អ្នកតស៊ូមតិប្រឆាំងអំពើពុករលួយនៅកម្ពុជា ថ្លែងថា អំណាចរបស់ស្ថាប័នប្រឆាំងអំពើពុករលួយនៅកម្ពុជា នៅមានកម្រិតនៅឡើយ ដែលជាហេតុធ្វើឲ្យកិច្ចប្រឹងប្រែងប្រយុទ្ធប្រឆាំងអំពើពុករលួយទ្រង់ទ្រាយធំនៅក្នុងប្រទេស មិនសូវមានប្រសិទ្ធភាពខ្ពស់។
Your browser doesn’t support HTML5
Hello VOA៖ អំណាចរបស់ស្ថាប័នប្រឆាំងអំពើពុករលួយនៅកម្ពុជានៅមានកម្រិត
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា បានថ្លែងបែបនេះនៅក្នុងកម្មវិធី«Hello VOA»ប្រចាំខែស្ដីពីការប្រឆាំងអំពើពុករលួយកាលពីយប់ថ្ងៃព្រហស្បតិ៍ទី៩ ខែមីនានេះ៖ «ច្បាប់ដែលចែងហ្នឹង ឲ្យសិទ្ធិអំណាច ឲ្យសីល ឲ្យអាវក្រោះគាត់ដែរ ប៉ុន្តែ គាត់ក៏ត្រូវមានហានិភ័យដែរ ប្រសិនជាគាត់ធ្វើប៉ះអ្នកដែលមានអំណាចធំជាងគាត់ដែលផ្ទុយនឹងស្មារតីណាមួយ គាត់អាចនឹងមានបញ្ហា»។
របាយការណ៍របស់អង្គការតម្លាភាពអន្តរជាតិ ដែលទើបចេញផ្សាយកាលពីពេលថ្មីៗនេះ រកឃើញថាការប្រព្រឹត្តអំពើពុករលួយតូចតាចនៅក្នុងប្រទេសកម្ពុជាដូចជាការសូកប៉ាន់ជាទឹកប្រាក់បន្តិចបន្តួចដល់មន្ត្រីរដ្ឋាភិបាលឬអាជ្ញាធរមូលដ្ឋានជាដើម មានការធ្លាក់ចុះ។ ប៉ុន្តែ អំពើពុករលួយទ្រង់ទ្រាយធំ ដែលពាក់ព័ន្ធនឹងការរំលោភអំណាចនិងចំនួនទឹកប្រាក់ច្រើនម៉ឺនសែនឬដល់លានដុល្លារនោះ នៅតែជាបញ្ហាចោទដ៏ធំមួយ ដែលរាំងស្ទះដល់ដំណើរការអភិវឌ្ឍប្រទេសកម្ពុជាដដែល។
លោក ព្រាប កុល ថ្លែងថា នៅក្នុងប្រទេសមួយចំនួន ស្ថាប័នប្រឆាំងអំពើពុករលួយ ត្រូវបានផ្ដល់សិទ្ធិអំណាចយ៉ាងធំធេង ដែលមានឯករាជ្យភាពឬមិនរងឥទ្ធិពលពីបុគ្គលដែលមានអំណាចណាម្នាក់ឡើយ។
លោកបន្ថែមថា នៅក្នុងប្រទេសខ្លះទៀត ស្ថាប័នប្រឆាំងអំពើពុករលួយនេះ ថែមទាំងទទួលបានសិទ្ធិអំណាចកាត់សេចក្ដីក្នុងសំណុំរឿងពុករលួយធំៗថែមទៀតផង៕