មហាសេដ្ឋីអចលនទ្រព្យលំដាប់ថ្នាក់ពិភពលោកជនជាតិរុស្សីត្រូវបានអាជ្ញាធរខេត្តព្រះសីហនុចាប់ឃាត់ខ្លួនកាលពីល្ងាចថ្ងៃសុក្រនេះពីបទស្នាក់នៅក្នុងប្រទេសកម្ពុជាហួសទិដ្ឋាការ។ ការចាប់ខ្លួននេះគឺកើតឡើងតែប៉ុន្មានថ្ងៃក្រោយពេលដែលក្រសួងការបរទេសកម្ពុជាស្នើឲ្យក្រសួងយុត្តិធម៌ធ្វើការពិនិត្យមើលសំណុំរឿងមហាសេដ្ឋីរូបនេះតាមការស្នើសុំធ្វើបត្យាប័នរបស់រដ្ឋាភិបាលរុស្ស៊ី។
លោក សេហ្គេ ប៉ូឡុនស្គី (Sergei Polonsky) អាយុ៤៣ឆ្នាំ ដែលគេស្គាល់ថាជាមហាសេដ្ឋីលុយវាល់លាននិងមានកោះផ្ទាល់ខ្លួននៅក្នុងខេត្តព្រះសីហនុ ត្រូវបានចាប់ខ្លួននិងបញ្ជូនភ្លាមៗមកកាន់អគ្គនាយកដ្ឋានអន្តោប្រវេសន៍នៅរាជធានីភ្នំពេញ។ លោក សេហ្គេ ប៉ូឡុនស្គី និងបក្សពួក៥នាក់ផ្សេងទៀតត្រូវបានឃាត់ខ្លួនកាលពីរសៀលម៉ោង១ថ្ងៃសុក្រនេះ ដោយសារតែទិដ្ឋាការស្នាក់នៅរបស់លោកហួសកំណត់រយៈពេលជាងពីរឆ្នាំចាប់តាំងពីឆ្នាំ២០១៣មកម្ល៉េះ។ នេះបើតាមការបញ្ជាក់ឲ្យដឹងរបស់លោក អ៊ុក ហៃសីលា ប្រធាននាយកដ្ឋាន ផ្នែកស៊ើបអង្កេត អនុវត្ដនីតិវិធីនៃអគ្គនាយកដ្ឋានអន្ដោប្រវេសន៍។
«៦នាក់គ្នាគាត់ គ្នាគាត់គឺរុស្សីទាំងអស់ តែអត់ទាន់មានឈ្មោះ ព្រោះអត់មានប៉ាស្ព័រមានអ្វីទាំងអស់។ ពួកគាត់កំពុងជិះទូកនៅកោះដូង។ ការចាប់នេះគឺដោយសារតែស្នាក់នៅហួសទិដ្ឋាការ ចាប់តាំងពី២០១៣មក គឺជាង២ឆ្នាំ»។
លោក សេហ្គេ ប៉ូឡុនស្គី ដែលជាមហាសេដ្ឋីផ្នែកអចលនទ្រព្យនៅប្រទេសរុស្ស៊ីត្រូវបានរដ្ឋាភិបាលប្រទេសនេះប្រកាសតាមចាប់ខ្លួនពីបទឆបោកលុយរាប់លានដុល្លារ។ ហើយរដ្ឋាភិបាលប្រទេសរុស្សីបានស្នើឲ្យរដ្ឋាភិបាលកម្ពុជាចាប់បញ្ជូនជននេះត្រឡប់ទៅរុស្សីវិញហើយដែរតែមិនមានការចាប់បញ្ជូននោះទេក្នុងពេលកន្លងមក។
កាលពីដើមសប្តាហ៍នេះក្រសួងការបរទេសបានផ្ញើលិខិតផ្លូវការមួយទៅក្រសួងយុត្តិធម៌ ស្នើសុំឲ្យមានការពិចារណានិងចាត់វិធានការទៅលើជនបរទេសមួយនេះ។
លោកអ៊ុក ហៃសីលាបាន ប្រាប់វីអូអេខេមរភាសាថាការចាប់ខ្លួននោះគឺមិនទាក់ទិននឹងការស្នើសុំពីស្ថាប័នណានោះទេ តែដោយសារតែ ជនបរទេសរូបនេះនិងបក្សពួកខ្លួនស្នាក់នៅហួសទិដ្ឋាការ។ លោក អ៊ុក ហៃសីលាបានបន្ថែមថាសេហ្គេ ប៉ូឡុនស្គី នឹងអាចត្រូវបណ្តេញចេញពីប្រទេសកម្ពុជាក្នុងអំឡុងពេល២សប្តាហ៍ខាងមុខនេះ។
«ក្នុងមួយសប្តាហ៍យើងនឹងធ្វើនីតិវិធីស្នើសុំការបណ្តេញចេញហើយក្រោយមួយសប្តាហ៍ទៀតយ៉ាងយូរយើងនឹងបណ្តេញគាត់ចេញពីប្រទេស»។
ប៉ុន្តែលោកអ៊ុក ហៃសិលាបដិសេធថាការចាប់ឃាត់ខ្លួននៅពេលនេះគឺធ្វើឡើងដោយសារមានសំណើពីក្រសួងណាផ្សេង៖
«យើងអត់ដឹងព្រោះនោះគេដោះស្រាយរួចអស់ហើយ តែនេះគឺរឿងស្នាក់នៅហួសទិដ្ឋាការ។ យើងអត់មានឃើញសំណើអ្វីផង»។
ប៉ូឡុនស្គី មហាសេដ្ឋីជាតិរុស្សីរូបនេះធ្លាប់មានប្រវត្តិរឿងអាស្រូវជាច្រើនលើកច្រើនសារនៅក្នុងប្រទេសកម្ពុជា។ ហើយក៏ធ្លាប់បានអាជ្ញាធរចាប់ខ្លួនជាច្រើនលើកច្រើនសារចាប់តាំងពីឆ្នាំ២០១៣មក៕