ក្រសួងសុខាភិបាលនិងដៃគូពាក់ព័ន្ធដូចជាអង្គការយូនីសេហ្វ (Unicef) បានចាប់ផ្តើមបើកយុទ្ធនាការចាក់វ៉ាក់សាំងជំងឺកញ្រ្ជឹល ស្អូច ខណៈជំងឺនេះបានចាប់ផ្តើមផ្ទុះឡើង ដែលបង្កជាក្តីព្រួយបារម្ភមួយសម្រាប់សុខភាពសាធារណៈក្នុងប្រទេសកម្ពុជា។
យុទ្ធនាការនេះគឺជាការឆ្លើយតបទាន់ពេលវេលាចំពោះការកើនឡើងជាសកលនៃករណីជំងឺកញ្រ្ជឹលស្អូច និងការផ្ទុះឡើងនៃជំងឺនេះនៅក្នុងប្រទេសជិតខាង ដោយសារអត្រាការចាក់វ៉ាក់សាំងទាបក្នុងចំណោមកុមារ។ នេះបើយោងតាមអង្គការយូនីសេហ្វ។
ក្នុងពិធីប្រកាសបើកយុទ្ធនាការផ្តល់ថ្នាំបង្ការជំងឺកញ្ជ្រឹល ស្អូច សម្រាប់កុមារកម្ពុជាប្រមាណ ១,៥ លាននាក់ រដ្ឋមន្រ្តីក្រសួងសុខាភិបាល លោក ឈាង រ៉ា លើកឡើងថា យុទ្ធនាការផ្តល់ថ្នាំបង្ការ គឺជាកម្មវិធីជាតិមួយដែលជាកម្មវិធីអាទិភាពរបស់ក្រសួងសុខាភិបាលក្នុងការចូលរួមចំណែកកាត់បន្ថយអត្រាមរណភាព អត្រាឈឺ និងពិការភាពរបស់កុមារនៅកម្ពុជា។
លោកអំពាវនាវឱ្យអាណាព្យាបាលទាំងអស់បញ្ជូនកូនដែលមានអាយុចាប់ពី ៩ ខែដល់អាយុ ៥៩ ខែ មកចាក់វ៉ាក់សាំងការពារជំងឺកញ្រ្ជឹលនិងស្អូច។
លោកថ្លែងថា៖ «ខ្ញុំសូមអំពាវនាវដល់មាតាបិតា អាណាព្យាបាលកុមារទាំងអស់សូមនាំកូនដែលមានអាយុ ៩ ខែ រហូតដល់អាយុ ៥ ឆ្នាំ មកទទួលថ្នាំ បង្ការជំងឺកញ្រ្ជឹល ស្អូចរបស់កម្មវិធីចាក់ថ្នាំបង្ការឱ្យបានគ្រប់ៗគ្នា ក្នុងអំឡុងពេលយុទ្ធនាការនេះនៅតាមសាលារៀន មណ្ឌលសុខភាព និងតាមរយៈបុគ្គលិកផ្តល់ថ្នាំបង្ការ តាមភូមិ តាមផែនការ និងការណាត់របស់បុគ្គលិកសុខាភិបាលកុំបីខាន»។
ផ្ទាំងរូបភាពផ្សព្វផ្សាយបានដាក់បង្ហាញ នៅក្នុងពិធីប្រកាសបើកយុទ្ធនាការផ្ដល់ថ្នាំបង្ការជំងឺកញ្ច្រឹលនិងស្អូច នៅមន្ទីរពេទ្យបង្អែកសម្ដេចឪ-សម្ដេចម៉ែ នៅថ្ងៃទី៣១ ខែតុលា ឆ្នាំ ២០២៤។ (ចឹង លីលី/វីអូអេ)
លោក ឈៀង រ៉ា រដ្ឋមន្ត្រីក្រសួងសុខាភិបាល ថ្លែងសន្ទរកថានៅពិធីប្រកាសបើកយុទ្ធនាការផ្ដល់ថ្នាំបង្ការជំងឺកញ្ជ្រឹលនិងស្អូច នៅមន្ទីរពេទ្យបង្អែកសម្ដេចឪ-សម្ដេចម៉ែ នៅថ្ងៃទី៣១ ខែតុលា ឆ្នាំ ២០២៤។ (ចឹង លីលី/វីអូអេ)
