ការចរចាប្រាក់ឈ្នួលអប្បបរមាសម្រាប់វិស័យកាត់ដេរចាប់ផ្តើមដំណើរការនៅសប្តាហ៍នេះ ដោយភាគីតំណាងកម្មករបានស្នើប្រាក់ឈ្នួល២១៥ដុល្លារដើម្បីជជែកជាមួយភាគីនិយោជក។
ការកំណត់ប្រាក់ឈ្នួលអប្បបរមាផ្លូវការនឹងអាចធ្វើឡើង នៅខែកញ្ញាខាងមុខ បន្ទាប់ពីការចរចាដែលចាប់ផ្តើមកាលពីថ្ងៃពុធ។
ប្រធានសហជីពចលនាកម្មករកម្ពុជា លោក ប៉ាវ ស៊ីណា ប្រាប់វីអូអេនៅថ្ងៃព្រហស្បតិ៍នេះថា ការស្នើសុំដំឡើងប្រាក់ឈ្នួលកម្មករសម្រាប់ឆ្នាំ២០២៣ឱ្យដល់២១៥ដុល្លារនេះ ធ្វើឡើងដោយយោងទៅតាមស្ថានភាពនៃការចាយវាយរបស់កម្មករដែលកំពុងកើនឡើង ស្របពេលតម្លៃទំនិញលើទីផ្សារហក់ឡើងខ្ពស់។
លោកនិយាយថា៖ «ហើយមួយទៀត ពាក់ព័ន្ធទៅនឹងការនាំចេញ យើងឃើញមានការកើនឡើង ប្រាក់ចំណេញ។ និយោជកនៅតែមានការចំណេញដដែល ដូច្នេះយើងពិនិត្យឃើញថា ចំណុចនេះ ដែលជាចំណុចដែលយើងស្នើ ដូចជាការនាំចេញ ចំនួនផលិតផលដែលកម្មករផលិតកើនឡើង ដូច្នេះយើងធ្វើការស្នើសុំទាំងអស់វា១០.៦២ភាគរយ»។
លោកបន្ថែមថា៖ «ដូច្នេះហើយនេះ ជាហេតុផលដែលយើងយកទៅធ្វើការចរចាជាមួយនឹងភាគីខាងថៅកែ។ ហើយបើយើងពិនិត្យថា តើការដំឡើង ប្រាក់ឈ្នួលប៉ុណ្ណឹង តើអាចឆ្លើយតបទៅនឹងជីវភាពរស់នៅរបស់បងប្អូនទេ។ វាជាធម្មតាសម្រាប់ខ្ញុំ គឺខ្ញុំមើលឃើញថា ប្រាក់ឈ្នួលទោះបីឡើងប៉ុណ្ណឹងក៏ដោយ ក៏នៅតែមិនទាន់ឆ្លើយតបនៅឡើយទេ»។
បើតាមលោក ប៉ាវ ស៊ីណា ភាគីនិយោជករក្សាជំហរផ្តល់ឱ្យកម្មករនិយោជិត ចំនួន១៩៤ដុល្លារសហរដ្ឋអាមេរិក សម្រាប់ការកំណត់ និងដំឡើងប្រាក់ឈ្នួលអប្បបរមានៅឆ្នាំ២០២៣ខាងមុខ ដោយលើកហេតុផលពីផលប៉ះពាល់បង្កឡើងដោយកត្តាខាងក្រៅ ដូចជាវិបត្តិសង្គ្រាមនៅអ៊ុយក្រែន និងភាពមិនច្បាស់លាស់នៃការបញ្ជាទិញពីអឺរ៉ុប និងពីសហរដ្ឋអាមេរិក ដែលជាបញ្ហាប្រឈមនិងត្រូវបានព្យាករសម្រាប់ឆ្នាំក្រោយ ក៏ដូចជាផលប៉ះពាល់ពីការរាតត្បាតនៃជំងឺកូវីដ១៩ និងសម្ពាធនៃការចំណាយប្រាក់សោធននិវត្តន៍។
លោក ឃុន ថារ៉ូ ប្រធានគ្រប់គ្រងកម្មវិធីការងាររបស់មជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថា សង់ត្រាល់ បានឱ្យដឹងថា តួលេខ២១៥ដុល្លារដែលភាគីសហជីពស្នើឡើងនេះ គឺខ្ពស់ជាងសំណើឆ្នាំមុនដែលមានចំនួន២១៤ដុល្លារ។
លោកបន្ថែមថា មានលក្ខណៈវិនិច្ឆ័យសំខាន់ចំនួន២ ដែលកម្មករសមនឹងទទួលបានប្រាក់ឈ្នួលអប្បបរមាថ្មីចំនួន២១៥ដុល្លារ គឺឱនភាពនៃទំនិញ ដែលធ្វើឱ្យតម្លៃទំនិញលើទីផ្សារកើនឡើង ស្របពេលតម្លៃប្រេងឥន្ធនៈក៏បានហក់ឡើងខ្ពស់នាពេលបច្ចុប្បន្ន និងការខាតបង់ផ្នែកសេដ្ឋកិច្ចរបស់កម្មករនិយោជិត ដោយសារតែការកែប្រែមួយចំនួន ដូចជាការកាត់បន្ថយថ្ងៃឈប់សម្រាកនិងការមិនផ្តល់ប្រាក់បន្ថែមលើការធ្វើការចំថ្ងៃអាទិត្យ។ យ៉ាងក៏ដោយ លោកថា ភាគីសហជីព និងនិយោជកនឹងត្រូវបន្តជជែកគ្នា ក្នុងជំនួបក្រោយៗទៀត ដើម្បីកំណត់ប្រាក់ឈ្នួលអប្បបរមាថ្មី។
