ធនាគារវិនិយោគហេដ្ឋារចនាសម្ព័ន្ធអាស៊ីហៅកាត់ថា AIIB មានមូលដ្ឋានក្នុងក្រុងប៉េកាំង បានគូសបញ្ជាក់អំពីឯករាជ្យភាពរបស់ខ្លួនពីឥទ្ធិពលរបស់ប្រទេសចិន ហើយបាននិយាយថា សេចក្តីសម្រេចចិត្តលើគម្រោងការរបស់ខ្លួននឹងមិនលម្អៀងឡើយ។ ក៏ប៉ុន្តែនៅក្នុងការប្រជុំប្រចាំឆ្នាំលើកទីមួយរបស់ធនាគារនេះកាលពីចុងសប្តាហ៍មុន គេឃើញមានសមាជិកខ្លះខ្វល់ខ្វាយអំពីបញ្ហានេះ។
ការប្រជុំនេះបានលាតត្រដាងឱ្យដឹងថា ធនាគារថ្មីនេះបានយល់ព្រមឱ្យមានការខ្ចីប្រាក់ ៥០៩ លានដុល្លារសម្រាប់គម្រោងបួន ចាប់តាំងពីធនាគារនេះបានបើកដំណើរការកាលពីខែមករាមុនមក។
ធនាគារ AIIB មានដៃគូជាមួយធនាគារអភិវឌ្ឍន៍ពហុភាគីបីទៀត គឺធនាគារពិភពលោក ធនាគារអភិវឌ្ឍន៍អាស៊ី និងធនាគារអឺរ៉ុបសម្រាប់ការកសាងជាថ្មីនិងការអភិវឌ្ឍន៍។ ភាពជាដៃគូនេះ គឺសម្រាប់ការផ្តល់ប្រាក់កាសរួមគ្នាដើម្បីកសាងគម្រោងនានា។
ក៏ប៉ុន្តែនៅតែមានកង្វល់ថា ប្រទេសចិនដែលមានភាគហ៊ុនច្រើនជាងគេនៅក្នុងធនាគារ AIIB នេះ នឹងមានឥទ្ធិពលខ្លាំងលើកិច្ចប្រតិបត្តិការរបស់ធនាគារនេះ និងណែនាំធនាគារនេះឱ្យគាំទ្រគម្រោងការ One Belt, One Road ដែលគេស្គាល់ដែរថាជាកម្មវិធីផ្លូវសូត្ររបស់រដ្ឋាភិបាលក្រុងប៉េកាំង។
លោកឧបនាយករដ្ឋមន្ត្រីចិន Zhang Gaoli ដែលបាននិយាយនៅក្នុងការប្រជុំរបស់ធានាគារនេះ បានណែនាំធនាគារនេះឱ្យគាំទ្រប្រទេសជាសមាជិកនិងធ្វើកិច្ចសហប្រតិបត្តិការជាមួយផែនការរដ្ឋាភិបាលស្តីពីផ្លូវសូត្រ។ លោកបាននិយាយយោងជាពិសេសដល់ហេដ្ឋារចនាសម្ព័ន្ធមិនគ្រប់គ្រាន់នៅក្នុងផ្នែកកណ្តាលនៃទ្វីបអាស៊ី ដែលជាការតភ្ជាប់សំខាន់មួយរបស់ផ្លូវសូត្រដែលភ្ជាប់ប្រទេសចិនជាមួយទ្វីបអឺរ៉ុប៕