ក្រសួងអប់រំ យុវជន និងកីឡា នៅថ្ងៃពុធនេះ បានបង្កើតគណៈកម្មការកោសល្យវិច័យមួយ ដើម្បីដោះស្រាយបណ្តឹងរបស់បេក្ខជន ដែលមិនសុខចិត្តនឹងលទ្ធផលប្រឡងមធ្យមសិក្សាទុតិយភូមិ ក្នុងរយៈពេលមួយសប្តាហ៍។
សេចក្ដីប្រកាសព័ត៌មានរបស់ក្រសួងអប់រំ យុវជន និងកីឡា ចេញនៅថ្ងៃទី១២ ខែកញ្ញា ឆ្នាំ២០១៨នេះ បញ្ជាក់ក្នុងន័យដើមថា៖
«ក្រសួងបានរៀបចំគណៈកម្មការកោសល្យវិច័យដើម្បីពិនិត្យដោះស្រាយចំពោះការមិនពេញចិត្តនឹងលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី២០ សីហា២០១៨ ជូនបេក្ខជន មាតាបិតា អាណាព្យាបាល ឬអ្នកពាក់ព័ន្ធ ប្រកបដោយវិជ្ជាជីវៈ និងស្មារតីទទួលខុសត្រូវខ្ពស់ ដូចធ្លាប់អនុវត្តតាមនីតិវិធីនាឆ្នាំកន្លងមក»។
លោកឌី ខាំប៉ូលី អ្នកនាំពាក្យក្រសួងអប់រំ យុវជន និងកីឡា បានប្រាប់ VOA នារសៀលថ្ងៃពុធនេះថា ក្រសួងទទួលបានបណ្តឹងប្រមាណជា៥០០ពីបេក្ខជនដែលស្នើឲ្យក្រសួងពិនិត្យឡើងវិញពីពិន្ទុពាក់ព័ន្ធនឹងមុខវិជ្ជាគណិតវិទ្យា។ លោកបន្ថែមថា គណៈកម្មការដែលទើបបង្កើតនេះនឹងពិនិត្យមើលពាក្យបណ្តឹងទាំងនោះ មុននឹងសម្រេចថា ត្រូវដោះស្រាយដោយវិធីណា។
លោកបញ្ជាក់ថា៖
«ជាទូទៅ មិនទាន់មានការសម្រេចជាគោលការណ៍ណាមួយទេ បានន័យថា គណៈកម្មការកោសល្យវិច័យ រួមនឹងអនុគណៈកម្មការទាំងអស់ កំពុងធ្វើកិច្ចការហ្នឹង។ អ៊ីចឹងទាល់តែទុកពេលឲ្យគណៈកម្មការ និងអនុគណៈកម្មការទាំងអស់ធ្វើកិច្ចការហ្នឹងមួយសប្តាហ៍សិន ទើបបានអាចដឹងលទ្ធផលថា តើនឹងមានចំណាត់ការយ៉ាងម៉េចជាបន្តទៀត»។
លោកឌី ខាំប៉ូលី បន្ថែមថា បេក្ខជនដែលមិនសុខចិត្តនឹងលទ្ធផលប្រឡងរបស់ខ្លួន អាចដាក់ពាក្យទៅក្រសួងអប់រំក្នុងរយៈពេលមួយខែ ចាប់ពីពេលប្រកាសលទ្ធផលប្រឡង ដែលទើបចេញកាលពីថ្ងៃទី៩ ខែកញ្ញា។
ការបង្កើតគណៈកម្មការកោសល្យវិច័យនេះធ្វើឡើង បន្ទាប់ពីបេក្ខជនប្រឡងសញ្ញាប័ត្រមធ្យមសិក្សាទុតិយភូមិជាច្រើននាក់ បានប្រមូលគ្នាតវ៉ានៅខាងមុខក្រសួងដើម្បីទាមទារឲ្យដោះស្រាយពាក់ព័ន្ធនឹងពិន្ទុមុខវិជ្ជាគណិតវិទ្យា ដែលពួកគេបានអះអាងថា លទ្ធផលនៃពិន្ទុទាំងនោះមានភាពមិនប្រក្រតី ខណៈសិស្សពូកែផ្នែកគណិតវិទ្យាទទួលបានពិន្ទុទាប និងខ្លះធ្លាក់មុខវិជ្ជានេះក៏មាន។
លោកសន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា ប្រាប់ VOA ថា ភាពមិនប្រក្រតីក្នុងការប្រឡង និងលទ្ធផលប្រឡង តែងកើតមានជារឿយៗស្ទើររៀងរាល់ឆ្នាំ ដែលលោកថា ករណីទាំងនេះអាចធ្វើឲ្យសិស្សបាក់ទឹកចិត្តក្នុងការប្រឡង។ លោកបន្ថែមថា ក្រសួងគួរបង្កើនការប្រុងប្រយ័ត្ន និងយកចិត្តទុកដាក់ឲ្យបានខ្ពស់លើករណីទាំងនេះ ចៀសវាងកំហុសកើតមានដដែលៗ។
លោកបញ្ជាក់ថា៖
«បើរឿងពីមួយទៅមួយចេះតែកើតមានអ៊ីចឹង វាអាចថា នឹងធ្វើឲ្យមានការបាក់ទឹកចិត្តខ្លះៗដែរទៅដល់បេក្ខជន។ ប៉ុន្តែបើសិនជាមានការកើតឡើង ហើយមានដំណោះស្រាយត្រឹមត្រូវ មានការបំភ្លឺជាលក្ខណៈវិទ្យាសាស្រ្តទៅដល់បេក្ខជន ហើយនឹងមានលទ្ធផលមួយដែលគេអាចទទួលយកបាន បានន័យថា បេក្ខជនហ្នឹងទទួលបានលទ្ធផលមួយដែលជាទីកក់ក្តៅ ជាទីពេញចិត្ត វាអាចនឹងស្រោចស្រង់នូវជំនឿរបស់ពួកគេ មកលើលទ្ធផលហ្នឹងបានដែរ»។
លទ្ធផលប្រឡងមធ្យមសិក្សាទុតិយភូមិ ឬហៅថា បាក់ឌុប បានប្រកាសជាផ្លូវការកាលពីថ្ងៃទី៩ ខែកញ្ញា នៅរាជធានីភ្នំពេញ និងខេត្តកណ្តាល និងបានប្រកាសជាផ្លូវការតាមបណ្តាខេត្តនៅថ្ងៃទី១០ ខែកញ្ញា។
ក្នុងសម័យប្រឡងឆ្នាំ២០១៨នេះ មានបេក្ខជនជាប់សរុបចំនួនជាង៧ម៉ឺននាក់ (៧៥,០៥៩នាក់) ស្មើនឹង៦៦.២១% នៃបេក្ខជនប្រឡងសរុបចំនួន១១៥,២៦៨នាក់។ ចំនួនសិស្សប្រឡងជាប់បាក់ឌុបនៅឆ្នាំនេះកើនឡើងជាងឆ្នាំមុន ប៉ុន្តែចំនួនសិស្សទទួលបាននិទ្ទេស A ថយចុះដល់ទៅជាង៣០ភាគរយ៕