ក្រុមមន្ដ្រីការបរទេសអាស៊ានបានចាប់ផ្តើមជជែកគ្នាអំពីបញ្ហាសមុទ្រចិនខាងត្បូងនៅថ្ងៃសៅរ៍នេះ ប៉ុន្តែមិនមានសេចក្ដីសម្រេចណាមួយលើបញ្ហានេះទេ។ នេះបើយោងតាមក្រុមមន្ដ្រីជាន់ខ្ពស់នៃកិច្ចប្រជុំ។
លោកកៅ គឹមហួន រដ្ឋលេខាធិការក្រសួងការបរទេសកម្ពុជាមានប្រសាសន៍ក្នុងសន្និសីទកាសែតនៅល្ងាចថ្ងៃសៅរ៍នេះថាបញ្ហាសមុទ្រចិនខាងត្បូងគឺជារបៀបវារៈមួយដែលក្រុមរដ្ឋមន្ដ្រីការបរទេសអាស៊ានបានពិភាក្សាជាពិសេសកិច្ចពិភាក្សាលើសេចក្ដីប្រកាសក្រមប្រតិបត្តិ(DOC) និងការតាក់តែងក្រមប្រតិបត្តិរួម(COC)។
«ពិតហើយការពិភាក្សាបានផ្តោតលើថាតើត្រូវធានាដល់ការអនុវត្តពេញលេញនិងមានប្រសិទ្ធភាពសេចក្តីប្រកាសនៃក្រមប្រតិបត្តិដូចម្តេច ហើយថាតើត្រូវការពារអនុសារណៈនៃកិច្ចពិភាក្សានិងការពិគ្រោះយោបល់»។
លោកស៊ូរិន ពិតស៊ូវ៉ាន់ អគ្គលេខាធិការអាស៊ានជិតផុតអាណត្តិបញ្ជាក់ក្នុងសន្និសីទកាសែតដោយឡែកមួយទៀតថាក្រមប្រតិបត្តិស្តីពីជម្លោះសមុទ្រចិនខាងត្បូងកំពុងដំណើរការទៅមុខប៉ុន្តែទាំងលោកកៅ គឹមហួន ទាំងលោកពិតស៊ូវ៉ាន់មិនអាចដឹងបាននៅឡើយថាក្រមប្រតិបត្តិនេះអាចនឹងត្រូវអនុម័តបាននៅពេលណា។
មានប្រទេសសមាជិកអាស៊ានចំនួនបួនដែលស្ថិតក្នុងជម្លោះដែនដីក្នុងដែនសមុទ្រចិនខាងត្បូងជាមួយនឹងប្រទេសចិន ក្នុងនោះមានប្រទេសវៀតណាម ហ្វីលីពីន ម៉ាឡេស៊ី និង ប្រ៊ុយណេ។
បញ្ហានេះបានធ្វើឲ្យប្រទេសកម្ពុជាដែលជាប្រធានប្តូរវេនរបស់អាស៊ានខកខានក្នុងការធ្វើសេចក្តីថ្លែងការណ៍រួមកាលពីកិច្ចប្រជុំថ្មីៗនេះ។
លោក ស៊ូរិន ពិតស៊ូវ៉ាន់ បញ្ជាក់ថាប្រទេសឥណ្ឌូនេស៊ីបានស្នើឲ្យមានការភ្ជាប់ខ្សែទូរស័ព្ទហតឡាញ មួយរវាងប្រទេសអាស៊ានស្តីពីសមុទ្រចិនខាងត្បូងនេះដើម្បីជូនដំណឹងឲ្យគ្នាទៅវិញទៅមកឲ្យទាន់ពេលវេលានិងចាត់វិធានការភ្លាមប្រសិនបើមានឧបទ្ទវហេតុណាមួយកើតឡើងជុំវិញបញ្ហាជម្លោះ
នេះ។
រដ្ឋមន្ដ្រីការបរទេសអាស៊ានបានបញ្ចប់កិច្ចប្រជុំរបស់ខ្លួននៅថ្ងៃនេះដោយបានបញ្ចប់ការពិភាក្សាលើ
កិច្ចប្រជុំរដ្ឋមន្ដ្រីការបរទេសអាស៊ាន កិច្ចប្រជុំក្រុមប្រឹក្សានយោបាយសន្តិសុខ និងកិច្ចប្រជុំក្រុមប្រឹក្សាសម្របសម្រួលអាស៊ាន។
អាស៊ានបានដាក់គោលដៅថានឹងបង្កើតសហគមន៍តែមួយនៅឆ្នាំ២០១៥ខាងមុខដែលនឹងអនុញ្ញាតឲ្យមានការប្តូរសេដ្ឋកិច្ចដោយសេរី។ សហគមន៍នេះមានប្រជាជាតិចំនួនជាង៦០០លាននាក់។
លោកកៅ គឹមហួន បញ្ជាក់ថាក្រុមរដ្ឋមន្ដ្រីនៃប្រទេសសមាជិកអាស៊ានទាំងដប់បានប្តូរយោបល់់ពី បញ្ហាសភាពការណ៍ជម្លោះនៅប្រទេសស៊ីរី បញ្ហាឧបទ្វីបកូរ៉េ និងពិភាក្សាលើសេចក្តីប្រកាសស្តីពីសិទ្ធិមនុស្សជាដើម។
ដោយឡែកលោកស៊ូរិន ពិតស៊ូវ៉ាន់បានឲ្យដឹងដែរថាជម្លោះសាសនានៅក្នុងប្រទេសភូមាបានធ្វើឲ្យរដ្ឋមន្ត្រីការបរទេសអាស៊ានមានការព្រួយបារម្ភផងដែរ៕