ក្រុមហ៊ុនបច្ចេកវិទ្យា Apple កំពុងប្រឆាំងនឹងបទបញ្ជាមួយរបស់រដ្ឋាភិបាលអាមេរិកដើម្បីឲ្យខ្លួនដោះលេខកូតសម្ងាត់ (encryption) សម្រាប់ការស៊ើបអង្កេតមួយអំពីករណីការវាយប្រហារភេរវកម្ម ហើយក្រុមហ៊ុននេះបានអំពាវនាវឲ្យសាធារណជនចូលរួមពិភាក្សាអំពីបញ្ហានេះ។ បញ្ហានេះនាំឲ្យពលរដ្ឋអាមេរិកមានការស្ទាក់ស្ទើរមិនអាចសម្រេចចិត្តបានចំពោះបញ្ហាមួយ គឺបញ្ហាតុល្យភាពរវាងសិទ្ធិឯកជននិងសន្តិសុខជាតិ។
ទីភ្នាក់ងារស៊ើបអង្កេតសហព័ន្ធ FBI របស់សហរដ្ឋអាមេរិកកំពុងស្នើឲ្យក្រុមហ៊ុន Apple ដោះលេខកូដបម្លែងអក្ខរៈ encryption នៃទូរស័ព្ទ iPhone របស់ប្តីប្រពន្ធជាភេរវករដែលបានសម្លាប់មនុស្ស១៤នាក់កាលពីខែធ្នូនៅរដ្ឋកាលីហ្វ័រញ៉ា។ ក្រុមហ៊ុន Apple បានឆ្លើយតបកាលពីថ្ងៃពុធសប្តាហ៍មុន ដោយផ្ញើលិខិតចំហមួយទៅកាន់អតិថិជនរបស់ខ្លួនឲ្យប្រឆាំងទៅនឹងអ្វីដែលខ្លួនហៅថាជាវិធានការ«ហួសប្រមាណ»របស់រដ្ឋាភិបាលអាមេរិកដែលមិនធ្លាប់មានពីមុនមក ហើយដែលវិធានការនេះអាចមានផលប៉ះពាល់«ធ្ងន់ធ្ងរ»ដល់ឯកជនភាពរបស់ពលរដ្ឋ។ ក្រុមអតិថិជនមានប្រតិកម្មផ្សេងៗគ្នា។
អតិថិជនម្នាក់យល់ថា៖
«វិធានការនេះនឹងផ្តល់សិទ្ធិអំណាចឲ្យរដ្ឋាភិបាលអាចចូលទៅក្នុងទូរស័ព្ទអ្នករាល់គ្នា»។
អតិថិជនម្នាក់ទៀតយល់ថា៖
«បើសិនជាវិធានការនេះសម្រាប់តែការស៊ើបអង្កេតប៉ុណ្ណោះ ខ្ញុំគិតថា វាសមហេតុផល»។
សេតវិមានកាលពីថ្ងៃពុធសប្តាហ៍មុនបានបញ្ជាក់ថា ការស៊ើបអង្កេតទៅក្នុងអំពើភេរវកម្មនេះជាអាទិភាពមួយ ប៉ុន្តែអះអាងថា សិទ្ធិឯកជនរបស់ពលរដ្ឋនឹងមិនត្រូវប៉ះពាល់ទេ។
អ្នកនាំពាក្យសេតវិមាន លោក Josh Earnest បានពន្យល់ថា៖
«ពួកគេមិនបានសុំឲ្យ Apple ធ្វើការរចនាថ្មីឬបង្កើត «ច្រកចូលសម្ងាត់» ក្នុងផលិតផលមួយរបស់ខ្លួនទេ។ ពួកគេគ្រាន់តែសុំនូវអ្វីមួយដែលមានផលប៉ះពាល់ត្រឹមឧបករណ៍តែមួយហ្នឹង»។
ករណីនេះឆ្លុះបញ្ចាំងពីបញ្ហាកាន់តែធំឡើងសម្រាប់អាជ្ញាធរពង្រឹងច្បាប់របស់សហរដ្ឋអាមេរិក ជាពិសេសនៅតាមទីក្រុងធំៗដែលជាគោលដៅនៃពួកភេរវករដូចជាទីក្រុងញូវយ៉ក។
ចៅហ្វាយក្រុងញូវយ៉ក លោក Bill De Blasio និយាយថា៖
«យើងទាំងអស់គោរពសិទ្ធិរដ្ឋធម្មនុញ្ញ។ យើងទាំងអស់គ្នាសុទ្ធតែយល់ពីរឿងរសើបនានាទាក់ទងនឹងបញ្ហាសិទ្ធិឯកជន។ ប៉ុន្តែនៅទីបំផុត ក្រុមហ៊ុនទាំងអស់នេះ ទោះបីពួកគេមានចេតនាឬមិនមានក្តី ជាអកុសលពួកគេជួយបង្កឲ្យមានលក្ខណៈងាយស្រួលដល់ពួកភេរវករអាចប្រព្រឹត្តអំពើដ៏សាហាវរបស់ពួកគេ។ ហើយរឿងនេះត្រូវតែបញ្ឈប់។ រឿងសំខាន់គឺនៅត្រង់ថា ក្រុមហ៊ុនទាំងនេះត្រូវដាក់ប្រយោជន៍សាធារណៈឲ្យខ្ពស់ជាងគោលដៅផលចំណេញរបស់ពួកគេ ហើយពួកគេត្រូវធ្វើការជាមួយអាជ្ញាធររក្សាសន្តិសុខ»។
ភេរវករនៅទូទាំងពិភពលោកកាន់តែពឹងពាក់ខ្លាំងឡើងទៅលើកម្មវិធីកុំព្យូទ័រ (software) កាន់តែទំនើបជាងមុន ដើម្បីឲ្យអាជ្ញាធរពិបាកតាមដានពួកគេបាន។
សមាជិកព្រឹទ្ធសភាពីរដ្ឋ ញូវយ៉ក លោក Chuck Schumer ថ្លែងថា រឿងនេះគេមិនបង្កើតជាសំណុំរឿងច្បាប់មួយករណីម្តងៗនោះទេ។
«យើងត្រូវការដំណោះស្រាយមួយដែលការពារសិទ្ធិឯកជនយើងទាំងអស់គ្នា ប៉ុន្តែក្នុងពេលតែមួយនេះ ផ្តល់ឲ្យអាជ្ញាធរនូវមធ្យោបាយដែលពួកគេត្រូវការ»។
ដីកាមួយរបស់តុលាការកាលពីថ្ងៃអង្គារសប្តាហ៍មុន បានតម្រូវឲ្យក្រុមហ៊ុន Apple អនុញ្ញាតឲ្យក្រុមអ្នកស៊ើបអង្កេតអាចមានវិធីចៀសវាងប្រព័ន្ធលុបចោលទិន្នន័យ ស្វ័យប្រវត្តិ (auto-erase) របស់ iPhone នៅពេលលេខកូដខុសត្រូវបានគេបញ្ចូល១០ដង។ អ្នកជំនាញខាងបច្ចេកវិទ្យាមួយចំនួនអះអាងថា ក្រុមអ្នកលួចចូលកុំព្យូទ័រដែលគេហៅថា hackers នឹងអាចលួចរៀនផ្លូវកាត់នេះ ហើយប្រើវាសម្រាប់ចូលលួចព័ត៌មានសម្ងាត់ដែលបម្លែងជាកូដពីទូរស័ព្ទដៃនានាបាន៕
ប្រែសម្រួលដោយ សឹង សុផាត