នៅថ្ងៃដំបូងនៃការកាន់តំណែងជាប្រធានាធិបតីសហរដ្ឋអាមេរិក លោក Joe Biden មានគម្រោងចាត់វិធានការនីតិប្រតិបត្តិដើម្បីកែប្រែត្រឡប់មកវិញនូវសេចក្តីសម្រេចដ៏ចម្រូងចម្រាសមួយចំនួន របស់លោកប្រធានាធិបតី Donald Trump និងដោះស្រាយវិបត្តិជំងឺកូវីដ១៩។ នេះបើតាមការបញ្ជាក់របស់លោក Ron Klain នាយខុទ្ទកាល័យរបស់លោក Bidenកាលពីថ្ងៃសៅរ៍សប្ដាហ៍មុន។
លោក Klain បានលើកឡើងថា នៅថ្ងៃពុធស្អែក បន្ទាប់ពីស្បថចូលកាន់តំណែង លោក Bidenនឹងបញ្ចប់នូវការរឹតបន្តឹងរបស់លោក Trump លើជនអន្តោប្រវេសន៍មកពីប្រទេសមួយចំនួនដែលមានប្រជាពលរដ្ឋភាគច្រើនជាអ្នកកាន់សាសនាឥស្លាម ចូលរួមឡើងវិញនៅក្នុងកិច្ចព្រមព្រៀងទីក្រុងប៉ារីសស្ដីពីអាកាសធាតុ និងចេញបទបញ្ជាតម្រូវឲ្យមានការពាក់ម៉ាសការពារជំងឺកូវីដ១៩ ពេលស្ថិតក្នុងអាគាររដ្ឋាភិបាលសហព័ន្ធ និងក្នុងពេលធ្វើដំណើរឆ្លងកាត់រដ្ឋនីមួយៗជាដើម។
វិធានការមួយចំនួនទៀតដែលលោក Biden នឹងធ្វើនៅថ្ងៃដំបូងមានដូចជា ការបន្តការផ្អាកការសងប្រាក់កម្ចីរបស់និស្សិត និងវិធានការរារាំងមិនឲ្យមានការបណ្តេញចេញពីលំនៅដ្ឋានសម្រាប់ពលរដ្ឋណាដែលរងការប៉ះពាល់ក្នុងអំឡុងពេលនៃវិបត្តិជំងឺកូវីដ១៩ នេះ។
នៅថ្ងៃព្រហស្បតិ៍ លោក Biden នឹងចុះហត្ថលេខាលើបទបញ្ជាមួយចំនួនពាក់ព័ន្ធនឹងជំងឺកូវីដ១៩ ក្នុងគោលបំណងបើកសាលារៀននិងអាជីវកម្មឡើងវិញ និងបង្កើនការធ្វើតេស្តរកជំងឺកូវីដ១៩។ នៅថ្ងៃសុក្រ លោក Biden នឹងចាត់វិធានការលើរឿងជំនួយវិបត្តិជំងឺកូវីដ១៩។ នេះបើតាមការបញ្ជាក់របស់លោក Klain។
លោក Klain បានបន្ថែមថា ក្នុងសប្តាហ៍បន្ទាប់ លោក Biden នឹងចាត់វិធានការបន្ថែមទៀតពាក់ព័ន្ធនឹងបញ្ហាកំណែទម្រង់ប្រព័ន្ធយុត្តិធម៌ព្រហ្មទណ្ឌ បញ្ហាប្រែប្រួលអាកាសធាតុ និងបញ្ហាអន្តោប្រវេសន៍៕