បទឈប់បាញ់គ្នានៅស៊ីរីបាននាំមកនូវភាពស្ងប់ស្ងៀមខ្លះៗដល់នៅតំបន់ភាគច្រើននៃប្រទេសស៊ីរី ជាលើកដំបូងក្នុងរយៈពេលជាច្រើនឆ្នាំកន្លងមកនេះ។
ការផ្អាកបាញ់គ្នានេះ ដែលផ្តួចផ្តើមដោយសហរដ្ឋអាមេរិកនិងរុស្ស៊ី បានចាប់ផ្តើមកាលពីថ្ងៃសៅរ៍ ប៉ុន្តែក៏នៅមានហេតុការណ៍ហិង្សាខ្លះៗដែរ។ ទោះបីជាយ៉ាងនេះក្តី ប្រេសិតពិសេសរបស់អង្គការសហប្រជាជាតិទទួលបន្ទុកបញ្ហាស៊ីរីបានថ្លែងថា ថ្ងៃដំបូងនៃការអនុវត្តបទឈប់បាញ់គ្នានេះ «គួរឲ្យទុកចិត្តបានគ្រាន់បើ»។
លោក Staffan de Mistura មានប្រសាសន៍ថា គេរំពឹងថានឹងមានអំពើហិង្សាខ្លះៗក្រោយពីជម្លោះអស់រយៈពេល៥ឆ្នាំមកនោះ។ ប៉ុន្តែលោកបានបន្ថែមថា «ថ្ងៃនិងយប់ដំបូងនេះពិតជាបានធ្វើឲ្យគ្រប់គ្នាមានអារម្មណ៍ថា ទាំងអស់គ្នាពិតជាធ្វើតាមការប្តេជ្ញាចិត្តរបស់ខ្លួនមែន ដើម្បីបន្តឆ្ពោះទៅរកការបញ្ឈប់ការប្រយុទ្ធគ្នា»។
សម្ព័ន្ធក្រុមប្រឆាំងនៅស៊ីរី ដែលគេហៅថាគណៈកម្មការចរចាកម្រិតខ្ពស់នោះនិយាយថា ពួកគេចំនួន៩៧ក្រុមបានសន្យាថានឹងចូលរួមនៅក្នុងកិច្ចព្រៀមព្រៀងឈប់បាញ់គ្នានេះ។
បទឈប់បាញ់គ្នានេះមិនរាប់បញ្ចូលក្រុមរដ្ឋឥស្លាម និងក្រុមភេរវកម្ម al-Nusra Front ដែលមានចំណងទាក់ទងនឹងក្រុមអាល់កៃដានោះទេ៕