ភ្នំពេញ៖ កិច្ចប្រជុំកំពូលអាស៊ានបានចាប់ផ្តើមហើយនៅថ្ងៃអាទិត្យនេះដោយមានការចូលរួមពីលោកនាយករដ្ឋមន្ត្រីហ៊ុនសែន នៃប្រទេសកម្ពុជាដែលជាប្រធានដឹកនាំកិច្ចប្រជុំប្រមុខរដ្ឋនៃប្រទេស
អាស៊ានទាំង១០។
កិច្ចប្រជុំកំពូលអាស៊ានបានរៀបចំឡើងក្រោមការពារសន្តិសុខយ៉ាងមាំទាំនៅជុំវិញបរិវេណអគារទីស្តីការគណរដ្ឋមន្ត្រីជាទីកន្លែងដែលនាយករដ្ឋមន្ត្រីអាស៊ានជួបប្រជុំគ្នា។
លោកនាយករដ្ឋមន្ត្រីហ៊ុនសែនបានថ្លែងបើកកិច្ចប្រជុំថាការរក្សាសន្តិភាពនិងសន្តិសុខក្នុងតំបន់គឺពិតជាមានសារៈសំខាន់ខ្លាំងណាស់សម្រាប់វិបុលភាពនិងកំណើននៅក្នុងតំបន់អាស៊ានទាំងមូល។
លោកបានមានប្រសាសន៍ថាអាស៊ានត្រូវពង្រឹងតួរនាទីនិងសមត្ថភាពរបស់ខ្លួនថែមទៀតដើម្បីលើកកម្ពស់ការពិភាក្សានិងជំរុញកិច្ចសហការជាមួយដៃគូសន្ទនាអាស៊ានសំដៅដោះស្រាយបញ្ហាពាក់ព័ន្ធនិងសន្តិភាពនិងសន្តិសុខក្នុងតំបន់។
លោកហ៊ុន សែនបានបញ្ជាក់ទៀតថាដើម្បីសម្រេចគោលដៅនេះអាស៊ានត្រូវបង្កើនសមត្ថភាពចូលរួមរបស់ខ្លួនជាមួយនឹងសហគមន៍អន្តរជាតិជាពិសេសគឺជាមួយនឹងប្រព័ន្ធនៃអង្គការសហប្រជាជាតិនិងបណ្តាប្រទេសដែលមានឧស្សាហកម្មលូតលាស់។
«កិច្ចប្រជុំនៅពេលនេះមិនត្រឹមតែផ្តល់ឱកាសឱ្យយើងទាំងអស់គ្នាអាចបូកសរុបការងារក្នុងពេលកន្លងមកប៉ុណ្ណោះទេក៏ប៉ុន្តែថែមទាំងផ្តល់ឱកាសឱ្យយើងអាចទាញរកដំណោះស្រាយសមស្របក្នុងទិសដៅបង្កើនល្បឿននៃការកសាងសហគមន៍»។
នៅក្នុងកម្រិតសាកល លោកនាយករដ្ឋមន្ត្រី ហ៊ុន សែន បានបញ្ជាក់ថាអាស៊ានត្រូវបន្តជួបប្រឈមនឹងបញ្ហាចម្បងៗមួយចំនួន រួមមាន៖ ដូចជា ភាពផុយស្រួល នៃការងើបឡើងវិញនៃសេដ្ឋកិច្ចរបស់ប្រទេសអភិវឌ្ឍន៍ គួបផ្សំនឹងការអូសបន្លាយនៃវិបត្តិបំណុលនៅតំបន់អឺរ៉ុបនិងលទ្ធភាពនៃការកើតឡើងនូវវិបត្តិសារពើពន្ធនៅសហរដ្ឋអាមេរិកព្រមទាំងការថមថយចុះនៃកំណើននៅអាស៊ី វិបត្តិនយោបាយនិងសង្គមដែលកំពុងបន្តកើតមាននៅមជ្ឈិមបូព៌ានិងអាហ្វ្រិកខាងជើងបញ្ហាតម្លៃប្រេងកើនខ្ពស់បញ្ហាសន្តិសុខស្បៀងអាហារនិងថាមពល ការប្រែប្រួលអាកាសធាតុ គ្រោះមហន្តរាយធម្មជាតិ ភេរវកម្ម និងឧក្រិដ្ឋកម្មឆ្លងដែន ជាដើម។
លោកសុរិន ពិតសុវ៉ាន់ អគ្គលេខាធិការអាស៊ានបានថ្លែងប្រាប់ក្នុងសន្និសីទកាសែតបន្ទាប់ពីកិច្ចប្រជុំថាសមាជិកអាស៊ានបានសម្តែងនូវការអបអរសារទរចំពោះការរីកចម្រើនក្នុងរយៈពេលប៉ុន្មានឆ្នាំមកនេះ។
លោកបាននិយាយថាអាស៊ានបានពេញចិត្តចំពោះតួនាទីរបស់ខ្លួនក្នុងឆាកអន្តរជាតិជាពិសេសទំនាក់ទំនងការបរទេស នយោបាយនិងសន្តិសុខ។
លោកបានអះអាងទៀតថាកិច្ចប្រជុំក៏បានពិភាក្សាពីស្ថានភាពនៅក្នុងតំបន់អន្តរជាតិដែលមានផលប៉ះពាល់ទៅលើលទ្ធភាពដល់សមាជិកអាស៊ាន។
«យើងបានកត់សម្គាល់នូវការណ៍ពិតថានៅក្នុងទំនាក់ទំនងការបរទេសក្នុងផ្នែកសន្តិសុខនិងនយោបាយ។ អាស៊ានបានពង្រឹងនៅតួនាទីរបស់ខ្លួនកាន់តែខ្លាំងជាងមុននៅក្នុងរចនាសម្ព័ននៃកិច្ចសហប្រតិបត្តិការអន្តរជាតិ»។
ប្រទេសកម្ពុជាបានរៀបចំកិច្ចប្រជុំអាស៊ានចាប់ពីថ្ងៃទី១៥រហូតដល់ថ្ងៃទី២០ខែវិច្ឆិកាខាងមុខនេះ។លោកប្រធានាធិបតីសហរដ្ឋអាមេរិក បារ៉ាក់ អូបាម៉ាគ្រោងនឹងមកចូលរួមប្រជុំកំពូលរវាងសហរដ្ឋអាមេរិកនិងអាស៊ាននៅថ្ងៃច័ន្ទស្អែកនេះ។
បើតាមកម្មវិធីដូចបានគ្រោងទុកលោកនាយករដ្ឋមន្ត្រីហ៊ុន សែន និង មានជំនួបទ្វេភាគីដាច់ដោយឡែកមួយជាមួយលោកប្រធានាធិបតីបារ៉ាក់ អូបាម៉ា៕