នៅថ្ងៃចុងក្រោយនៃការធ្វើយុទ្ធនាការឃោសនាបោះឆ្នោត ដើម្បីបញ្ចុះបញ្ចូលអ្នកបោះឆ្នោតឲ្យលោកបន្តកាន់តំណែងជាប្រធានាធិបតី ៤ ឆ្នាំទៅមុខទៀត លោកប្រធានាធិបតី Donald Trump បានប្រកាសថា នៅក្នុងអាណត្តិទីពីររបស់លោក «យើងនឹងកម្ចាត់អំពើពុករលួយក្នុងជួររដ្ឋាភិបាល ហើយយើងនឹងសង្គ្រោះក្ដីសុបិនរបស់ពលរដ្ឋអាមេរិកាំង»។
កាលពីថ្ងៃច័ន្ទម្សិលមិញ នៅក្នុងរដ្ឋ North Carolina លោកប្រធានាធិបតី Trump បានសង្កត់ធ្ងន់លើការងើបឡើងវិញនៃសេដ្ឋកិច្ចក្នុងអំឡុងពេលរាតត្បាតនៃជំងឺកូវីដ១៩ ដោយបានសន្យាថា៖ «យើងនឹងចែកចាយវ៉ាក់សំាងទ្រង់ទ្រាយធំក្នុងពេលប៉ុន្មានសប្ដាហ៍ដ៏ខ្លីខាងមុខ»។
មន្ត្រីសុខាភិបាល រួមទាំងមន្ត្រីនៅក្នុងរដ្ឋបាលលោក Trump ផងដែរ បានទស្សន៍ទាយថា ពលរដ្ឋអាមេរិកាំងភាគច្រើនទំនងជាមិនអាចទទួលបានវ៉ាក់សំាងនេះនៅមុនដើម ឬក៏ពាក់កណ្ដាលឆ្នាំ ២០២១ ទេ។
នៅក្នុងការឃោសនាបោះឆ្នោតដំបូង ក្នុងចំណោមការឃោសនាចំនួន ៥ កន្លែង ក្នុងរដ្ឋចំនួន ៤ កាលពីថ្ងៃច័ន្ទម្សិលមិញ លោក Trump បាននិយាយថា ប្រសិនបើលោក Joe Biden ដែលជាគូប្រជែងរបស់លោក ជាប់ឆ្នោត លោក Biden «នឹងធ្វើឲ្យសហរដ្ឋអាមេរិកមានស្ថានភាពដូចជាពន្ធនាគារ» តាមរយ:ការបិទសកម្មភាពសង្គម ដើម្បីទប់ទល់នឹងជំងឺកូវីដ១៩។
ចំណែកឯលោក Biden វិញ នៅក្នុងការឃោសនាបោះឆ្នោតបញ្ចប់កាលពីថ្ងៃច័ន្ទ លោកបានថ្លែងនៅក្នុងទីក្រុង Cleveland រដ្ឋ Ohio ថា៖ «ជំហានដំបូងក្នុងការយកឈ្នះលើជំងឺកូវីដ១៩ គឺការយកឈ្នះលើលោក Donald Trump»។
នៅក្នុងទីក្រុង Miami រដ្ឋ Florida កាលពីថ្ងៃច័ន្ទម្សិលមិញនេះដែរ លោកអតីតប្រធានាធិបតី Barack Obama បានឃោសនាជួយលោក Biden ដោយបានបញ្ជាក់ថា លោក Trump គឺជា «ភ្នាក់ងារចម្លងកំពូល» នៃជំងឺកូវីដ១៩ ដោយសារតែលោក Trump បានធ្វើការជួបជុំជាមួយអ្នកគាំទ្រច្រើននាក់ នៅច្រើនកន្លែង និងរៀបចំព្រឹត្តិការណ៍ជួបជុំនានានៅសេតវិមាន៕