ភ្នំពេញ៖ ការអង្កេតដ៏ទូលំទូលាយមួយ ដែលផ្សព្វផ្សាយជាសាធារណៈនៅថ្ងៃសុក្រនេះ បង្ហាញថា ប្រជាពលរដ្ឋកម្ពុជាមានជំងឺបាក់ស្បាតខ្ពស់បំផុតធៀបនឹងប្រជាពលរដ្ឋក្នុងពិភពលោក។
របាយការណ៍នៃការអង្កេតដែលមានចំណងជើងថា «ការអង្កេតផ្លូវចិត្តនៃកម្ពុជា» ដែលធ្វើឡើងដោយដេប៉ាកតឺម៉ង់ចិត្តវិទ្យានៃសាកលវិទ្យាល័យភូមិន្ទភ្នំពេញ បញ្ជាក់ថា អត្រានៃជំងឺបាក់ស្បាតក្នុងចំណោមប្រជាពលរដ្ឋកម្ពុជាមានកម្រិតខ្ពស់ជាងប្រជាជាតិក្នុងពិភពលោកចំនួនប្រាំពីរដង។
លោកសាស្ដ្រាចារ្យខាន់ សារ៉េត អ្នកជំនាញផ្នែកចិត្តវិទ្យានៃសកលវិទ្យាល័យនេះ បានរៀបរាប់ក្នុងការបង្ហាញរបាយការណ៍ដោយប្រៀបធៀបជាមួយរបាយការណ៍របស់អង្គការសុខភាពពិភពលោក។
«ជំងឺបាក់ស្បាតយើងបានរកឃើញថា មាន២,៧ភាគរយ។ ហើយបើយើងប្រៀបធៀបជាមួយរបាយការណ៍អង្គការសុខភាពពិភពលោក យើងឃើញថា នៅលើពិភពលោកជំងឺបាក់ស្បាតក្នុងពិភពលោកមានតែចំនួន០,៤ភាគរយតែប៉ុណ្ណោះ គឺមានន័យថា ជំងឺបាក់ស្បាតនៅក្នុងប្រទេសយើងខ្ពស់ជាងគេរហូតដល់ទៅប្រាំពីរដង»។
លោកសាស្ដ្រាចារ្យខាន់ សារ៉េតពន្យល់ថា មូលហេតុនៃអត្រាខ្ពស់នៃជំងឺបាក់ស្បាតនេះដោយសារតែប្រជាជនកម្ពុជាបានឆ្លងកាត់នូវសង្គ្រាមដ៏រ៉ាំរ៉ៃនិងរបបខ្មែរក្រហមដែលបានសម្លាប់រង្គាលប្រជាពលរដ្ឋកម្ពុជាអស់ជិតពីរលាននាក់។
«កាលណាមានបញ្ហាផ្លូវចិត្តជា ទូទៅវាប៉ះពាល់ដល់សេដ្ឋកិច្ចគ្រួសារក៏ដូចជាសេដ្ឋកិច្ចសង្គមទាំងមូលដែរសម្រាប់ការអភិវឌ្ឍ»។
ការអង្កេតលើបញ្ហាផ្លូវចិត្តនេះធ្វើឡើងដោយមានការសាកសួរលើប្រជាពលរដ្ឋចំនួន២៦៩០នាក់នៅក្នុងខេត្តនិង ចំនួន៩ក្នុងរាជធានីភ្នំពេញ។ ការអង្កេតបានផ្តោតលើការប៉ះទង្គិចផ្លូវចិត្ត អំពើហិង្សា ការញៀនស្រានិងគ្រឿងញៀនជាដើម ការបាក់ស្បាត ការធ្លាក់ទឹកចិត្ត ការថប់អារម្មណ៍ ទំនោរធ្វើអត្តឃាត បញ្ហារបស់កុមារទៅកាន់សាលារៀន អត្តចរិតបំពានឬagressiveនិងការស្វែងរកជំនួយព្យាបាលជាដើម។
ការអង្កេតបង្ហាញទៀតថា ទំនោរទៅរកការធ្វើអត្តឃាតមានរហូតដល់៤២,៣៥ភាគរយធៀបជាមួយនឹងចំនួនមនុស្ស១០០០០០នាក់គឺលើសពីពីរដង បើធៀបនឹងអត្រាដែលរកឃើញដោយអង្គការសុខភាពពិភពលោកដែលមានចំនួនត្រឹមតែ១៦ភាគរយលើចំនួនមនុស្សដូចគ្នានោះ។
របាយការណ៍ដដែលបង្ហាញថា ប្រជាពលរដ្ឋនៅក្នុងខាងក្រុមមនុស្សលើនេះមានសញ្ញានៃរោគផ្លូវចិត្តធ្ងន់ធ្ងរ។
របាយការណ៍បន្ថែមថា ភាពក្រីក្របានជំរុញឲ្យមានការធ្វើអត្តឃាត បង្កឲ្យមានជំងឺធ្លាក់ទឹកចិត្តនិងជំងឺថប់អារម្មណ៍កម្រិតខ្ពស់។ ម្យ៉ាងវិញទៀតភាគច្រើនលើសលប់នៃប្រជាពលរដ្ឋ ដែលត្រូវបានជួបសម្ភាស បានស្វែងរកមណ្ឌលសុខភាព នៅពេលដែលពួកគេមានបញ្ហាផ្លូវចិត្ត។ ប៉ុន្តែក្នុងចំណោមពួកគេ មានមនុស្សមួយចំនួនក៏បានស្វែងរកជំនួយពីគ្រូបុរាណខ្មែរផងដែរ។
ក្រុមអ្នកធ្វើការអង្កេតក្នុងរបាយការណ៍នេះបានស្នើឲ្យមានការយកចិត្តទុកដាក់សម្រាប់សេវាកម្មលើរោគផ្លូវចិត្តនេះ ទាំងសម្រាប់កុមារនិងមនុស្សពេញវ័យ។
នៅប្រទេសកម្ពុជា មានមណ្ឌលសេវាកម្មព្យាបាលបញ្ហាផ្លូវចិត្តត្រឹមតែប្រាំបួនប៉ុណ្ណោះក្នុងចំណោម២៤ខេត្តក្រុងនិងរាជធានី។
លោកស្រីអ៊ុម រ៉ាវី សាកលវិទ្យាធិការរងនៃសាកលវិទ្យាល័យភូមិន្ទភ្នំពេញលើកឡើងថា បញ្ហាផ្លូវចិត្តអាចនាំឲ្យបុគ្គលប្រព្រឹត្តបទឧក្រិដ្ឋ។
«ជួនកាលបុគ្គល ដែលមានបញ្ហាផ្លូវចិត្ត អាចឈានដល់ការប្រព្រឹត្តបទឧក្រិដ្ឋនានា និងករណីខ្លះអាចឈានដល់ការសម្លាប់ខ្លួនទៀតផង»។
ដោយឡែកលោកវេជ្ជបណ្ឌិតសាផុន វន្ថាណាក់ សាកលវិទ្យាធិការនៃសាកលវិទ្យាល័យវិទ្យាសាស្ដ្រសុខាភិបាល កត់សម្គាល់ថា របាយការណ៍នៃការអង្កេតនេះគឺជាការចែករំលែកនូវចំណោះដឹងមួយ៕