ព្រះរាជពិធីបុណ្យអុំទូកបានចាប់ផ្តើមនៅថ្ងៃនេះ ដោយគ្មានការប្រណាំងទូកនៅមុខព្រះបរមរាជវាំងនោះទេ ហើយប្រជាពលរដ្ឋខ្មែរសម្តែងក្តីបារម្ភចំពោះការសាបរលាបនៃពិធីបុណ្យប្រពៃណីជាតិមួយនេះ។
អវត្តមាននៃការប្រណាំងទូកនៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកនេះគឺជាលើកទីបួនហើយនៅក្នុងរយៈពេលប្រាំឆ្នាំចុងក្រោយនេះ គិតចាប់តាំងពីឆ្នាំ២០១១មក។
អ្នកស្រី គឹម ស៊ាំង ជាកម្មការិនីរោងចក្រមកពីខេត្តកំពង់ចាម ដែលបានមកដើរកំសាន្តនៅក្នុងពិធីបុណ្យនេះ ថ្លែងប្រាប់VOA ថា អវត្តមាននៃការប្រណាំងទូកជាញឹកញាប់នឹងអាចធ្វើឲ្យសាបរលាបនៃប្រពៃណីដ៏យូរលង់មួយនេះ។
«អានេះ អារម្មណ៍ខ្ញុំ តែអារម្មណ៍គេ ខ្ញុំមិនដឹង អារម្មណ៍ខ្ញុំវាប្លែកដែរ ព្រោះអីវាធ្លាប់ធ្វើរាល់ឆ្នាំ ដល់ពេលមិនធ្វើអញ្ចឹងវាដូចជាប្រពៃណីយើងវាបាត់ម្តងបន្តិច ម្តងបន្តិចអញ្ចឹង ព្រោះអីប្រពៃណីយើងហ្នឹងតាំងពីបុព្វបុរសយើងមក គាត់ធ្វើអញ្ចឹងដល់ពេលយើងមកបំបាត់អីខ្លះអញ្ចឹង ដូចថាវាប្លែកម្យ៉ាងដែរ»។
រីឯលោក ជីម ម៉ុងហួត អ្នកលក់ដូរនៅក្នុងកោះពេជ្រ និយាយថា លោកមានការអាក់អន់ចិត្តចំពោះអវត្តមាននៃការប្រណាំងទូកនេះ ដោយហេតុតែការណ៍នេះធ្វើឲ្យការលក់ដូររបស់លោកធា្លក់ចុះ៤០ភាគរយ ហើយអាចនឹងប៉ះពាល់ដល់ប្រពៃណីដែលបន្សល់ទុកដោយបុព្វបុរសខ្មែរតាំងពីសម័យអង្គរមកនោះ។
«អន់ចិត្តដែរ តែជួនកាល ខ្លាចគាត់មានផ្ទៃក្នុងគាត់ ខ្ញុំអត់សូវដឹងបញ្ហារឿងរដ្ឋាភិបាលដែរ»។
ពិធីបុណ្យអុំទូក ត្រូវបានផ្អាកនៅឆ្នាំ២០១១ ក្រោយពីព្រឹត្តិការណ៍ជាន់គ្នាស្លាប់អ្នកដើរកម្សាន្តជាង៣៥០នាក់នៅលើស្ពានកោះពេជ្រកាលពីមួយឆ្នាំមុន។ នៅឆ្នាំ២០១២ ក្រោយពីការសោយទិវង្គតរបស់ព្រះបរមរតនៈកោដ្ឋសម្ដេចព្រះបាទនរោត្តមសីហនុនៅឆ្នាំ២០១៣ ក្រោយពីការបោះឆ្នោតជាតិនៅខែកក្កដា។
រដ្ឋាភិបាលកម្ពុជាបានរៀបចំពិធីបុណ្យអុំទូកនៅមុខព្រះបរមរាជវាំងសារជាថ្មី នៅឆ្នាំ២០១៤ ក្រោយពេលដែលគណបក្សគ្រប់គ្រងប្រទេស និងគណបក្សប្រឆាំងចុះកិច្ចព្រមព្រៀងបញ្ចប់ការជាប់គាំងនយោបាយអស់រយៈពេលជិតមួយឆ្នាំ។ កិច្ចព្រមព្រៀងនោះ ក៏បានបញ្ចប់ការធ្វើបាតុកម្មជាទ្រង់ទ្រាយធំដែលមិនធ្លាប់មានក្រោយការប្រកាសលទ្ធផលឆ្នាំ២០១៣ផងដែរ។
