តុលាការកំពូលរបស់ប្រទេសបង់ក្លាដែស (Bangladesh) នៅថ្ងៃពុធនេះ បានតម្កល់សាលក្រមកាត់ទោសប្រហារជីវិតពីបទឧក្រិដ្ឋកម្មសង្គ្រាម ចំពោះមេដឹកនាំគណបក្សឥស្លាមនិយមដ៏ធំជាងគេនៅក្នុងប្រទេសនោះ។
ក្រុមចៅក្រមបានបដិសេធបណ្តឹងសារទុក្ខរបស់លោក Motiur Rahman Nizami ដែលជាអតីតរដ្ឋមន្ត្រីម្នាក់ និងជាមេដឹកនាំគណបក្សគណបក្សឥស្លាមនិយមគឺគណបក្សJamaat-e-Islami ។ សេចក្តីសម្រេចរបស់តុលាការកំពូលនេះបានដោះរបាំងចុងក្រោយដែលបានរារាំងមិនឲ្យមានការប្រហារជីវិតមេដឹកនាំគណបក្សនោះ។
លោក Nizami ត្រូវបានកាត់ទោសកាលពីខែតុលាឆ្នាំ២០១៤ ក្រោមបទចោទប្រកាន់ជាច្រើនរួមមាន អំពើប្រល័យពូជសាសន៍ អំពើមនុស្សឃាត ការធ្វើទារុណកម្ម ការរំលោភសេពសន្ថវៈ និងការបំផ្លិចបំផ្លាញទ្រព្យសម្បត្តិ នៅពេលដែលលោកស្ថិតក្នុងតំណែង ក្នុងពេលដែលប្រទេសបង់ក្លាដែសធ្វើសង្គ្រាមរយៈពេល៩ខែជាមួយប្រទេសប៉ាគីស្ថាន ដើម្បីទាមទារឯករាជ្យកាលពីឆ្នាំ១៩៧១នោះ។
ប្រទេសបង់ក្លាដែសនិយាយថា ទាហានប៉ាគីស្ថាននិងអ្នកក្នុងស្រុកដែលសហការជាមួយទាហានទាំងនោះ បានសម្លាប់ប្រជាជនអស់៣លាននាក់ និងបានរំលោភសេពសន្ថវៈនារី២០ម៉ឺននាក់ ហើយបានធ្វើឲ្យមនុស្សប្រមាណ១០លាននាក់គ្មានផ្ទះសម្បែង ដោយត្រូវទៅជ្រកកោននៅតាមជំរុំជនភៀសខ្លួននៅក្នុងប្រទេសឥណ្ឌា ដែលនៅជិតខាងគ្នានោះ។
គណបក្សJamaat-e-Islami ជំទាស់នឹងការទាមទារឯករាជ្យពីប្រទេសប៉ាគីស្ថាន។
សាលាក្តីពិសេសដែលបង្កើតឡើងដោយនាយករដ្ឋមន្ត្រីបង់ក្លាដែស លោកស្រី Sheikh Hasina បានកាត់ទោសមេបក្សប្រឆាំងជាង១០នាក់មកហើយ ពីបទឧក្រិដ្ឋកម្មសង្គ្រាមចាប់តាំងពីឆ្នាំ២០១០មក។
ក្រុមអ្នករិះគន់បានហៅដំណើរការកាត់ទោសទាំងនេះ ថាជាចេតនានយោបាយ ដែលសំដៅទៅរកសមាជិកគណបក្សប្រឆាំង៕