លោករដ្ឋមន្រ្តីបញ្ជាក់បន្ថែមថា រហូតមកដល់ពេលនេះ កម្មវិធីជាតិផ្តល់ថ្នាំបង្ការមានវ៉ាក់សាំងការពារកុមារនិងទារកចំនួន ១២ មុខ ក្នុងនោះរួមមានថ្នាំបង្ការជំងឺរបេង ជំងឺគ្រុនស្វិតដៃជើង ជំងឺក្អកមាន់ ជំងឺខាន់ស្លាក់ ជំងឺតេតាណុស ជំងឺរលាកថ្លើមប្រភេទបេ(B) ជំងឺរលាកសួត និងជំងឺរលាកស្រោមខួរជាដើម។
ប្រទេសកម្ពុជា និងប្រទេសជិតខាងកំពុងប្រឈមនឹងភាពងាយរងគ្រោះនៃការឆ្លងរីករាលដាលករណីជំងឺកញ្រ្ជឹល ស្អូចនេះ ជាពិសេសចំពោះប្រជាជនដែលងាយរងគ្រោះ ដូចជាកុមាររស់នៅក្នុងគ្រួសារក្រីក្រ ក្នុងទីក្រុង អ្នករស់នៅក្នុងសហគមន៍ដាច់ស្រយាលនៅតាមជនបទ កុមារជនជាតិដើមភាគតិច និងកុមារអន្តោប្រវេសន៍។
ការប៉ាន់ប្រមាណអំពីអត្រាចាក់ថ្នាំបង្ការជំងឺកញ្រ្ជឹលស្អូចនៅថ្នាក់ជាតិរបស់អង្គការសុខភាពពិភពលោក និងអង្គការមូលនិធិសម្រាប់កុមារនៃអង្គការសហប្រជាជាតិបង្ហាញថា នៅប្រទេសកម្ពុជា អត្រាចាក់វ៉ាក់សាំងការពារជំងឺកញ្រ្ជឹល ស្អូច ដូសទីមួយ (MR1)មាន ៧៩% និងដូសទីពីរមានតែ ៦៤% ប៉ុណ្ណោះ នៅឆ្នាំ ២០២៣។ ទិន្នន័យនេះបង្ហាញថា អត្រាចាក់វ៉ាក់សាំងការពារជំងឺកញ្រ្ជឹល និងស្អូច ស្ថិតនៅកម្រិតក្រោមតម្រូវការសម្រាប់ការបង្ការការផ្ទុះរាលដាលជំងឺ និងចៀសវាងការស្លាប់ដោយសារជំងឺនេះ នៅឡើយ។ នេះបើយោងតាមក្រសួងសុខាភិបាល។
នៅលើសកលលោក ចំនួនករណីជំងឺកញ្រ្ជឹលមានការកើនឡើងទ្វេដងពី ១៧០.០០០ ករណី ក្នុងឆ្នាំ ២០២២ ដល់ ៣២០.០០០ ករណី ក្នុងឆ្នាំ ២០២៣។ មូលហេតុចម្បងគឺដោយសារតែការរំខានដល់ការផ្តល់ថ្នាំបង្ការជាប្រចាំក្នុងអំឡុងពេលរីករាលដាលវីរុសកូវីដ១៩។ នេះបើតាមសេចក្តីប្រកាសព័ត៌មានរបស់អង្គការយូនីសេហ្វនិងក្រសួងសុខាភិបាល។
