ប្រធានាធិបតីសហរដ្ឋអាមេរិកលោក Joe Biden បានប្រកាសកាលពីថ្ងៃព្រហស្បតិ៍ថាកិច្ចព្រមព្រៀងរបស់គណបក្សទាំង២សម្រាប់ច្បាប់ហេដ្ឋារចនាសម្ព័ន្ធបង្ហាញថាលទ្ធិប្រជាធិបតេយ្យរបស់អាមេរិកមានដំណើរការ។
លោកប្រធានាធិបតីបានថ្លែងនៅក្នុងសេតវិមានថា៖ «កិច្ចព្រមព្រៀងនេះផ្តល់សញ្ញាដល់ពិភពលោកថាយើងអាចដំណើរការនិងធ្វើកិច្ចការសំខាន់»។
លោកបន្តថា៖«យើងកំពុងប្រកួតប្រជែងជាមួយប្រទេសចិននិងប្រទេសផ្សេងទៀតនៅក្នុងពិភពលោកក្នុងសតវត្សរ៍ទី២១។ពួកគេមិនចាំយើងទេ។ពួកគេកំពុងវិនិយោគប្រាក់រាប់ពាន់លានដុល្លារនៅទូទាំងពិភពលោក»។
គម្រោងច្បាប់នោះបានត្រូវចរចាដោយក្រុមសមាជិកព្រឹទ្ធសភារបស់គណបក្សាទាំង២ហើយរួមមានប្រាក់ចំនួន៥៧៩ពាន់លានដុល្លារសម្រាប់ការចំណាយលើហេដ្ឋារចនាសម្ព័ន្ធថ្មី។ គម្រោងច្បាប់នេះក៏នឹងមានចំនួនប្រាក់ប្រហាក់ប្រហែលគ្នានឹងចំនួននៃការចំណាយដែលបានអនុម័តកាលពីពេលមុនដែលនាំឲ្យការវិនិយោគហេដ្ឋារចនាសម្ព័ន្ធសរុបមានចំនួនប្រហែល១,២លានលានដុល្លារ។
លោក Biden បាននិយាយទៀតថា «មិនមានភាគីណាទទួលបានអ្វីទាំងអស់ដែលពួកគេចង់បាននោះទេ។នេះគឺជាការសម្របសម្រួល»។
លោក Chuck Schumer មេដឹកនាំសំឡេងភាគច្រើននៅក្នុងព្រឹទ្ធសភាបាននិយាយថា លោកយល់ស្របជាមួយអ្នកស្រី Nancy Pelosi ប្រធានរដ្ឋសភាអំពីវិធីដោះស្រាយនេះ។
លោក Mitch McConnell មេដឹកនាំគណបក្សសាធារណរដ្ឋនៅក្នុងព្រឹទ្ធសភាបានចោទថាលោកប្រធានាធិបតីឆាប់ចុះចាញ់ការគំរាមពីមេដឹកនាំខាងគណបក្សប្រជាធិបតេយ្យដោយយកកិច្ចព្រមព្រៀងហេដ្ឋារចនាសម្ព័ន្ធធ្វើជាចំណាប់ខ្មាំង៕