ក្លឹបអាកាសធាតុ (Climate Club) ត្រូវបានបង្កើតឡើងនៅក្នុងឆ្នាំ ២០២២ ដោយអធិការបតីអាល្លឺម៉ង់លោក Olaf Scholz។ ក្លឹបនេះទទួលបានការគាំទ្រពីប្រទេសដែលមានសេដ្ឋកិច្ចជឿនលឿនបំផុតមួយចំនួននៅលើពិភពលោកដូចជាកាណាដា បារាំង អ៊ីតាលី ចក្រភពអង់គ្លេស សហរដ្ឋអាមេរិក អាហ្សង់ទីន ឈីលី ដាណឺម៉ាក ឥណ្ឌូណេស៊ី កូឡុំប៊ី លុចសំបួ ហូឡង់ ស្វីស សិង្ហបុរី និងអ៊ុយរូហ្គាយជាដើម។
ប្រទេសដែលជាសមាជិករបស់ក្លឹបនេះត្រូវបានលើកទឹកចិត្តឱ្យកំណត់គោលដៅបរិស្ថានដោយស្ម័គ្រចិត្តដើម្បីសម្រេចឱ្យបាននូវការបញ្ចេញឧស្ម័នស្រូបកម្ដៅទៅក្នុងបរិយាកាសមានតុល្យភាពនៅត្រឹមឆ្នាំ ២០៥០ ខាងមុខ ហើយក៏ត្រូវតម្រូវឱ្យដៃគូពាណិជ្ជកម្មរបស់ខ្លួនបំពេញទៅតាមបទដ្ឋានទាំងនេះផងដែរ។
មហិច្ឆតាបែបនេះត្រូវបានជំទាស់ដោយប្រទេសដែលមានសេដ្ឋកិច្ចងើបឡើងខ្លាំងចម្បងៗដូចជាចិនជាដើម ដែលជាប្រទេសបញ្ចេញឧស្ម័នស្រូបកម្ដៅច្រើនជាងគេបង្អស់នៅលើពិភពលោក។
ប្រទេសអូស្ត្រាលីគឺជាសមាជិកថ្មីបំផុតរបស់ក្លឹបអាកាសធាតុនេះ។
រដ្ឋាភិបាលអូស្ត្រាលីបានតាំងចិត្តកាលពីឆ្នាំមុននៅក្នុងការកាត់បន្ថយការបញ្ចេញឧស្ម័នស្រូបកម្ដៅឱ្យបាន ៤៣% នៅត្រឹមចុងទសវត្សរ៍នេះ ដែលចំនួននេះគឺស្មើនឹងជិតពីរដងនៃគោលដៅកំណត់កាលពីលើកមុន។
កាលពីខែមីនា សមាជិកសភាជាតិអូស្ត្រាលីបានអនុម័តច្បាប់ដែលតម្រូវឱ្យបណ្តាក្រុមហ៊ុនដែលបញ្ចេញឧស្ម័នស្រូបកម្ដៅច្រើនជាងគេបង្អស់នៅក្នុងប្រទេសអូស្ត្រាលីបញ្ឈប់ការបញ្ចេញឧស្ម័នស្រូបកម្ដៅនេះ បើមិនដូច្នេះទេត្រូវបង់ប្រាក់សម្រាប់ឥណទានកាបូន ដែលជាការអនុញ្ញាតឱ្យបញ្ចេញកាបូន។
អ្នកស្រី Nicki Hutley ដែលជាទីប្រឹក្សាអង្គការក្រុមប្រឹក្សាអាកាសធាតុ (Climate Council) ដែលជាអង្គការបរិស្ថានអូស្ត្រាលី បានប្រាប់បណ្តាញទូរទស្សន៍ ABC របស់អូស្ត្រាលីកាលពីថ្ងៃទី ១១ ខែកក្កដាថា ក្លឹបអាកាសធាតុមានមហិច្ឆតាត្រឹមត្រូវ។
