ប្រធានសមាគមប្រជាជាតិអាស៊ីអាគ្នេយ៍ឬអាស៊ានដែលមានសមាជិក១០ប្រទេស និយាយថា ការទូតគឺជាជម្រើសតែមួយគត់ ក្នុងការដោះស្រាយវិបត្តិបង្ហូរឈាមដែលមានរយៈពេល២ឆ្នាំកន្លះ នៅក្នុងប្រទេសមីយ៉ាន់ម៉ា។
រដ្ឋមន្ត្រីការបរទេសឥណ្ឌូនេស៊ី លោកស្រី Retno Marsudi បានថ្លែងយ៉ាងដូចនេះនៅថ្ងៃពុធនេះ ក្នុងរដ្ឋធានីហ្សាការតា នៅក្នុងការចាប់ផ្តើមកិច្ចប្រជុំថ្ងៃទី២ នៃបណ្តាក្រុមរដ្ឋមន្ត្រីការបរទេសរបស់ក្រុមប្រទេសអាស៊ាន។
របបយោធាមីយ៉ាន់ម៉ា បានយល់ព្រមទៅលើកិច្ចព្រមព្រៀងទាំង៥ចំណុច ដែលត្រូវបានដាក់ចេញដោយអាស៊ាន ក្រោយរយៈពេលតែប៉ុន្មានខែប៉ុណ្ណោះ ក្រោយការផ្តួលរំលំរដ្ឋាភិបាលជាប់ឆ្នោតតាមបែបប្រជាធិបតេយ្យរបស់លោកស្រី Aung San Suu Kyi កាលពីថ្ងៃទី១ ខែកុម្ភៈ ឆ្នាំ២០២១។ កិច្ចព្រមព្រៀងនេះ ក៏មានចំណុចនិយាយពីការត្រូវបញ្ចប់អំពើហិង្សាជាបន្ទាន់ ការចរចាសន្តិភាពរវាងរបបសឹកយោធា និងក្រុមប្រឆាំងខ្លួន និងការដឹកជញ្ជូនជំនួយមនុស្សធម៌ជាដើម។
ប៉ុន្តែរបបយោធាមីយ៉ាន់ម៉ា មិនបានអនុវត្តតាមផែនការនៃកិច្ចព្រមព្រៀងនោះឡើយ ហើយបានបន្តការបង្រ្កាបបង្ហូរឈាម ទៅលើការធ្វើបាតុកម្មប្រឆាំងនឹងរដ្ឋប្រហារ និងធ្វើការវាយប្រហារតាមអាកាស ទៅលើកងកម្លាំងតស៊ូប្រដាប់អាវុធ ដែលទទួលបានការជួយជ្រោមជ្រែងពីក្រុមឧទ្ទាមជនជាតិភាគតិចនៅតាមតំបន់ជនបទដាច់ស្រយ៉ាលជាច្រើន ដែលបានធ្វើការប្រយុទ្ធតស៊ូអស់រាប់ទសវត្សរ៍មកហើយ ដើម្បីទទួលបានស្វ័យភាពឱ្យកាន់តែច្រើនថែមទៀត។
អង្គការសហប្រជាជាតិបាននិយាយថា ពលរដ្ឋមីយ៉ាន់ម៉ាជាង១លាននាក់ បានផ្លាស់ទីកន្លែង ដោយសារតែភាពចលាចលនៅក្នុងប្រទេសនេះ។
កិច្ចប្រជុំនេះកើតមានឡើងមួយខែ ក្រោយពេលដែលក្រុមមន្ត្រីថៃ បានរៀបចំកិច្ចប្រជុំពិភាក្សាទល់មុខមួយជាមួយនឹងមេដឹកនាំរបបយោធាមីយ៉ាន់ម៉ា ដែលត្រូវបានហាមប្រាមមិនឱ្យចូលរួមក្នុងកិច្ចប្រជុំថ្នាក់ខ្ពស់ណាមួយរបស់អាស៊ានឡើយ។ លោកស្រី Marsudi បានប្រាប់បណ្តារដ្ឋមន្ត្រីការបរទេសអាស៊ានថា «កិច្ចប្រឹងប្រែងផ្សេងណាមួយ ត្រូវតែគាំទ្រទៅលើការអនុវត្តកិច្ចព្រមព្រៀងទាំង៥ចំណុច ដែលបានឯកភាពគ្នាជាឯកច្ឆ័នរួចហើយក្នុងពេលកន្លងទៅ»។
រដ្ឋមន្ត្រីការបរទេសថៃ លោក Don Pramudwinai បានប្រាប់សមភាគីអាស៊ានរបស់លោកថា លោកបានជួបជាមួយលោកស្រី San Suu Kyi កាលពីសប្តាហ៍មុន ដែលត្រូវបានជាប់ឃុំឃាំង ចាប់តាំងពីក្រោយថ្ងៃរដ្ឋប្រហារមក។ លោក Don និយាយថា ជ័យលាភីរង្វាន់ណូបែលសន្តិភាព ដែលមានអាយុ៧៨ឆ្នាំរូបនេះ មានសុខភាពល្អជាធម្មតាទេ ប៉ុន្តែលោកមិនបានបរិយាយលម្អិតលើសពីនេះឡើយ៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និងReuters