ក្រុមប៉ូលិសប៊ែលហ្ស៊ិកបានចេញផ្សាយកំណត់រកចាប់ខ្លួនជនជាប់សង្ស័យម្នាក់នៅក្នុងការបំផ្ទុះគ្រាប់បែកនៅឯចំណតយន្តហោះក្រុងប្រ៊ុចសែល ដែលជាការផ្ទុះគ្រាប់បែកមួយក្នុងបណ្តាការផ្ទុះគ្រាប់បែកបីដែលក្រុមរដ្ឋឥស្លាមបានអះអាងទាមទារការទទួលខុសត្រូវ។ ការផ្ទុះនេះកើតមានឡើងនៅក្នុងរាជធានីនៃប្រទេសបែលហ្ស៊ិកកាលពីថ្ងៃអង្គារបណ្តាលឱ្យមនុស្សយ៉ាងតិចណាស់៣០នាក់ស្លាប់។
ការបំផ្ទុះគ្រាប់បែកទាំងនេះ រួមបញ្ចូលការវាយប្រហារមួយនៅឯស្ថានីយ៍រទេះភ្លើងក្រោមដីមួយនៅជិតទីនោះផងដែរ បានធ្វើឱ្យមនុស្ស១៣០នាក់ទៀតត្រូវរបួសនិងបានធ្វើឱ្យអាជ្ញាធរប៊ែលហ្ស៊ិកបង្កើនការប្រុងប្រយ័ត្នអំពីភេរវកម្មដល់កម្រិតខ្ពស់បំផុត។
ក្រុមរដ្ឋឥស្លាមបាននិយាយថា ពួកអ្នកវាយប្រហាររបស់ពួកវាបានបាញ់កាំភ្លើងនៅខាងក្នុងចំណតយន្តហោះនោះ នៅមុនពួកវាបំផ្ទុះអាវកាក់ដាក់គ្រឿងផ្ទុះនៅពេលដែលអ្នកបំផ្ទុះគ្រាប់បែកអត្តឃាតម្នាក់បានធ្វើការវាយប្រហារនៅឯស្ថានីយ៍រទេះភ្លើងក្រោមដី Maalbeek នេះបើតាមការផ្សាយនៃគេហទំព័ររបស់ទីភ្នាក់ងារព័ត៌មាន Amaq នៃក្រុមជនសកម្មប្រយុទ្ធនេះ។
លោកនាយករដ្ឋមន្ត្រីប៊ែលហ្ស៊ិក Charles Michel បាននិយាយប្រាប់ក្រុមអ្នកកាសែតថា «នេះជាពេលវេលាខ្មៅងងឹតមួយនៅក្នុងប្រទេសយើង...សូមអ្នកទាំងអស់គ្នាមានការស្ងាត់ស្ងៀមនិងមានសាមគ្គីភាព»។
នៅក្នុងក្រុង La Havane លោកប្រធានាធិបតីស.រ.អា. បារ៉ាក់ អូបាម៉ា មានប្រតិកម្មដល់ការវាយប្រហារទាំងនេះ ដោយលោកបានមានប្រសាសន៍ថា «យើងនឹងធ្វើអ្វីដែលជាការចាំបាច់ដល់មិត្តប៊ែលហ្ស៊ិករបស់យើង ដើម្បីយកពួកជនដែលទទួលខុសត្រូវដល់ការវាយប្រហារទាំងនេះទៅឱ្យតុលាការកាត់ទោស»។
សេចក្តីរាយការណ៍ព័ត៌មានបាននិយាយថា មានមនុស្សយ៉ាងតិចណាស់១១នាក់បានបាត់បង់ជីវិតនៅក្នុងការផ្ទុះគ្រាប់បែកនៅឯចំណតយន្តហោះនោះ។
លោកអភិបាលក្រុងប្រ៊ុចសែលបាននិយាយថា មានមនុស្សយ៉ាងហោចណាស់២០នាក់បានស្លាប់និង៥៥នាក់ត្រូវបានរបួសនៅក្នុងការផ្ទុះគ្រាប់បែកមួយក្នុងរយៈពេលខ្លី បន្ទាប់មកនៅឯស្ថានីយ៍រទេះភ្លើងក្រោមដី Maelbeek នៅជិតទីស្នាក់ការធំនៃសហភាពអឺរ៉ុប៕