គ្រោះរញ្ជួយដីកម្រិត ៦,៩ បានកើតឡើងនៅលើកោះ Lombok នៃប្រទេសឥណ្ឌូណេស៊ី កាលពីថ្ងៃអាទិត្យ ប៉ុន្មានម៉ោងបន្ទាប់គ្រោះរញ្ជួយដីកម្រិត ៦,៣ បានកើតឡើងនៅលើកោះនេះរួចហើយ។ នេះបើយោងតាមទីភ្នាក់ងារវាស់ស្ទង់ភូមិសាស្ត្រអាមេរិក។
គ្រោះរញ្ជួយដីពីរតូចៗជាងនេះត្រូវបានគេរាយការណ៍ថាបានកើតឡើងក្នុងពេលប្រហាក់ប្រហែលគ្នា។
គ្រោះរញ្ជួយដីកាលពីថ្ងៃអាទិត្យបានបង្កឲ្យមានការបាក់ដីនិងបានបង្ខំឲ្យប្រជាពលរដ្ឋជម្លៀសខ្លួនទៅកាន់កន្លែងសុវត្ថិភាព ប៉ុន្តែមិនមានសេចក្តីរាយការណ៍ពីតួលេខអ្នកស្លាប់ភ្លាមៗនោះទេ។ គ្រោះរញ្ជួយដីទាំងនោះបានកើតឡើងក្នុងរយៈពេលពីរសប្តាហ៍ បន្ទាប់ពីគ្រោះរញ្ជួយដីមួយបានកើតឡើងនៅលើកោះនេះ និងបានធ្វើឲ្យមនុស្សជាង៤០០នាក់បាត់បង់ជីវិត។
មានសេចក្តីរាយការណ៍អំពីគ្រោះបាក់ដីនៅក្នុងឧទ្យានជាតិមួយកាលពីថ្ងៃអាទិត្យ នៅលើភ្នំ Rinjani ទីដែលមនុស្សរាប់រយនាក់ជាប់នៅទីនោះ បន្ទាប់ពីគ្រោះរញ្ជួយដីកាលពីថ្ងៃទី២៩ ខែ កក្កដា ដែលបានសម្លាប់មនុស្សអស់ចំនួន១៧នាក់។ ឧទ្យានជាតិនោះត្រូវបានបិទចាប់តាំងពីថ្ងៃនោះមក។
គ្រោះរញ្ជួយដីកម្រិត ៦,៩ ដែលបានកើតឡើងនៅលើកោះ Lombok កាលពីថ្ងៃទី៥ ខែសីហា បានសម្លាប់មនុស្សអស់ចំនួន៤៣៦នាក់និងបានបង្ខំឲ្យមនុស្សជាង៣សែន៥ម៉ឺននាក់ជម្លៀសខ្លួនចេញពីផ្ទះសម្បែងរបស់ពួកគេ៕