អ្នកស្រី Hutley ថ្លែងដូច្នេះថា៖ «វាជាផលប្រយោជន៍សេដ្ឋកិច្ចសម្រាប់អូស្ត្រាលីនៅក្នុងការចូលជាសមាជិករបស់ក្លឹប [អាកាសធាតុ] នេះដើម្បីធ្វើឱ្យប្រាកដថាយើងធ្វើឱ្យឧស្សាហកម្មនានារបស់យើងគ្មានការបញ្ចេញឧស្ម័នកាបូន។ ប្រសិនបើប្រទេសកាន់តែច្រើនចូលរួមនៅក្នុងក្លឹបនេះ នោះយើងអាចធ្វើការរួមគ្នាកាន់តែខ្លាំងឡើងដើម្បីគាំទ្រដល់បណ្តាប្រទេសកំពុងអភិវឌ្ឍន៍និងបណ្ដាប្រទេសដែលមានសេដ្ឋកិច្ចងើបឡើងខ្លាំង ដែលវានឹងកាន់តែប្រសើរឡើងសម្រាប់មនុស្សគ្រប់ៗរូប»។
ធ្យូងថ្មនិងឧស្ម័ននៅបន្តគ្របដណ្តប់លើការបង្កើតអគ្គិសនីនៅក្នុងប្រទេសអូស្ត្រាលី ប៉ុន្តែគេឃើញមានការផ្លាស់ប្តូរដ៏ច្បាស់លាស់ទៅរកប្រភពថាមពលដែលល្អចំពោះបរិស្ថាន។
កាលពីខែមេសា ក្រុមប្រឹក្សាថាមពលស្អាត (Clean Energy Council) ដែលជាសមាគមថាមពលកកើតឡើងវិញរបស់អូស្ត្រាលី បានបញ្ជាក់ថា ថាមពលស្អាតមានប្រហែល ៣៥,៩% នៃថាមពលអគ្គិសនីសរុបរបស់អូស្ត្រាលីនៅក្នុងឆ្នាំ ២០២២ ដែលកើនឡើងពីចំនួន ៣២,៥% នៅក្នុងឆ្នាំ ២០២១។
ទោះជាយ៉ាងណាក៏ដោយ អ្នកអភិរក្សនិយមខ្លះព្រួយបារម្ភថាការផ្លាស់ប្ដូររបស់អូស្ត្រាលីទៅរកថាមពលកកើតឡើងវិញដែលភាគច្រើនបានមកពីពន្លឺព្រះអាទិត្យនិងខ្យល់ គឺត្រូវការពេលវេលា។
ពួកគេបានទទូចថា អូស្ត្រាលីជាប្រទេសជួរមុខមួយនៃការឡើងកម្តៅផែនដីដែលធ្វើឱ្យមានការឆេះព្រៃរបស់ខ្លួនកាន់តែខ្លាំងឡើង រលកកម្តៅ និងខ្យល់ព្យុះ។ ពួកគេខ្លាចថាការឆេះព្រៃដ៏មហន្តរាយកាលពីឆ្នាំ ២០១៩ និងឆ្នាំ ២០២០ អាចជាសញ្ញាថាអ្វីៗនឹងកើតមាន។
អង្គការសហប្រជាជាតិបានព្រមានថាលំនាំធាតុអាកាសអែលនីញ៉ូ (El Niño) ដែលជាបាតុភូតកើតឡើងដោយធម្មជាតិដែលកំពុងកើតមាននៅពេលបច្ចុប្បន្ននេះ នឹងទំនងជាបណ្ដាលឱ្យមាន «ការកើនឡើងនូវសីតុណ្ហភាពលើសាកលលោកនិងលំនាំធាតុអាកាសនិងអាកាសធាតុដ៏គ្រោះថ្នាក់»។
នៅក្នុងប្រទេសអូស្ត្រាលី ព្រឹត្តិការណ៍ដែលកើតឡើងដោយសារបាតុភូតអែលនីញ៉ូគឺមានការពាក់ព័ន្ធជាមួយនឹងហានិភ័យកើនឡើងនៃគ្រោះរាំងស្ងួត រលកកម្តៅ និងការឆេះព្រៃ៕
ប្រែសម្រួលដោយលោក ជឹង ប៉ូជីន
អូស្ត្រាលីចូលជាសមាជិកក្លឹបអាកាសធាតុ
រូបឯកសារ៖ អគ្គិភ័យបានឆាបឆេះស្មៅនៅក្បែរទីក្រុង Bumbalong ខាងត្បូងរដ្ឋធានីកង់បេរ៉ានៃប្រទេសអូស្ត្រាលីកាលពីថ្ងៃទី០១ កុម្ភៈ ឆ្នាំ២០២០។អូស្ត្រាលីចូលជាសមាជិកក្លឹបអាកាសធាតុ