ក្នុងពិធីប្រកាសបើកយុទ្ធនាការផ្តល់ថ្នាំបង្ការជំងឺកញ្ជ្រឹល ស្អូច សម្រាប់កុមារ លោក វីល ផាកស៍ (Will Parks) នាយកអង្គការយូនីសេហ្វប្រចាំកម្ពុជា បានលើកឡើងថា ក្នុងឆ្នាំ ២០២៣-២០២៤ ប្រទេសជិតខាងកម្ពុជាបានចាប់ផ្តើមផ្ទុះសាជាថ្មីនូវជំងឺកញ្រ្ជឹល ស្អូចដែលជាការបារម្ភមួយផងដែរ សម្រាប់សុខភាពកុមារនៅកម្ពុជា។ ដូច្នេះលោកថា ការបើកយុទ្ធនាការផ្តល់វ៉ាក់សាំងការពារជំងឺមានសារៈសំខាន់ណាស់ក្នុងវិស័យសុខាភិបាល ដើម្បីការពារសុខភាព និងសុខុមាលភាពកុមារ ក្នុងសហគមន៍ដោយមិនគិតពីស្ថានភាពរស់នៅ និងលក្ខខណ្ឌសេដ្ឋកិច្ច។
លោកថ្លែងដោយប្រែសម្រួលជាភាសាខ្មែរថា៖ «អង្គការយូនីសេហ្វមានកិត្តិយសបានចូលរួមជាដៃគូយ៉ាងសំខាន់ជាមួយអង្គការសិទ្ធិមនុស្សពិភពលោក Gavi Chai និងការគាំទ្រឱ្យក្រសួងសុខាភិបាលប្រកបកិច្ចការអនុវត្ត និងរក្សាបាននូវយុទ្ធនាការផ្តល់វ៉ាក់សាំងនេះ ដែលមានគោលដៅលើកុមារប្រមាណ ១ លាន ៥ សែននាក់ នៅទូទាំងប្រទេស។ យើងរួមគ្នា មានចក្ខុវិស័យរួមគ្នាក្នុងការលុបបំបាត់ជំងឺកញ្រ្ជឹល និងស្អូច»។
លោកបន្តថា ក្នុងឆ្នាំ ២០២០ ជំងឺកញ្រ្ជឹលបានសម្លាប់កុមារប្រមាណជា ១៣ ម៉ឺន ៦ ពាន់នាក់នៅទូទាំងពិភពលោក។ ចំណែកឯនៅកម្ពុជាវិញ លោកថា ពីឆ្នាំ២០១៦ដល់ឆ្នាំ ២០២៤ ជំងឺកញ្រ្ជឹលកើតឡើងចំនួន ១.២១៥ ករណី ដែលជាការប្រឈមមួយចំពោះកុមារ។
លោកថ្លែងដោយប្រែសម្រួលជាភាសាខ្មែរថា៖ «យើងមានការព្រួយបារម្ភបំផុតក្នុងការផ្ទុះឡើងនៃជំងឺកញ្រ្ជឹលលក្ខណៈទ្រង់ទ្រាយធំ ដែលបង្កជាផលលំបាក និងសោកនាដកម្មលើកុមារ គ្រួសារ សហគមន៍ និងប្រទេសទាំងមូលផងដែរ។ ដើម្បីចូលរួមទប់ស្កាត់ជំងឺនេះ យើងចាំបាច់រួមគ្នាការពារកុមារ ដោយសូមអំពាវនាវឱ្យក្រុមគ្រួសារទាំងអស់នាំកុមារដែលមានអាយុចាប់ពី ៩ ខែ រហូតដល់ ៥៩ ខែ មកទទួលថ្នាំបង្ការជំងឺកញ្រ្ជឹល និងស្អូចគ្រប់ៗគ្នា»។
គួរបញ្ជាក់ថា កញ្ជ្រឹលជាជំងឺដែលងាយឆ្លងបំផុត។ អ្នកដែលឆ្លងជំងឺកញ្រ្ជឹលនឹងមានកន្តួលក្រហមលើខ្លួន បូករួមទាំងការហៀរសំបោរ ក្តៅខ្លួនខ្លាំងនិងក្អកជាដើម។ ជំងឺកញ្ជ្រឹលអាចបណ្តាលឱ្យរលាកសួត ហើយវាក៏អាចធ្វើឱ្យប៉ះពាល់ដល់ខួរក្បាល និងបណ្តាលឱ្យស្លាប់ ឬពិការអស់មួយជីវិត។ នេះបើតាមអ្នកជំនាញសុខាភិបាល៕