ប្រធានាធិបតីកូរ៉េខាងត្បូងលោក Moon Jae In បាននិយាយថា លោកសង្ឃឹមថា ប្រធានាធិបតីសហរដ្ឋអាមេរិកលោក Donald Trump និងមេដឹកនាំកូរ៉េខាងជើងលោក Kim Jong Un នឹងជួបពិភាក្សាគ្នាម្ដងទៀត មុនការបោះឆ្នោតប្រធានាធិបតីសហរដ្ឋអាមេរិកចូលមកដល់នៅខែវិច្ឆិកាខាងមុខ។
មន្ត្រីកូរ៉េខាងត្បូងម្នាក់បានបញ្ជាក់នៅថ្ងៃពុធនេះថា កាលពីពេលថ្មីៗនេះ លោក Moon Jae In បានស្នើដូច្នេះទៅកាន់សេតវិមានប្រធានាធិបតីអាមេរិក។ មន្ត្រីរូបនេះបានបន្ថែមថា ភាគីសហរដ្ឋអាមេរិក «យល់» អំពីគោលជំហររបស់លោក Moon Jae In។
មន្ត្រីសហរដ្ឋអាមេរិកមិនបានឆ្លើយតបជាសាធារណៈចំពោះយោបល់របស់លោក Moon Jae In នៅឡើយទេ។ លោក Moon Jae In បានលើកឡើងដូច្នេះដំបូងនៅក្នុងកិច្ចសន្ទនាមួយកាលពីថ្ងៃអង្គារម្សិលមិញរវាងលោក និងមន្ត្រីសហភាពអឺរ៉ុបមួយចំនួន។
លោក Steve Biegun អនុរដ្ឋមន្ត្រីការបរទេសសហរដ្ឋអាមេរិក បានបញ្ជាក់កាលពីដើមសប្ដាហ៍នេះថា កិច្ចប្រជុំម្ដងទៀតរវាងលោក Trump និងលោក Kim Jong Un ទំនងជាមិនអាចធ្វើបានមុនខែវិច្ឆិកានោះទេ ដោយមួយផ្នែកបណ្ដាលមកពីការព្រួយបារម្ភទាក់ទិននឹងរឿងជំងឺកូវីដ១៩។
ប៉ុន្តែលោក Biegun ដែលជាអ្នកចរចាចម្បងរបស់សហរដ្ឋអាមេរិកលើកិច្ចការកូរ៉េខាងជើងបាននិយាយថា រដ្ឋាភិបាលក្រុងវ៉ាស៊ីនតោននៅតែបើកចំហរចំពោះការពិភាក្សាជាមួយនឹងរដ្ឋាភិបាលក្រុងព្យុងយ៉ាង។ លោកបានបន្ថែមថា គោលបំណងរបស់សហរដ្ឋអាមេរិកគឺនៅតែដដែល ដែលនោះគឺ «ការលុបបំបាត់ទាំងស្រុងចុងក្រោយនៃអាវុធនុយក្លេអ៊ែរនៅលើឧបទ្វីបកូរ៉េ»៕