លោករដ្ឋមន្ត្រីការបរទេសអាមេរិក Tillerson បានធ្វើជាម្ចាស់ផ្ទះរៀបចំទទួលរដ្ឋមន្ត្រីការបរទេសមកពីសមាគមអាស៊ានកាលពីថ្ងៃព្រហស្បតិ៍ ជាជំនួបមួយដើម្បីពង្រឹងភាពជាដៃគូយុទ្ធសាស្ត្ររវាងសហរដ្ឋអាមេរិកហើយនឹងសមាជិក១០ប្រទេសរបស់សមាគមប្រជាជាតិតំបន់អាស៊ីអាគ្នេយ៍ ឬអាស៊ាន នេះបើយោងតាមក្រសួងការបរទេសសហរដ្ឋអាមេរិក។
នៅក្នុងសន្និសីទតាមទូរស័ព្ទជាមួយពួកអ្នកយកព័ត៌មាននៅក្នុងតំបន់នេះ លោក W. Patrick Murphy ឧបការីរងរដ្ឋមន្ត្រីការបរទេសសហរដ្ឋអាមេរិកទទួលបន្ទុកកិច្ចការអាស៊ីខាងកើត និងមហាសមុទ្រប៉ាស៊ីហ្វិកបានច្រានចោលការនិយាយថា អវត្តមានរបស់លោកស្រីអង់សាន ស៊ូជី គ្មានអ្វីលើសពីជាប់កម្មវិធីជាន់ពេលគ្នានោះទេ។
លោក Murphy បានមានប្រសាសន៍ថា «ខ្ញុំចង់បញ្ជាក់ថា សហរដ្ឋអាមេរិក និងមីយ៉ាន់ម៉ា ឬភូមា មានទំនាក់ទំនងយ៉ាងល្អ»។ សហរដ្ឋអាមេរិកនៅតែហៅប្រទេសនោះថា ភូមា ដែលរដ្ឋាភិបាលយោធាបានប្តូរទៅជាមីយ៉ាន់ម៉ានៅឆ្នាំ១៩៨៩។
លោក Murphy បានមានប្រសាសន៍ទៀតថា ទីប្រឹក្សាសន្តិសុខជាតិរបស់លោកស្រី ស៊ូជីបានតំណាងឲ្យមីយ៉ាន់ម៉ា ហើយថា លោកបានប្រគល់លិខិតមួយច្បាប់ពីលោកស្រីស៊ូជីជូនលោករដ្ឋមន្ត្រីការបរទេសអាមេរិក Tillerson ទោះយ៉ាងនោះក៏ដោយលោកមិនបានបរិយាយលម្អិតអំពីអ្វីដែលលិខិតបាននិយាយទេ។
លោក Murphy បានធ្វើការពន្យល់ថា ជាការចៃដន្យ លោកស្រីទីប្រឹក្សារដ្ឋអង់សាន ស៊ូជី បានប្តេជ្ញាកាលពីពេលមុនថា នឹងធ្វើដំណើរទៅកាន់បរទេស។ លោកស្រីបានស្ថិតនៅតំបន់អឺរ៉ុបនៅសប្តាហ៍នេះ។ ហើយការប្តេជ្ញានោះត្រូវបានធ្វើឡើងមុនជំនួបជាមួយរដ្ឋមន្ត្រីការបរទេសនៅក្នុងរដ្ឋធានីវ៉ាស៊ីនតោន។ ដោយរារាំងមិនឲ្យកាន់តំណែងជាប្រធានាធិបតីដោយរដ្ឋធម្មនុញ្ញដែលព្រាងឡើងដោយពួកយោធា លោក ស្រីស៊ូជីបានកាន់តំណែងរដ្ឋមន្ត្រីការបរទេស និងទីប្រឹក្សារដ្ឋនៅពេលដែលគណបក្សរបស់លោកស្រីបានកាន់អំណាចកាលពីឆ្នាំទៅបន្ទាប់ពីការបោះឆ្នោតតាមបែបលទ្ធិប្រជាធិបតេយ្យដែលបានបញ្ចប់ការគ្រប់គ្រងរបស់ពួកយោធាអស់រយៈពេលជាង២ទសវត្សរ៍។
