រដ្ឋមន្ត្រីការបរទេសអាមេរិកលោក Antony Blinken បានប្តេជ្ញាកាលពីថ្ងៃសុក្រថានឹងខិតខំជាបន្ទាន់យ៉ាងពិតប្រាកដសម្រាប់ដំណោះស្រាយការទូតដើម្បីបញ្ចប់ការវាយលុករបស់អ៊ីស្រាអែលលើលីបង់ តែលោកថាដំបូងត្រូវតែមានការយល់ស្របគ្នាជាមុនសិនលើការដកអាវុធពីក្រុមហេសបូឡា។ នេះបើយោងតាមសេចក្តីរាយការណ៍របស់ទីភា្នក់ងារសារព័ត៌មាន AFP។
ពេលជួបជាមួយនាយករដ្ឋមន្ត្រីលីបង់លោក Najib Mikati ក្នុងទីក្រុងឡុងដ៍នៃចក្រភពអង់គ្លេស លោក Blinken ក៏បានអំពាវនាវផងដែរឲ្យមានការការពារជនស៊ីវិល តែមិនបានជំរុញឲ្យមានការឈប់បាញ់ជាបន្ទាន់ពីអ៊ីស្រាអែលនោះទេ។
លោក Blinken បានថ្លែងទៅកាន់ក្រុមអ្នកយកព័ត៌មានថាលោកចូល «ប្រឡូកយ៉ាងជោគជាំ» ក្នុងរឿងនេះ។ លោកថ្លែងថា៖ «យើងមានអារម្មណ៍អំពីភាពបន្ទាន់ពិតប្រាកដក្នុងការសម្រេចឲ្យបាននូវដំណោះស្រាយការទូតមួយនិងការអនុវត្តឲ្យបានពេញលេញនូវសេចក្តីសម្រេចលេខ ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ ដើម្បីអាចមានសន្តិភាពពិតប្រាកដនៅតាមព្រំដែនរវាងអ៊ីស្រាអែលនិងលីបង់»។
សេចក្តីសម្រេចលេខ ១៧០១ ដែលបានអនុម័តនៅឆ្នាំ ២០០៦ ក្រោយពីមានសង្គ្រាមលើកមុនរវាងប្រទេសទាំងពីរ កំណត់ឲ្យដកអាវុធពីក្រុមដែលមិនមែនជាភាគីរដ្ឋនៅលីបង់ ពោលគឺក្រុមហេសបូឡាដែលគាំទ្រដោយអ៊ីរ៉ង់ ដែលក្រុមនេះមានយោធាខ្លួនឯងផ្ទាល់ និងតម្រូវឲ្យកងកម្លាំងអ៊ីស្រាអែលដកចេញពីលីបង់ទាំងស្រុង។
លោក Blinken ថ្លែងថា វាចាំបាច់ «ត្រូវមានការយល់ស្របគ្នាថាត្រូវមានការអនុវត្តឲ្យបានពេញលេញនូវសេចក្តីសម្រេចលេខ ១៧០១ នេះ»។
លោកថ្លែងបន្ថែមទៀតថា៖ «បើយើងអាចធ្វើដូច្នេះបានកាន់តែឆាប់ នោះយើងនឹងអាចមានដំណោះស្រាយកាន់តែលឿន»៕