹក្សាសេដ្ឋកិច្ច និងពាណិជ្ជកម្មនៃស្ថានទូតចិនប្រចាំកម្ពុជា ដែលជាតំណាងស្ថានទូតចិនក្នុងការទទួលវ៉ាក់សាំងនៅអាកាសយានដ្ឋានបានថ្លែងតាមរយៈការបកប្រែថា រដ្ឋាភិបាលចិននៅតែគាំទ្រនិងផ្តល់ជំនួយដល់កម្ពុជានៅក្នុងការប្រយុទ្ធប្រឆាំងនឹងជំងឺកូវីដ១៩។
គិតមកទល់ពេលនេះកម្ពុជាបានទទួលជំនួយវ៉ាក់សាំងបង្ការកូវីដ១៩ពីប្រទេសចិនជាង២៨លានដូសហើយកម្ពុជាក្លាយជាប្រទេសមួយនៅលើពិភពលោកដែលបានចាក់វ៉ាក់សាំងដល់ប្រជាពលរដ្ឋបានច្រើនលើសលប់។ នេះបើតាមអ្នកស្រី យក់ សម្បត្តិ។
ប្រជាពលរដ្ឋកម្ពុជាដែលបានចាក់វ៉ាក់សាំង៣ដូសមានប្រមាណ៨លាននាក់ និងអ្នកចាក់៤ដូសមានជាង១លាននាក់។ នេះបើយោងតាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងកូវីដ១៩ គិតមកដល់ថ្ងៃទី២៨ ខែមីនា ឆ្នាំ២០២២៕