លោកស្រីស៊ូជីមានទំនាក់ទំនងយ៉ាងជិតស្និទ្ធជាមួយរដ្ឋបាលរបស់លោកអូបាម៉ាដែលបានយកចិត្តទុកដាក់យ៉ាងខ្លាំងដល់តំបន់អាស៊ីអាគ្នេយ៍ហើយជាពិសេសប្រទេសមីយ៉ាន់ម៉ា ដោយបានទម្លាក់ចោលការដាក់ទណ្ឌកម្មដែលនៅសេសសល់ប្រឆាំងនឹងប្រទេសនោះ។
រដ្ឋបាលរបស់ប្រធានាធិបតីត្រាំ បានខិតខំនៅពេលថ្មីៗនេះដើម្បីទាក់ទងជាមួយពួកមេដឹកនាំអាស៊ាន។ បន្ថែមពីជំនួបជាមួយលោករដ្ឋមន្ត្រីការបរទេស Tillerson លោកប្រធានាធិបតីត្រាំបានចេញសេចក្តីអញ្ជើញដាច់ដោយឡែកដល់លោក Prayuth Chan-ocha មេដឹកនាំថៃ និងលោកប្រធានាធិបតី Rodrigo Duterte នៃប្រទេសហ្វីលីពីនមកកាន់សេតវិមាន ដែលកំពុងបង្កើនការតវ៉ាប្រឆាំងពីពួកអ្នកគាំទ្រសិទ្ធិមនុស្ស។
លោក Prayuth បានប្រព្រឹត្តអំពើឃោរឃៅកាន់តែខ្លាំងឡើងនៅក្នុងប្រទេសថៃ ខណៈដែលលោក Duterte បានធ្វើសង្គ្រាមប្រឆាំងថ្នាំញៀនដែលបានសម្លាប់មនុស្សរាប់ពាន់នាក់។
សេចក្តីអញ្ជើញទាំងនោះ គួបផ្សំការមិនយកចិត្តដាក់ចំពោះប្រទេសមីយ៉ាន់ម៉ាហើយនឹងការដកខ្លួនរបស់លោកត្រាំចេញពីកិច្ចព្រមព្រៀងពាណិជ្ជកម្មដៃគូឆ្លងកាត់មហា សមុទ្រប៉ាស៊ីហ្វិកផង បានធ្វើឲ្យមានចំណាប់អារម្មណ៍ថា រដ្ឋបាលរបស់លោកត្រាំមានឆន្ទៈមិនអើពើពីការរំលោភសិទ្ធិមនុស្សខណៈដែលមានការនិយាយពីការខ្វះ ទស្សនៈចំពោះតំបន់នោះ។ ជំនួបកាលពីថ្ងៃព្រហស្បតិ៍សប្តាហ៍មុន បានត្រូវគ្របដណ្តប់ដោយការពិភាក្សាអំពីជម្លោះនៅផ្នែកនានានៃសមុទ្រចិនខាងត្បូង និងប្រទេសកូរ៉េខាងជើង។ មានសេចក្តីរាយការណ៍ថា លោករដ្ឋមន្ត្រីការបរទេសអាមេរិក Tillerson បានជំរុញឲ្យរដ្ឋជាសមាជិកស្ថិតនៅឲ្យឆ្ងាយពីរដ្ឋាភិបាលក្រុងព្យុងយ៉ាង។
