នៅប្រទេសកម្ពុជា សកម្មភាពរបស់អ្នកស្រឡាញ់ភេទដូចគ្នាមិនត្រូវបានចាត់ទុកជា«អំពើខុសច្បាប់»ទេ បើតាមច្បាប់។ ក៏ប៉ុន្តែ ការស្រាវជ្រាវឆ្នាំ២០១៤ របស់ទីភ្នាក់ងារអាមេរិកដើម្បីការអភិវឌ្ឍអន្តរជាតិ ហៅកាត់ថា (USAID) បានរកឃើញថា «ច្បាប់ និងគោលការណ៍នានាមិនអើពើនឹងសហគមន៍របស់អ្នកស្រឡាញ់ភេទដូចគ្នាឡើយ»។ ដូចគ្នានឹងប្រទេសឯទៀតនៅក្នុងតំបន់អាស៊ីអាគ្នេយ៍ អ្នកស្រឡាញ់ភេទដូចគ្នានៅកម្ពុជាប្រឈមនឹងការរើសអើង និងការរំលោភបំពានខាងផ្លូវចិត្ត រូបរាងកាយ និងខាងផ្លូវភេទ។
លោក ស៊ុ្រន ស៊្រន ស្ថាបនិកអង្គការអនាគតកម្ពុជាអាស៊ាន និងជាសកម្មជនម្នាក់ដែលបានចាប់ផ្តើមចលនាការពារសិទ្ធិរបស់អ្នកស្រឡាញ់ភេទដូចគ្នានៅកម្ពុជាតាំងពីឆ្នាំ២០០៦មក បានឲ្យដឹងថា ក្រុមអ្នកស្រឡាញ់ភេទដូចគ្នាជាញឹកញាប់ត្រូវបានរងអំពើហិង្សាខាងផ្លូវចិត្ត ខាងផ្លូវភេទ និងលើរូបរាងកាយ ដោយក្រុមគ្រួសាររបស់ពួកគេ មិត្តភក្តិ និងអ្នករួមការងារជាមួយគ្នា។ លោកបានលើកឡើងដូច្នេះ នៅក្នុងបទសម្ភាន៍ជាមួយ VOA អំពីកិច្ចពិភាក្សាស្តីពីអ្នកស្រឡាញ់ភេទដូចគ្នាថ្នាក់ជាតិ ដែលបានប្រារព្ធធ្វើឡើងកាលពីថ្ងៃអង្គារ ទី១៦ ខែកុម្ភៈ កន្លងទៅនេះ។
លោកថា៖«គោលបំណងនៃកិច្ចពិភាក្សានេះគឺដើម្បីពាំនាំសំឡេងរបស់អ្នកស្រឡាញ់ភេទដូចគ្នាតាមសហគមន៍ ដែលយើងអញ្ជើញមកពី១៨ខេត្តក្រុង ដែលពួកគេជាសកម្មជនសិទ្ធិមនុស្ស ជាពិសេសអ្នកស្រឡាញ់ភេទដូចគ្នា និងអ្នកដែលប្តូរភេទ ដោយសារតែពួកគេទទួលរងអំពើហិង្សាធ្ងន់ធ្ងរទាំងផ្នែករូបរាងកាយ និងសតិអារម្មណ៍។ គោលបំណងទី២ គឺសុំស្វែងរកការគាំទ្រអន្តរាគមន៍ពីរដ្ឋាភិបាល ហើយស្ថាប័នពាក់ព័ន្ធផ្សេងៗទៀត»។
លោកក៏បានបន្ថែមផងដែរថា ករណីអំពើហិង្សាមកលើក្រុមអ្នកស្រឡាញ់ភេទដូចគ្នាមានចំនួនកើនឡើងគួរឲ្យកត់សម្គាល់នៅកម្ពុជា ដោយសារតែក្នុងសង្គមបច្ចុប្បន្ននេះ យុវជនអ្នកស្រឡាញ់ភេទដូចគ្នាដែលមានអាយុចន្លោះ១៦ឆ្នាំ ទៅ១៨ឆ្នាំ កាន់តែបើកចំហរអំពីការប្តូរភេទរបស់ពួកគេ ហើយក្លាយជាមនុស្សភេទទីបី ដែលត្រូវបានគេស្គាល់ និងហៅថាក្រុមមនុស្សខ្ទើយ។
វាលគ្មីនចូលរួមពិភាក្សាអំពីស្ថានភាពរបស់អ្នកស្រឡាញ់ភេទដូចគ្នានៅកម្ពុជា នៅក្នុងកិច្ចពិភាក្សាថ្នាក់ជាតិស្តីពីអ្នកស្រឡាញ់ភេទដូចគ្នា ដែលមានតំណាងពីក្រសួងព័ត៌មាន ក្រសួងកិច្ចការនារី ក្រសួងមហាផ្ទៃ ក្រសួងអប់រំ យុវជន និងកីឡា និងក្រសួងសុខាភិបាល ដែលបានប្រារព្ធធ្វើឡើងកាលពីថ្ងៃអង្គារ ទី១៦ ខែកុម្ភៈ ឆ្នាំ២០១៦។ (រូបថតផ្តល់ឲ្យដោយអង្គការអនាគតយុវជនកម្ពុជាអាស៊ាន)
