អង្គការសិទ្ធិមនុស្ស Amnesty International នៅថ្ងៃចន្ទនេះបានចោទប្រកាន់ប្រទេសរុស្ស៊ីពីបទឧក្រិដ្ឋកម្មសង្គ្រាមនៅក្នុងប្រទេសអ៊ុយក្រែនដោយបាននិយាយថា ការវាយប្រហារនៅក្នុងទីក្រុង Kharkiv មានការប្រើប្រាស់គ្រាប់បែកចង្កោមយ៉ាងច្រើនដែលត្រូវបានហាមប្រាម និងបានបង្កឱ្យជនស៊ីវិលរាប់រយនាក់ស្លាប់។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
អង្គការសិទ្ធិមនុស្ស Amnesty International បានបញ្ជាក់នៅក្នុងរបាយការណ៍ស្តីពីទីក្រុងធំទី២របស់អ៊ុយក្រែនថា«ការ បាញ់ផ្លោងដាក់សង្កាត់ដែលមានអ្នកស្រុករស់នៅជាច្រើនដងនៅក្នុងទីក្រុង Kharkiv ជាការ វាយប្រហារមិនរើសមុខ ដែលបានសម្លាប់និងធ្វើឱ្យរបួសជនស៊ីវិលរាប់រយនាក់ ហើយសកម្មភាពបែបនេះជាបទឧក្រិដ្ឋកម្មសង្គ្រាម»។
របាយការណ៍នោះបានបញ្ជាក់ទៀតថា «ការបន្តប្រើប្រាស់អាវុធផ្ទុះដែលគ្មានទិសដៅនៅក្នុងតំបន់ដែលមានប្រជាពលរដ្ឋរស់នៅបែបនេះ ជាការទទួលស្គាល់ថា ពួកគេកំពុងធ្វើឱ្យស្លាប់និងរបួសជនស៊ីវិលក្នុងចំនួនយ៉ាងច្រើនដែលអាចជាការបង្កើនការវាយប្រហារដោយផ្ទាល់ប្រឆាំងនឹងជនស៊ីវិល»។
អង្គការសិទ្ធិមនុស្ស Amnesty បាននិយាយទៀតថា ខ្លួនបានរកឃើញភស្តុតាងនៅក្នុងទីក្រុង Kharkiv ដែលកងទ័ពរុស្ស៊ីបានប្រើប្រាស់នូវគ្រាប់បែកចង្កោមប្រភេទ 9N210 និង 9N235 និងគ្រាប់មីនដែលដាក់រាយស្កះដែលអាវុធទាំងអស់នេះត្រូវបានហាមឃាត់នៅក្រោមអនុសញ្ញាអន្តរជាតិ។
គ្រាប់បែកចង្កោមបានបញ្ចេញគ្រាប់បែកតូចៗនៅក្នុងអាកាសហើយពង្រាយគ្រាប់បែកតូចៗនៅលើផ្ទៃដីរាប់រយម៉ែត្រការ៉េ។
លោកស្រី Donatella Rovera ជាទីប្រឹក្សាជាន់ខ្ពស់នៃអង្គការ Amnesty International បាននិយាយថា«មនុស្សត្រូវបានគេសម្លាប់នៅក្នុងផ្ទះរបស់ពួកគេនិងនៅតាមផ្លូវ នៅទីកន្លែងលេងនិងកន្លែងបញ្ចុះសព ខណៈពេលពួកគេកំពុងឈរតម្រង់ជួរដើម្បីទទួលជំនួយមនុស្ស ធម៌ឬទិញម្ហូបអាហារនិងថ្នាំសង្កូវ» នោះ។
លោកស្រីបាននិយាយទៀតថា«ការប្រើប្រាស់គ្រាប់បែកចង្កោមដែលត្រូវបានហាមឃាត់ជាទូទៅនោះកំពុងធ្វើឱ្យមានការរន្ធត់ ហើយជាការបង្ហាញពីការមិនគោរពដល់អាយុជីវិតជនស៊ី វិល»។
លោកស្រីបានបញ្ជាក់ទៀតថា៖ «កងទ័ពរុស្ស៊ីជាអ្នកទទួលខុសត្រូវចំពោះការវាយប្រហារដ៏គួរឱ្យរន្ធត់ហើយត្រូវតែទទួលខុសត្រូវ»ទៅលើរឿងនេះ។
រដ្ឋបាលយោធាក្រុង Kharkiv បានប្រាប់អង្គការ Amnesty ថា ជនស៊ីវិលចំនួន៦០៦នាក់បានត្រូវសម្លាប់ ហើយ១.២៤៨នាក់ទៀតបានរងរបួសនៅក្នុងតំបន់នោះចាប់តាំងពីសង្គ្រាមបានចាប់ផ្តើមមក៕