សាលាឧទ្ធរណ៍បានសម្រេចនៅថ្ងៃចន្ទនេះ ឱ្យបុគ្គលិក និងអតីតបុគ្គលិកចំនួន៥រូបរបស់សមាគមការពារសិទ្ធិមនុស្សអាដហុកមានទោសដូចការការផ្តន្ទាទោសរបស់សាលាដំបូងរាជធានីភ្នំពេញក្នុងសំណុំរឿងសូកប៉ាន់សាក្សី និងសមគំនិតសូកប៉ាន់សាក្សី។
នៅក្នុងពេលប្រកាសសាលដីការបស់តុលាការឧទ្ធរណ៍ នៅថ្ងៃទី២៣ ខែឧសភា ឆ្នាំ២០២២នេះ មិនមានវត្តមានបុគ្គលិក និងអតីតបុគ្គលិករបស់សមាគមការពារសិទ្ធិមនុស្សអាដហុកនោះទេ ដោយសារពួកគេជាប់បេសកកម្មនៅតាមខេត្ត។ នេះបើតាមការបញ្ជាក់របស់មេធាវីការពារក្តីអ្នកទាំងប្រាំគឺលោក សំ ទិត្យសីហា។
បើតាមលោក សំ ទិត្យសីហា ថាសាក្សីសំខាន់ពីររូបគឺនាង ខុម ចាន់តារ៉ាទី និងអ្នកស្រី ទ្រី ឈួន ក៏គ្មានវត្តមានក្នុងថ្ងៃប្រកាសសាលដីកានេះដែរ។ លោកបន្ថែមថា អវត្តមានសាក្សីទាំងពីរនាក់នោះ ចាប់តាំងពីការផ្តើមនីតិវិធីជំនុំជម្រះក្តីនៅសាលាដំបូង បានធ្វើឱ្យប៉ះពាល់ដល់សិទ្ធិទទួលយុត្តិធម៌ត្រឹមត្រូវទៅតាមផ្លូវច្បាប់។
លោកប្រាប់ក្រុមអ្នកកាសែត នៅក្រៅរបងសាលាឧទ្ធរណ៍នៅថ្ងៃព្រឹកថ្ងៃចន្ទនេះថា៖ «ហ្នឹងហើយដែលយើងមានការសោកស្តាយមែនទែន ដោយសារតែអវត្តមាន...បើសិនជាមានវត្តមានរបស់ពួកគាត់ យើងនឹងសួរថា ពួកគាត់ក្លាយជាសាក្សីហ្នឹងចាប់ពីពេលណា។ ... ហើយសូម្បី កូនក្តីរបស់ខ្ញុំនៅតែបញ្ជាក់អះអាងថា ខុម ចាន់តារ៉ាទី រហូតមកដល់ថ្ងៃនេះ គាត់នៅតែជាមិនមែនសាក្សី គាត់នៅតែជាជនរងគ្រោះដែលមករកសេវាកម្មផ្លូវច្បាប់ពីសមាគមអាដហុក»។
អតីត និងបុគ្គលិកសមាគមអាដហុកទាំងប្រាំនោះ រួមមានលោក នី សុខា លោក យី សុខសាន្ត និងអ្នកស្រី លឹម មុន្នី និងអតីតបុគ្គលិកសមាគមនេះគឺលោក ណៃ វង់ដា និងលោក នី ចរិយា។ កាលពីខែកញ្ញា ឆ្នាំ២០១៨ សាលាដំបូងរាជធានីភ្នំពេញបានកាត់ទោសមន្រ្តីនិងអតីតមន្រ្តីការពារសិទ្ធិមនុស្ស៥រូបរបស់សមាគមអាដហុកម្នាក់ៗឱ្យជាប់ពន្ធនាគារចំនួន៥ឆ្នាំ៕