រដ្ឋាភិបាលអាហ្វហ្គានីស្ថាននិយាយថា ខ្លួនបានបញ្ចប់ដោយជោគជ័យនូវប្រតិបត្តិការរយៈពេល៣ខែក្នុងការបោសសម្អាតក្រុមសកម្មប្រយុទ្ធរដ្ឋឥស្លាមនៅស្រុកដាច់ស្រយាលក្នុងប្រទេសនេះ។ កម្លាំងសន្តិសុខអាហ្វហ្គានីស្ថានបានបើកប្រតិបត្តិការវាយបកវិញ ក្រោយពីពួករដ្ឋឥស្លាមបានធ្វើការវាយប្រហារប៉ុស្តិ៍ត្រួតពិនិត្យនានាកាលពីខែតុលា។
ប៉ុស្តិ៍ត្រួតពិនិត្យនោះត្រូវបានកាន់កាប់ដោយក្រុមជីវពលក្នុងតំបន់ដែលគាំទ្រដោយរដ្ឋាភិបាលនៅស្រុក Pachiragam នៅខេត្ត Nangarhar ដែលជាប់ព្រំដែនជាមួយប្រទេសប៉ាគីស្ថាន។Shirin Aqa Faqir អ្នកនាំពាក្យកងទ័ពអាហ្វហ្គានីស្ថាននៅ Nangarhar បានប្រាប់ VOA ថា ក្នុងពេលប៉ុន្មានថ្ងៃថ្មីៗនេះ ក្រុមរដ្ឋឥស្លាមត្រូវបានបណ្តេញចេញពីស្រុក Pachiragam ហើយឥឡូវតំបន់នេះមិនមានពួកសកម្មប្រយុទ្ធរដ្ឋឥស្លាមទេ។
ក្រោយពីបរាជ័យនៅ Pachiragam ពួកសកម្មប្រយុទ្ធរដ្ឋឥស្លាមបានទៅវាយប្រហារស្រុក Kot ដែលនៅជាប់ស្រុក Pachiragamហើយមានបំណងវាយប្រហារក្រុមជីវពលក្នុងតំបន់នេះ។ មន្ត្រីអាជ្ញាធរខេត្តនិងអ្នកស្រុកបានឲ្យដឹងថា ផ្ទះជាង៦០ខ្នងត្រូវឆេះ៕