បណ្ដារដ្ឋមន្ត្រីការបរទេសនៃតំបន់អាស៊ីអាគ្នេយ៍បានបញ្ជាក់នៅក្នុងការពិភាក្សារបស់ពួកគេនៅក្នុងប្រទេសឥណ្ឌូណេស៊ីនៅថ្ងៃព្រហស្បតិ៍នេះនៅមុនកិច្ចប្រជុំកំពូលរបស់មេដឹកនាំនៃបណ្ដាប្រទេសជាសមាជិកអាស៊ាន (ASEAN) ចូលមកដល់នៅខែវិច្ឆិកាខាងមុខថា ពួកគេមាន «ការតាំងចិត្តកាន់តែខ្លាំងថែមទៀត» ដើម្បីដោះស្រាយវិបត្តិនយោបាយនៅក្នុងប្រទេសមីយ៉ាន់ម៉ា។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ប្រទេសមីយ៉ាន់ម៉ាបានស្ថិតក្នុងភាពចលាចលតាំងពីពេលដែលយោធាបានធ្វើរដ្ឋប្រហារទម្លាក់រដ្ឋាភិបាលស៊ីវិលរបស់អ្នកស្រី Aung San Suu Kyi កាលពីខែកុម្ភៈឆ្នាំមុនមក ប៉ុន្តែបើទោះបីជាមីយ៉ាន់ម៉ាបានបង្ហាញនូវក្ដីបារម្ភអំពីភាពចលាចលនេះក៏ដោយ ក៏កិច្ចប្រឹងប្រែងរបស់អាស៊ានកន្លងមកនៅក្នុងការដោះស្រាយវិបត្តិនេះមិនបានផ្ដល់លទ្ធផលជាផ្លែផ្កាណាមួយឡើយ។
រដ្ឋមន្ត្រីការបរទេសកម្ពុជាលោក ប្រាក់ សុខុន បានបញ្ជាក់នៅក្រោយការប្រជុំបន្ទាន់របស់បណ្ដារដ្ឋមន្ត្រីការបរទេសអាស៊ាននៅក្នុងទីក្រុងហ្សាការតានៃប្រទេសឥណ្ឌូណេស៊ីនៅថ្ងៃព្រហស្បតិ៍នេះថា៖ «អាស៊ានមិនត្រូវបាក់ទឹកចិត្ត ប៉ុន្តែត្រូវតែមានការតាំងចិត្តកាន់តែខ្លាំងថែមទៀតដើម្បីជួយប្រទេសមីយ៉ាន់ម៉ានៅក្នុងការស្វែងរកដំណោះស្រាយដោយសន្តិវិធីមួយ»។
របបយោធាមីយ៉ាន់ម៉ាបានបដិសេធមិនបញ្ជូនអ្នកតំណាងដែលមិនមែននយោបាយមកចូលរួមនៅក្នុងការប្រជុំនេះ។
នៅក្នុងការប្រជុំនេះ បណ្ដារដ្ឋមន្ត្រីការបរទេសអាស៊ានបានបញ្ជាក់ជាថ្មីអំពីការតាំងចិត្តរបស់ពួកគេចំពោះចំណុចឯកច្ឆន្ទចំនួន ៥ ដើម្បីបញ្ចប់ជម្លោះនៅក្នុងប្រទេសមីយ៉ាន់ម៉ា ដែលបានស្នើដំបូងកាលពីខែមេសាកន្លងទៅនេះ។
សហរដ្ឋអាមេរិកបានជំរុញឱ្យមានការចាត់វិធានការឱ្យបានខ្លាំងក្លានៅក្នុងការប្រជុំបន្ទាន់របស់បណ្ដារដ្ឋមន្ត្រីការបរទេសអាស៊ាននេះ។
លោក Daniel Kritenbrink ដែលជាមន្ត្រីការទូតសហរដ្ឋអាមេរិកទទួលបន្ទុកកិច្ចការអាស៊ីខាងកើត បាននិយាយនៅក្នុងពិធីមួយនៅរដ្ឋធានីវ៉ាស៊ីនតោន សហរដ្ឋអាមេរិកថា របបយោធាមីយ៉ាន់ម៉ាបានដឹកនាំឱ្យមាន «ការបំផ្លាញទាំងស្រុងលើការវិវឌ្ឍទាំងអស់ដែលបានធ្វើឡើងក្នុងពេលមួយទសវត្សរ៍កន្លងមកនេះ» នៅពេលដែលមីយ៉ាន់ម៉ាបានធ្វើការផ្លាស់ប្ដូរឆ្ពោះទៅរកលទ្ធិប្រជាធិបតេយ្យ។
នៅក្រោយរដ្ឋប្រហារយោធានៅមីយ៉ាន់ម៉ា មនុស្សជាង ២.៣០០ នាក់ត្រូវបានសម្លាប់នៅក្នុងការបង្ក្រាបដ៏ឃោរឃៅរបស់យោធាលើក្រុមប្រឆាំង។ នេះបើយោងតាមការបញ្ជាក់របស់អង្គការដែលតាមដានស្ថានការណ៍នេះនៅក្នុងប្រទេសមីយ៉ាន់ម៉ា៕
បណ្ដារដ្ឋមន្ត្រីការបរទេសអាស៊ានថា ពួកគេ «តាំងចិត្តកាន់តែខ្លាំងថែមទៀត» ដើម្បីដោះស្រាយវិបត្តិមីយ៉ាន់ម៉ា
នៅក្នុងរូបដែលត្រូវបានថត និងចេញផ្សាយនៅថ្ងៃទី២៧ ខែតុលា ឆ្នាំ២០២២ ដោយក្រសួងការបរទេសឥណ្ឌូនេស៊ី បង្ហាញពីរដ្ឋមន្ត្រីការបរទេសអាស៊ាន ចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ាន (SAFMM) នៅទីក្រុងហ្សាកាតា។
ទីក្រុងហ្សាការតា —