ភ្នំពេញ៖ លោកមឿង សុន ដែលជាប្រធានមូលនិធិទ្រទ្រង់អរីយធម៌ខ្មែរ បានក្លាយជាអ្នកទោសទីពីរបន្ទាប់ពីលោកសម រង្ស៊ី ដែលជាមេដឹកនាំគណបក្សសង្គ្រោះជាតិ ត្រូវបានរដ្ឋាភិបាលមិនយល់ព្រមធ្វើអន្តរាគមន៍ឲ្យចូលកម្ពុជាដើម្បីគោរពព្រះបរមសពសម្តេចឪនរោត្តម សីហនុ។
សម្តេចឪនរោត្តម សីហនុ បានសោយព្រះទិវង្គត កាលពីថ្ងៃទី១៥ ខែតុលា នៅក្រុងប៉េកាំងក្នុងព្រះជន្ម៩០ព្រះវស្សាដោយសារជំងឺគាំងប៉េះដូង។
ព្រះបរមសពសម្តេចឪត្រូវបានដឹកតាមយន្តហោះពីប្រទេសចិនមកតម្កល់ទុកក្នុងព្រះបរុមរាជវាំងរយៈពេលបីខែដើម្បីឲ្យប្រជានុរាស្ត្របានមកគោរពវិញ្ញាណក្ខន្ឋព្រះបរមសពរបស់ព្រះអង្គ។
ខណៈដែលកម្ពុជាកំពុងកាន់មរណៈទុក្ខដ៏ក្រៀមក្រំនេះមានមេដឹកនាំពីរដែលប្រឆាំងរដ្ឋាភិបាលគឺលោកសម រង្ស៊ី ដែលជាប្រធានគណបក្សសង្គ្រោះជាតិនិងលោកមឿង សុនត្រូវបានរដ្ឋាភិបាលកាត់ទោសឲ្យជាប់ពន្ឋនាគាររយៈពេលពីរឆ្នាំដូចគ្នានោះ បានសរសេរលិខិតថ្វាយព្រះមហាក្សត្រ និងលោកនាយករដ្ឋមន្ត្រីហ៊ុន សែនដើម្បីឲ្យបានមកគោរពព្រះបរមសពសម្តេចឪ។ លិខិតទាំងពីរនេះត្រូវបានព្រះរាជខុទ្ទកាល័យព្រះបរមរាជវាំងនិងខុទ្ទកាល័យលោកនាយករដ្ឋមន្ត្រីហ៊ុន សែនបដិសដដួចគ្នា។
លោកមឿង សុន ដែលជាប្រធានមូលនិធិទ្រទ្រង់អរីយធម៌ខ្មែរត្រូវបានតុលាការកំពូលកាលពីថ្ងៃទី២៤ ខែឧសភា តម្កល់សាលដិការបស់សាលាឧទ្ធរណ៍ និងតុលាការក្រុងភ្នំពេញឲ្យជាប់ពន្ឋនាគាររយៈពេលពីរឆ្នាំ និងពិន័យជាប្រាក់ចំនួន៤លានរៀលគឺប្រមាណ១.០០០ដុល្លារសហរដ្ឋអាមេរិកពីបទញុះញង់ និងការអត្ថាធិប្បាយរបស់លោកអំពីការដាក់តាំងអំពូលភ្លើងអគ្គិសនីនៅប្រាសាទអង្គរវត្ត។
មុនពេលតុលាការកាត់ទោស លោកមឿង សុនបានរៀបចំសន្និសីទព័ត៌មានមួយនៅក្នុទីក្រុងភ្នំពេញដោយជំទាស់នឹងក្រុមហ៊ុនចិនមួយដែលបានទទួលសិទ្ឋិដាក់តាំងអំពូលភ្លើងអគ្គិសនីនាពេលរាត្រីថាបានធ្វើឲ្យខូចខាតដល់ថ្មអង្គរវត្តដែលមានវ័យចំណាស់រាប់រយឆ្នាំ។
នៅក្នុងលិខិតរបស់លោកមឿង សុន ដែលបានសរសេរថ្វាយព្រះមហាក្សត្រ និងលោកនាយករដ្ឋន្ត្រីហ៊ុន សែន លោកបានធ្វើការសុំទោស និងស្នើព្រះករុណាប្រទានការលើលែងទោសដល់ប្រជាពលរដ្ឋមួយចំនួនដែលតុលាការផ្តន្ទាទោស ដើម្បីបានឱកាសចូលមកគោរពព្រះបរមសពសម្តេចឪ។
