ស្របពេលដែលកំពុងទន្ទឹងរង់ចាំលទ្ធផលបោះឆ្នោតប្រធានាធិបតីសហរដ្ឋអាមេរិក សមាជិកសភាសហរដ្ឋអាមេរិកនៅពេលបច្ចុប្បន្នមុនពេលប្រធានាធិបតីថ្មីចូលកាន់តំណែង ត្រូវតែផ្តោតឲ្យបានឆាប់ចំពោះអាទិភាពថ្មីមួយ ដែលនោះ គឺការបញ្ចៀសមិនឲ្យមានការបិទរដ្ឋាភិបាលនៅខែធ្នូខាងមុខ ក្នុងអំឡុងពេលដែលមានការឆ្លងរាតត្បាតនៃជំងឺកូវីដ១៩។
ព្រឹទ្ធសភាដែលគ្រប់គ្រងដោយគណបក្សសាធារណរដ្ឋ និងរដ្ឋសភាដែលគ្រប់គ្រងដោយគណបក្សប្រជាធិបតេយ្យ នៅថ្ងៃពុធនេះ ក៏នឹងវិលត្រឡប់ទៅដោះស្រាយភាពទាល់ច្រកដែលបានរារាំងមិនឲ្យមានចំណាត់ការថ្មីណាមួយកើតឡើងបានចាប់តាំងពីខែមេសាមក ដើម្បីជួយជំរុញសេដ្ឋកិច្ចដែលរងការប៉ះពាល់ដោយសារជំងឺកូវីដ១៩ ឲ្យងើបឡើងវិញ។
សភាដែលអាណត្តិបច្ចុប្បន្ននៅបន្តរហូតដល់ដើមខែមករាឆ្នាំក្រោយ បានធ្វើការតាំងពីថ្ងៃទី ១ ខែតុលាមក នៅក្រោមកញ្ចប់ថវិកាបណ្តោះអាសន្នដែលនឹងផុតកំណត់នៅថ្ងៃទី ១១ ខែធ្នូខាងមុខ ដោយព្រឹទ្ធសភាមិនបានអនុម័តសំណើច្បាប់ថវិកាចំណាយណាមួយក្នុងចំណោមសំណើច្បាប់ថវិកាចំណាយចំនួន ១២ ដែលត្រូវការដើម្បីឲ្យរដ្ឋាភិបាលដំណើរការនោះទេ។
ក្រៅពីការត្រូវសម្រេចលើសំណើច្បាប់ថវិកាចំណាយទាំងនេះ សភានៅត្រូវដោះស្រាយរឿងសំណើថវិកាជំនួយសេដ្ឋកិច្ចសម្រាប់វិបត្តិជំងឺកូវីដ១៩ ផងដែរ។ មេដឹកនាំគណបក្សសាធារណរដ្ឋនៃព្រឹទ្ធសភាលោក Mitch McConnell ធ្លាប់បាននិយាយថា ការអនុម័តលើសំណើច្បាប់នេះ គួរពន្យារពេលរហូតដល់ដើមខែមករា៕