និស្សិតម្នាក់ក្នុងប្រទេសឆែកកាលពីថ្ងៃព្រហស្បតិ៍ម្សិលមិញបានបាញ់សម្លាប់ឪពុករបស់ខ្លួន ហើយបន្ទាប់មកក៏បាញ់សម្លាប់មនុស្សផ្សេងទៀតយ៉ាងហោចណាស់ក៏ ១៤ នាក់ដែរ និងមានមនុស្សយ៉ាងតិចណាស់ក៏ ២៥ នាក់ទៀត បានរងរបួសពីការបាញ់ប្រហាររបស់ជនដៃដល់រូបនេះ នៅក្នុងសាកលវិទ្យាល័យទីក្រុង Prague សាធារណរដ្ឋឆែក។ នេះជាការវាយប្រហារទ្រង់ទ្រាយធំ ដែលមានមនុស្សស្លាប់ច្រើនបំផុតនៅក្នុងប្រទេសនេះ។ នេះបើតាមការលើកឡើងរបស់ប៉ូលិស។
ស្នងការប៉ូលិសលោក Martin Vondrasek និងរដ្ឋមន្ត្រីមហាផ្ទៃឆែកលោក Vit Rakusan បានប្រាប់ក្រុមអ្នកសារព័ត៌មានដូចនេះ នៅជិតកន្លែងកើតហេតុ កាលពីយប់ថ្ងៃព្រហស្បតិ៍ នៅក្នុងបរិវេណសាកល Prague's Charles University នៅទីលាន Jan Palach ដែលស្ថិតនៅជាប់នឹងស្ពាន Charles ដែលជាទីតាំងទេសចរណ៍ដ៏ពេញនិយមមួយ។
ស្នងការប៉ូលិសលោក Vondrasek និយាយថា ខ្មាន់កាំភ្លើងអាយុ ២៤ ឆ្នាំ ជានិស្សិតនៅក្នុងសាលវិទ្យាល័យនោះ។ ស្នងការប៉ូលិសរូបនេះនិយាយថា ប៉ូលិសបានចាប់ផ្តើមស្វែងរកជននេះ មុនពេលដែលការបាញ់ប្រហារទៅលើមនុស្សដទៃទៀតបានកើតឡើង បន្ទាប់ពីឪពុកជនល្មើសត្រូវបានរកឃើញថាស្លាប់នៅក្នុងភូមិមួយ នៅភាគខាងលិចទីក្រុង Prague។ មេប៉ូលិសរូបនេះថា ជនល្មើសរូបនេះបានស្លាប់ក្នុងកន្លែងកើតហេតុក្នុងបរិវេណសាកលវិទ្យាល័យ។
រដ្ឋមន្ត្រីមហាផ្ទៃប្រទេសឆែកលោក Rakusan និយាយថា មិនមានការពាក់ព័ន្ធរវាងការបាញ់ប្រហារនេះទៅនឹងភេរវកម្មអន្តរជាតិនោះឡើយ»៕
ព័ត៌មានខ្លះនៃសេចក្តីរាយការណ៍នេះដកស្រង់ពីសេចក្តីរាយការណ៍របស់ទីភ្នាក់ងារសារព័ត៌មាន AP, AFP និង Reuters។