មានប្រសាសន៏ប្រាប់វីអូអេតាមទូរសព្ទពីប្រទេសថៃនៅថ្ងៃអង្គារនេះ លោកមឿង សុនមិនបានបោះបង់ការព្យាយាមរបស់លោកទេ។ លោកបាននិយាយថា លោកនៅបន្តធ្វើលិខិតបន្ថែមទៀតជូនលោកនាយករដ្ឋមន្ត្រីហ៊ុន សែនដើម្បីឲ្យលោកបានមកគោរពព្រះបរមសព។ លោកមានប្រសាសន៍ថា ព្រះមហាវរៈក្សត្រធ្លាប់បានប្រទានថវិកាចំនួន៣.០០០ដុល្លារដើម្បីឲ្យលោកសងសង់មណ្ឌលសុខភាពសង្គ្រោះមួយក្បែរប្រាសាទព្រះវិហារ។ គោលបំណងដែលលោកមកគោរពព្រះបរមសពនេះគឺដើម្បីតបស្នងសងព្រះគុណដល់ព្រះអង្គ និងមានឱកាសទៅកសាងមណ្ឌលសុខភាពតាមព្រះរាជតម្រិះរបស់សម្តេចឪ។
«ជួយកសាងនៅមណ្ឌលសុខភាពសង្គ្រោះនៅខេត្តព្រះវិហារពីព្រោះអង្កការខ្ញុំបានគម្រោងធ្វើមន្ទីរពេទ្យហ្នឹងដើម្បីទុកអនុស្សាវរីយ៍ថ្វាយព្រះអង្គដែលលោកបានទាមទារយកប្រាសាទព្រះវិហារយកមកវិញហ្នឹង»។
លោកបណ្ឌិត ឡៅ ម៉ុងហៃអ្នកវិភាគឯករាជមួយរូបបាននិយាយថា អ្នកដែលរដ្ឋាភិបាលយល់ថា ជាអ្នកប្រឆាំងនឹងមិនមានការអត់ឱនអ្វីទាំងអស់គឺចាប់តាំងពីការដាក់ទណ្ឌកម្មរហូតចាប់ដាក់ពន្ឋនាគារគឺរដ្ឋាភិបាលរិតបណ្តឹងតែម្តង។ លោកមានប្រសាសន៍ថា រឿងដែលរដ្ឋាភិបាលជំទាស់មិនឲ្យអ្នកដែលធ្លាប់ប្រឆាំងខ្លួនមកគោរពព្រះបរមសពសម្តេចឪគឺរដ្ឋាភិបាលចង់ព្យាបាទពួកគេតែម្តង។
«អ្នកណាក៏ដោយឲ្យតែគេយល់ថា ប្រឆាំងគឺគេចាត់ទុកថាជាខ្មាំងសត្រូវតែម្តងហើយជាន់ឲ្យជាប់លែងងើបរួច។ ដូច្នេះបើលោកសម រង្ស៊ីអត់ឲ្យ លោកមឿង សុនក៏អត់ឲ្យដែរ»។
លោក ផៃ ស៊ីផានអ្នកនាំពាក្យនៃទីស្តីការគណៈរដ្ឋមន្ត្រីនៅតែប្រកាន់ជំហរថា ករណីលោកសម រង្ស៊ី និងលោកមឿង សុន ជាករណីរបស់តុលាការ។
លោកបាននិយាយថា ការរិះគន់របស់អ្នកវិភាគអាស្រ័យតាមតែការនឹកឃើញរបស់ពួកគេតែប៉ុណ្ណោះ។
«សុំឲ្យសង្គមស៊ីវិលមើលលើច្បាប់នីតិរដ្ឋទៅវិញ។ មើលទៅយន្តការដោះស្រាយបន្ឋូរបន្ថយឬលើកលែងទោសដែលមានជាយូរយារណាស់មកហើយ ដែលគេកំពុងអនុវត្តន៍»។
បន្ទាប់ពីមានការរិះគន់របស់លោកមឿង សុនអំពីការដាក់តាំងអំពូលភ្លើងអគ្គិសនីបានធ្វើឲ្យប៉ះពាល់ដល់ថ្មរបស់ប្រសាទអង្គរវត្ត រដ្ឋាភិបាលបានសម្រេចដកការដាក់តាំងអំពូលភ្លើងចេញពីបា្រសាទអង្គរវត្ត។ តែលោកផៃ ស៊ីផានបាននិយាយថា ការសម្រេចដោះអំពូលភ្លើងចេញពីបរិវេណប្រាសាទអង្គរវត្តមិនមែនមានន័យថារដ្ឋាភិបាលយកគំនិតរបស់លោកមឿង សុនទេ តែដោយសារក្រមហ៊ុនចិនផុតកំណត់កិច្ចសន្យាជាមួយរដ្ឋាភិបាល៕