ក៏ប៉ុន្តែ ការផ្អាកពិធីបុណ្យអុំទូកនៅមុខព្រះបរមរាជវាំងនៅក្នុងឆ្នាំ២០១៥នេះ ត្រូវអ្នកតាមដានស្ថានការណ៍នយោបាយ នៅក្នុងប្រទេសកម្ពុជាយល់ថា ជាការផ្អាកមួយដែលជាប់ពាក់ព័ន្ធនឹងរឿងនយោបាយ ក្រោយការផ្ទុះអំពើហិង្សាវាយដំអ្នកតំណាងរាស្ត្របក្សប្រឆាំង និងការបោះឆ្នោតទម្លាក់អនុប្រធានបក្សប្រឆាំងចេញពីកៅអីអនុប្រធានសភាជាតិ។
យ៉ាងណាក៏ដោយ លោក គួច ចំរើន អភិបាលខណ្ឌដូនពេញ ថ្លែងប្រាប់ VOA នៅមុខព្រះបរមរាជវាំងនៅរសៀលថ្ងៃអង្គារនេះថា ការផ្អាកនេះមិនមានការជាប់ពាក់ព័ន្ធនឹងការបារម្ភអំពីការផ្ទុះឡើងនៃសកម្មភាពបាតុកម្មនោះទេ ដោយលោកបានបញ្ជាក់ថា កម្រិតទឹកទន្លេទាបពេកគឺជាហេតុផលនៃការផ្អាកការប្រណាំងទូកនៅក្នុងពិធីបុណ្យអុំទូកនៅឆ្នាំនេះ។
«ការគិតគូរបស់អាជ្ញាធរ អត់ដែលបានមានការព្រួយបារម្ភក្នុងរឿងនេះទេ ព្រោះនៅរាជធានីភ្នំពេញ វាជាទម្លាប់ទៅហើយ បើគេចង់ធ្វើគេត្រូវតែអនុវត្តទៅតាមនីតិវិធី របស់ច្បាប់ គេត្រូវសុំ ប៉ុន្តែខ្ញុំមិនជឿថា គេនឹងអគតិរហូតដល់ទៅយកពេលវេលានៃព្រះរាជពិធីបុណ្យទៅធ្វើបាតុកម្ម ដោយមិនគិតពីភាពសុខសាន្ត ភាពសប្បាយរីករាយរបស់ប្រជាពលរដ្ឋនោះដែរទេ។ ខ្ញុំក៏មិនជឿថា គេល្ងង់ខ្លៅដល់កម្រិតហ្នឹងដែរ»។
នៅក្នុងសេចក្តីជូនដំណឹងរបស់សាលារាជធានីភ្នំពេញ ចុះថ្ងៃទី២៤ ខែវិច្ឆិកានេះ បានឲ្យដឹងថា បើទោះជាមិនមានការប្រណាំងទូកក្តី ការអុជកាំជ្រួចអបអរពិធីបុណ្យដែលនឹងបញ្ចប់ទៅនៅថ្ងៃទី២៦ ខែវិច្ឆិកា នឹងធ្វើឡើងដដែលនៅមុខព្រះបរមរាជវាំង។ សាលាក្រុងបានស្នើឲ្យប្រជាពលរដ្ឋដែលធ្វើដំណើរតាមផ្លូវទឹក ពិសេសម្ចាស់ទូកនេសាទ ទូកកាណូតទេសចរណ៍ និងមធ្យោបាយធ្វើដំណើរតាមផ្លូវទឹកគ្រប់ប្រភេទ ផ្អាកសកម្មភាពឆ្លងកាត់ មុននឹងក្រោយពេលអុជកាំជ្រួចរយៈពេលមួយម៉ោង។
ដោយឡែក ប្រជាពលរដ្ឋបានទៅប្រមូលផ្តុំនៅមុខព្រះបរមរាជវាំងនៅថ្ងៃដំបូងនៃការប្រារព្វពិធីនេះ។ ពួកគេមិនបានឃើញការប្រណាំងទូកឡើយ ហើយបានត្រឹមតែមើលសកម្មភាពទូកកាណូតបើកទៅមកក្នុងដងទន្លេសាបប៉ុណ្ណោះ៕