បណ្តាញផ្សាយព័ត៌មានរបស់រដ្ឋក្នុងប្រទេសចិន រាយការណ៍នៅសប្តាហ៍នេះថា រដ្ឋាភិបាលក្រុងប៉េកាំង កំពុងសង្ឃឹមថានៅឆ្នាំក្រោយនេះនឹងបញ្ចប់ក្រមប្រតិបត្តិសម្រាប់សមុទ្រចិនខាងត្បូង ដែលអាចកាត់បន្ថយភាពតានតឹងក្នុងជម្លោះដែនដី រវាងបណ្តាប្រទេសក្នុងតំបន់។ សារព័ត៌មានផ្លូវការរបស់រដ្ឋ China Daily បានរាយការណ៍ថា ក្រុមអ្នកការទូតតំណាងឲ្យប្រទេសចិន និងបណ្តាប្រទេសជាសមាជិកនៃសមាគមអាស៊ាន បានអនុម័ត្តលើប្រព័ន្ធទាក់ទងគ្នាមួយសម្រាប់គ្រាមានអាសន្ននៅសមុទ្រ ហើយបានតាំងចិត្តថានឹងបញ្ចប់ក្រមប្រតិបត្តិ នៅមុនពាក់កណ្តាលឆ្នាំក្រោយ។
ការបញ្ចប់ក្រមប្រតិបត្តិនេះ នឹងជាដំណោះស្រាយយ៉ាងធំមួយ ក្រោយពីការចចារមិនបានលទ្ធផលអស់ពេលជាង១០ឆ្នាំកន្លងមក។ ក្រុមអ្នកសង្កេតការពីក្រៅមានការមន្ទិលសង្ស័យចំពោះលទ្ធភាពនៃការសម្រេចក្រមប្រតិបត្តិនេះ មួយផ្នែកគឺដោយសារឥរិយាបទកាន់តែគគ្លើនរបស់ចិន នៅក្នុងតំបន់នោះ បន្ទាប់ពីតុលាការអាជ្ញាកណ្តាលរបស់អសប បានច្រានចោលការទាមទារជាច្រើនរបស់ចិនក្នុងសមុទ្រចិនខាងត្បូង៕