កងកម្លាំងសន្តិសុខសាលារាជធានីភ្នំពេញនិងក្រុមអ្នកតវ៉ាដែលជាអតីតអ្នកធ្លាប់រស់នៅតំបន់បឹងកក់បានប៉ះទង្គិចគ្នាមួយរយៈខ្លីនៅថ្ងៃព្រហស្បតិ៍នេះដោយបានបណ្ដាលឱ្យអ្នកតវ៉ាម្នាក់រងរបួសស្រាលនៅក្នុងការតវ៉ាទាមទារឱ្យមានសំណងបន្ថែម។
លោកស្រី ស៊ា ណារ៉េត តំណាងពលរដ្ឋអ្នកអតីតតំបន់បឹងកក់បានប្រាប់វីអូអេថា៖
«ពួកខ្ញុំតវ៉ានេះគឺទាមទារសំណងបន្ថែមដើម្បីឱ្យពួកខ្ញុំមានជម្រករស់នៅសមរម្យ។ ពេលពួកខ្ញុំចាកចេញទៅមានសំណងបន្តិចបន្តួចធ្វើឱ្យខ្ញុំទិញផ្ទះមិនបាននៅដើរជួលផ្ទះគេ។ ហើយពួកគេទទួលគោលនយោបាយយកផ្ទះនៅ បូរីសន្តិភាព២គឺផ្ទះសំណង់មិនមានគុណភាពទេហើយទឹកលិចហូរចូលច្រមុះពេលភ្លៀងមកគាត់អង្គុយត្របោមក្បាលជង្គង់អត់សម្រាន្តបានហើយទឹកលិចពេញផ្ទះ»។
មានក្រុមអ្នកអតីតតំបន់បឹងកក់ជិត១០០នាក់បានមកតវ៉ាតាំងពីព្រឹកនៅមុខសាលារាជធានីភ្នំពេញដោយទាមទារឱ្យអាជ្ញាធរប្រគល់ផ្ទះមួយល្វែងក្នុងមួយគ្រួសារនៅតំបន់បឹងកក់វិញហើយសម្រាប់អ្នកដែលបានទទួលផ្ទះរួចហើយគឺចង់បានសំណងបន្ថែមជាប្រាក់ចំនួន២ម៉ឺនដុល្លារសហរដ្ឋអាមេរិកសម្រាប់ដោះបំណុលដោយសារតែមិនមានការងារធ្វើបន្ទាប់ពីត្រូវជម្លៀសទៅនៅកន្លែងថ្មី។
អតីតអ្នកធ្លាប់រស់នៅតំបន់បឹងកក់ធ្វើការតវ៉ានៅមុខសាលារាជធានីភ្នំពេញកាលពីថ្ងៃព្រហស្បតិ៍ទី៧ ខែឧសភា ឆ្នាំ២០១៥។ (រូបថតផ្តល់ឲ្យ)
លោក អំ សំអាត ប្រធានបច្ចេកទេសស៊ើបអង្កេតនៃសមាគមសិទ្ធិមនុស្សលីកាដូបានបញ្ជាក់ថា៖
«នេះជាទិដ្ឋភាពមួយដែលយើងគិតថាមិនសក្ដិសមហើយក៏មិនអាចទទួលយកបានដែរពីព្រោះរឿងអ្វីក៏ដោយគឺយើងត្រូវជជែកគ្នាធ្វើម៉េចឱ្យគាត់រក្សារបៀបរៀបរយសណ្តាប់ធ្នាប់ដោយខ្លួនគាត់ទៅ ហើយយើងកុំប្រើវិធានការរបៀបជាហិង្សា។ ក៏ប៉ុន្តែខ្ញុំគិតថានេះ គឺជាទម្លាប់ពីមុនមករបស់កម្លាំងសន្តិសុខឬក៏ប្រជាការពារ។ បុគ្គលខ្លះគាត់នៅតែប្រើទម្លាប់នេះអញ្ចឹងយើងគួរថាបោះចោលទម្លាប់នេះទៅ ហើយយើងដោះស្រាយដោយសន្តិវិធី កុំឱ្យមានការចោទប្រកាន់ពីរឿងប្រើប្រាស់ហិង្សាឬក៏រំលោភទៅលើសិទ្ធិរបស់ពួកគាត់ជាបន្តទៀត»។
មន្ត្រីអ្នកនាំពាក្យសាលាក្រុងបានអះអាងថាការដែលក្រុមសន្តិសុខរុញច្រានក្រុមអ្នកតវ៉ាចេញដោយសារតែពួកគាត់បិទច្រកចេញចូលសាលាក្រុងតែប៉ុណ្ណោះប៉ុន្តែលោកមិនបាននិយាយពីការដោះស្រាយអ្វីនៅឡើយទេ។
តំបន់បឹងកក់ត្រូវបានអាជ្ញាធរប្រគល់ឱ្យក្រុមហ៊ុនលោកឧកញ៉ា ឡៅ ម៉េងឃីន សមាជិកព្រឹទ្ធសភាខាងគណបក្សកាន់អំណាចធ្វើការអភិវឌ្ឍន៍ជាសំណង់ផ្ទះល្វែងនិងផ្សារទំនើប៕