មេដឹកនាំសហភាពអឺរ៉ុប មានគម្រោងនឹងពិភាក្សាគ្នាម្តងទៀតក្នុងរយៈពេលពីរ ឬបីសប្តាហ៍ខាងមុខនេះ ទៅលើពាក្យស្នើសុំរបស់បណ្តារដ្ឋក្នុងតំបន់បាល់កង់ខាងលិច ដើម្បីចូលជាសមាជិករបស់សហភាពអឺរ៉ុប ដែលបានជាប់គាំង អស់រយៈពេលជាយូរមកហើយ។
ប្រទេសអាល់បានី ស៊ែប៊ី ម៉ាសេដូនីខាងជើង និងប្រទេសម៉ុងតេណេហ្គ្រោ សុទ្ធតែជាបេក្ខភាពសុំចូលជាសមាជិកសហភាពអឺរ៉ុប។ ពួកគេមិនសប្បាយចិត្តនឹងការជាប់គាំងនៃការសុំចូលជាសមាជិកភាពរបស់ពួកគេ។ ប៉ុន្តែអ្នកប្រឆាំងចំពោះការពង្រីកសមាជិកភាពរបស់សហភាពអឺរ៉ុប បានសិក្សាពីលទ្ធភាពរបស់ប្រទេសទាំងនោះ ដោយបញ្ជាក់ថា ទីផ្សារអចលនទ្រព្យនៅក្នុងតំបន់ប្រទេសបាល់កង់ខាងលិច កំពុងត្រូវបានគេប្រើប្រាស់ក្នុងការលាងលុយកខ្វក់ដែលបានមកពីការរត់ពន្ធគ្រឿងញៀន និងការរត់ពន្ធមនុស្ស ដែលធ្វើឲ្យតម្លៃអចលនទ្រព្យកើនឡើងយ៉ាងខ្លាំងនៅក្នុងតំបន់នោះ។
អង្គការគំនិតផ្តួចផ្តើមសាកលប្រឆាំងនឹងឧក្រិដ្ឋកម្មឆ្លងដែនដែលមានការរៀបចំ (The Global Initiative Against Transnational Organized Crime) ដែលជាអង្គការក្រៅរដ្ឋាភិបាលមួយដែលមានមូលដ្ឋានក្នុងទីក្រុងហ្សឺណែវ ប្រទេសស្វីស លើកឡើងថា លុយខុសច្បាប់ជាច្រើនកំពុងហូរចូលទៅកាន់ទីផ្សារអចលនទ្រព្យនិងឧស្សាហកម្មសំណង់នៅក្នុងតំបន់បាល់កង់ខាងលិច។ អ្នកស្រី Kristina Amerhauser ដែលជាសរសេររបាយការណ៍មួយរូបរបស់អង្គការនេះហើយដែលត្រូវបានផ្សព្វផ្សាយកាលពីខែមុនបាននិយាយថា៖ «លុយខុសច្បាប់ដែលគេទទួលបាននិងកំពុងត្រូវបានប្រើប្រាស់ក្នុងតំបន់នោះគឺកំពុងតែបង្កើតបានជាបណ្តាញអំពើឧក្រិដ្ឋកម្មនិងពុករលួយ»។
ប្រទេសបារាំង គឺជាអ្នកប្រឆាំងចេញមុខ ក្នុងការរារាំងមិនឲ្យបណ្តារដ្ឋក្នុងតំបន់បាល់កង់ខាងលិចចូលរួមជាសមាជិករបស់សហភាពអឺរ៉ុប។ មន្ត្រីបារាំងជាច្រើននាក់លើកឡើងថា សហភាពអឺរ៉ុប ធ្លាប់បានឆ្លងកាត់បទពិសោធន៍មិនល្អក្នុងពេលកន្លងមកដោយសារការពង្រីកតំបន់របស់ខ្លួន ទៅកាន់ប្រទេសក្នុងតំបន់អឺរ៉ុបកណ្តាលនិងខាងកើត ក៏ដូចជាការបន្តមានបញ្ហាអំពើពុករលួយនិងការគ្រប់គ្រងរដ្ឋនៅក្នុងប្រទេសមួយចំនួន ដូចជាប្រទេសរ៉ូម៉ានីនិងប៊ុលហ្គារីជាដើម។ ពួកគេនិយាយថា នោះគឺជាលទ្ធផលនៃការអនុញ្ញាតឲ្យប្រទេសដែលមិនទាន់បានត្រៀមខ្លួនរួចរាល់ដើម្បីចូលរួមក្នុងសហភាពអឺរ៉ុបនោះ ហើយគេបារម្ភថា ប្រទេសក្នុងតំបន់បាល់កង់ខាងលិចនេះ អាចក្លាយជារដ្ឋ ដែលគ្រប់គ្រងដោយអ្នកនយោបាយដែលប្រព្រឹត្តអំពើពុករលួយដោយមានជាប់ពាក់ព័ន្ធនឹងបទឧក្រិដ្ឋដែលមានការរៀបចំ។
ប៉ុន្តែក្រុមតស៊ូមតិដែលគាំទ្រការពង្រីកសហភាពអឺរ៉ុប បានលើកអំណះអំណាងថា ការចូលជាសមាជិករបស់ក្រុមប្រទេសបាល់កង់ខាងលិចទៅក្នុងសហភាពអឺរ៉ុប នឹងជួយពួកគេ ក្នុងកិច្ចខិតខំប្រឹងប្រែងដើម្បីប្រឆាំងអំពើពុករលួយ៕