លោក Paul Chambers ជាគ្រូឧទ្ទេសនៅឯមហាវិទ្យាល័យមួយដែលសិក្សាពីសហគមន៍អាស៊ាននៅក្នុងប្រទេសថៃ បាននិយាយនៅក្នុងសារតាមប្រព័ន្ធអ៊ីម៉ែលថា «ផ្ទុយគ្នាទៅនឹងភាពប្រាកដប្រជា និងការគាំទ្រសកម្មភាពនៃគោលនយោបាយរបស់រដ្ឋបាលអូបាម៉ាចំពោះតំបន់អាស៊ីអាគ្នេយ៍ គោលនយោបាយរបស់ប្រធានាធិបតីត្រាំចំពោះសមាគមអាស៊ាន (ដូចជាកិច្ចព្រមព្រៀង TPPសិទ្ធិមនុស្ស ហើយជាពិសេសចំពោះភូមា បានត្រូវជាប់ផុងនៅក្នុងភាពមិនច្បាស់លាស់ ភាពយឺតយ៉ាវនៃការផ្ទេរតំណែងប្រធានាធិបតី ការកាត់បន្ថយថវិការបស់ក្រសួងការបរទេសសហរដ្ឋអាមេរិកនិងអាទិភាពដែលបានប្រកាសជាសាធារណៈរបស់ប្រធានាធិបតីត្រាំដែល «គិតពីប្រទេសអាមេរិកមុន»។
លោកបាននិយាយទៀតថា «ការណ៍នេះជាការងឿងឆ្ងល់ដ៏តូចមួយថា មីយ៉ាន់ម៉ា នៅ ពេលបច្ចុប្បន្ននេះហាក់ដូចជាងាកទៅប្រទេសចិន។
រដ្ឋាភិបាលក្រុងប៉េកាំង កំពុងស្វះស្វែងផ្តល់ការវិនិយោគទុនយ៉ាងសម្បើម និងជំនួយអភិវឌ្ឍន៍ផ្លូវការ (ODA) ខណៈដែលរដ្ឋបាលរបស់លោកត្រាំ ហាក់ដូចជាមានការយល់ច្រឡំពីការបកស្រាយគោលនយោបាយការបរទេសរបស់ខ្លួន។ ប្រទេសមីយ៉ាន់ម៉ាកាលពីពេលថ្មីៗនេះបានចុះហត្ថលេខាលើកិច្ចព្រមព្រៀងមួយដើម្បីបញ្ជូនប្រេងទៅកាន់ប្រទេសចិនតាមបំពង់បង្ហូរប្រេង ខណៈដែលចិន បានក្លាយជាកត្តាមួយនៅក្នុងការចរចាសន្តិភាពជាមួយក្រុមជនជាតិភាគតិច និងក្រុមប្រដាប់អាវុធ។
កាលពីខែមុន មន្ត្រីចិនម្នាក់បានប្រាប់ទីភ្នាក់ងារព័ត៌មាន Reuters ថា រដ្ឋាភិបាលចិន អាចជួយសម្រុះសម្រួលជម្លោះរវាងប្រទេសមីយ៉ានម៉ា និងបង់ក្លាដែស។ ជនជាតិភាគតិចរ៉ូហ៊ីងយ៉ាកាន់សាសនាឥស្លាមរាប់ម៉ឺននាក់បានឆ្លងកាត់ព្រំដែនចូលក្នុងប្រទេសបង់ក្លាដែសដើម្បីគេចចេញពីការបង្ក្រាបដ៏ប្រល័យដោយពួកយោធាមីយ៉ាន់ម៉ានៅ ពេលដែលខ្លួនស្វះស្វែងកម្ទេចក្រុមជនសកម្មប្រយុទ្ធដែលទទួលខុសត្រូវចំពោះការ វាយប្រហារប៉ុស្តិ៍យាមល្បាតព្រំដែនកាលពីខែតុលាដែលបានសម្លាប់មន្ត្រីប៉ូលិស៩នាក់។
ទោះយ៉ាងណាក៏ដោយ នៅដើមសប្តាហ៍នេះ មន្ត្រីជាន់ខ្ពស់ម្នាក់នៅក្រសួងកិច្ចការបរទេសមីយ៉ាន់ម៉ា បានប្រាប់ទីភ្នាក់ងារព័ត៌មាន Reuters ថា «យើងនឹងមិនបង្កើនទំនាក់ទំនងជាមួយប្រទេសណាដែលធ្វើឲ្យប៉ះពាល់ប្រទេសមួយផ្សេងទៀតទេ»៕
ប្រែសម្រួលដោយ ជឹង ប៉ូជីន