អគ្គលេខាធិការសមាគមរោងចក្រកាត់ដេរនៅកម្ពុជា ឬ GMAC លោក ខេន លូ ថ្លែងថា ការទាមទាររបស់សហជីពឱ្យដំឡើងប្រាក់ឈ្នួលដល់កម្មកររោងចក្រកាត់ដេរចំនួន២១៥ដុល្លារអាចទៅរួចឬយ៉ាងណាអាស្រ័យលើលក្ខខណ្ឌចំនួន៧ចំណុចដែលជានិច្ចកាលត្រូវបានយកមកពិចារណារាល់ពេលនៃការព្រមព្រៀងលើចំនួនប្រាក់ឈ្នួលអប្បបរមាថ្មី។
លោកប្រាប់វីអូអេថា៖ «អ៊ីចឹងយើងអត់ទាន់មើលឃើញ។ ពេលចរចា អត់ទាន់មើលឃើញថា សហជីពគេយករូបមន្ត៧មកគណនា មកពន្យល់អង្គប្រជុំទេ។ ហើយខាងរដ្ឋាភិបាលបានចេញតួលេខហើយ ខាងយើងក៏មានរូបមន្ត តាមរូបមន្ត៧ ថា ត្រូវតែចេញតួលេខប៉ុន្មានៗ។ អ៊ីចឹង សុំខាងសហជីពចេញរូបមន្ត៧»។
វីអូអេមិនអាចទាក់ទងសុំការអត្ថាធិប្បាយពី លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារតាមរយៈប្រព័ន្ធទំនាក់ទំនង WhatsApp បានទេនៅថ្ងៃព្រហស្បតិ៍នេះ។
ក៏ប៉ុន្តែក្រសួងការងារបានលើកឡើងនៅក្នុងសេចក្តីប្រកាសចេញផ្សាយកាលពីថ្ងៃពុធថា ក្នុងជំនួបជុំទីពីរ ភាគីកម្មករ និងនិយោជក បង្ហាញនូវគោលជំហរផ្ទៃក្នុងរបស់ខ្លួនទៅវិញទៅមកប្រកបដោយវិជ្ជាជីវៈ និងភាពចាស់ទុំអំពីសំណើរបស់ខ្លួន។
សេចក្តីប្រកាសដដែលបន្ថែមថា នៅក្នុងកិច្ចប្រជុំនេះ ភាគីរាជរដ្ឋាភិបាលក៏បានសម្របសម្រួល និងផ្តល់នូវការពន្យល់បន្ថែមលើចំណុចនានា ដែលភាគីតំណាងកម្មករនិយោជិត និងភាគីតំណាងនិយោជកមានចម្ងល់ផងដែរ។ កិច្ចប្រជុំបន្ទាប់ នឹងធ្វើឡើងនៅថ្ងៃទី៣១ ខែសីហាខាងមុខ។
កាលពីឆ្នាំ២០២១ កម្មកររោងចក្រកាត់ដេរទទួលបានការដំឡើងប្រាក់ឈ្នួលបន្ថែមសម្រាប់ឆ្នាំ២០២២ ចំនួន២ដុល្លារ ធ្វើឱ្យប្រាក់ឈ្នួលអប្បបរមាសម្រាប់កម្មករក្នុងឧស្សាហកម្មកាត់ដេរកើនដល់១៩៤ដុល្លារអាមេរិក។
គួររម្លឹកឡើងវិញផងដែរថា វិស័យកាត់ដេរសម្លៀកបំពាក់និងស្បែកជើង គឺជាក្បាលម៉ាស៊ីននៃការនាំចេញទំនិញធំបំផុតលំដាប់ទីមួយរបស់កម្ពុជា។ វិស័យនេះ បានស្រូបយកកម្លាំងពលកម្មប្រមាណជាង៨០ម៉ឺននាក់ដែលភាគច្រើន គឺជាប្រជាពលរដ្ឋមកពីបណ្តាខេត្ត និងជនបទ។
ឧស្សាហកម្មកាត់ដេររបស់ប្រទេសកម្ពុជា បានរងផលប៉ះពាល់ដោយសារការរាតត្បាតនៃជំងឺកូវីដ១៩មួយផ្នែក និងមួយផ្នែកទៀតដោយសារការបាត់បង់ ២០%នៃប្រព័ន្ធឋានៈអនុគ្រោះពន្ធ EBA របស់សហភាពអឺរ៉ុប កាលពីខែសីហា ឆ្នាំ២០២០ ក្រោយការរកឃើញការរំលោភសិទ្ធិមនុស្សធ្ងន់ធ្ងរក្នុងប្រទេស៕