សហគមន៍អ្នកស្រឡាញ់ភេទដូចគ្នាភាគច្រើនបានបាត់បង់ឱកាសសិក្សាឲ្យចប់ចុងចប់ដើម ដោយសារតែការរើសអើងដែលកើតមាននៅក្នុងថ្នាក់រៀន និងសាលារៀន។ សកម្មជន ស៊្រុន ស៊្រន ក៏បានបញ្ជាក់ថា ការរើសអើងក៏កើតមានឡើង នៅតាមកន្លែងធ្វើការ ហើយជាទូទៅ ក្រុមអ្នកស្រឡាញ់ភេទដូចគ្នានេះភាគច្រើនអាចប្រឈមនឹងបញ្ហាជំងឺឆ្លង ដូចជាជំងឺអេសដ៍ និងមេរោគអេសដ៍ជាដើម។
ការស្រាវជ្រាវជាច្រើនបានរកឃើញថា ការក្លាយជាអ្នកស្រឡាញ់ភេទដូចគ្នាអាចនាំភាពអាម៉ាស់មុខ ភាពភ័យខ្លាច និងការធ្វើខុស មកឲ្យទាំងអ្នកស្រឡាញ់ភេទដូចគ្នា និងក្រុមគ្រួសាររបស់ពួកគេ។ ការស្ទាបស្ទង់មតិថ្នាក់ជាតិឆ្នាំ២០១២មួយ បានបង្ហាញឲ្យដឹងថា បុរសចំនួន៦៣ភាគរយយល់ថា កាលណាកូនប្រុសរបស់ពួកគេជាមនុស្សស្រឡាញ់ភេទដូចគ្នា នោះគ្រួសាររបស់ពួកគេនឹងទទួលភាពអាម៉ាស់មុខ។ សម្រាប់អ្នកស្រឡាញ់ភេទដូចគ្នាវិញ ពួកគេមានអារម្មណ៍ថាបានធ្វើខុស ហើយអាម៉ាស់មុខ ហើយភ័យខ្លាច ការណ៍ដែលពួកគេគឺជាមនុស្សភេទទីបី ហើយតែងតែព្យាយាមបិទបាំងពីភេទពិតរបស់ខ្លួន។
យ៉ាងណាមិញ ការស្រាវជ្រាវឆ្នាំ២០១៤ របស់ USAID ក៏បានបង្ហាញឲ្យដឹងថា សាសនាព្រះពុទ្ធនិកាយហិនយានរបស់កម្ពុជា បានបង្កើតឲ្យមានភាពអត់ឱនដល់ការក្លាយជាអ្នកស្រឡាញ់ភេទដូចគ្នា។ បន្ថែមលើនេះ ការស្រាវជ្រាវនោះក៏បានឲ្យដឹងថា ៦៥ភាគរយនៃបុរសដែលចូលរួមក្នុងការស្រាវជ្រាវនេះបានគាំទ្រឲ្យបានការបង្កើតច្បាប់ការពារសិទ្ធិរបស់អ្នកស្រឡាញ់ភេទដូចគ្នានៅកម្ពុជា។
លោក ស៊្រុន ស៊្រន ដែលជាសកម្មជនការពារសិទ្ធិរបស់អ្នកស្រឡាញ់គ្នាអស់រយៈពេលជាងមួយទសវត្សរ៍មកហើយនេះ បានរំឭកថា បើធៀបនឹងប្រទេសផ្សេងទៀតក្នុងតំបន់ សហគមន៍អ្នកស្រឡាញ់ភេទដូចគ្នានៅកម្ពុជា មានសំណាងជាងប្រទេសឯទៀត ដែលការណ៍ក្លាយជាមនុស្សភេទទីបីត្រូវបានចាត់ទុកជាអំពើខុសច្បាប់។
លោកថា៖«បើប្រៀបធៀបនឹងប្រទេសក្នុងតំបន់អាស៊ីអាគ្នេយ៍តែម្តង យើងមានលក្ខណៈធូរស្រាលជាងគេ បើប្រៀបធៀបនឹងសិង្ហបុរី ម៉ាឡេស៊ី ភូមា ដែលមានច្បាប់ដាក់ទោស ហើយដូចជាប្រទេសប៊ុ្រយណេ គឺដាក់ទោសប្រហារជីវិតតែម្តង។ ជនជាតិខ្មែរយើងគឺជាជនជាតិដែលមានសំណាង ដែលវប្បធម៌ប្រពៃណីរបស់យើងមិនតឹងរ៉ឹង ដូចជាប្រទេសជិតខាងដែលកាន់សាសនាអ៊ីស្លាមនោះទេ»។
លោក ខៀវ កាញារិទ្ធ រដ្ឋមន្ត្រីសារព័ត៌មានកម្ពុជា ចូលរួមជាភ្ញៀវកិត្តិយសនៅក្នុងកិច្ចពិភាក្សាថ្នាក់ជាតិស្តីពីអ្នកស្រឡាញ់ភេទដូចគ្នា ដែលបានប្រារព្ធធ្វើឡើងនៅរាជធានីភ្នំពេញ កាលពីថ្ងៃអង្គារ ទី១៦ ខែកុម្ភៈ ឆ្នាំ២០១៦។ (រូបថតផ្តល់ឲ្យដោយអង្គការអនាគតយុវជនកម្ពុជាអាស៊ាន)
នៅកម្ពុជាគេឃើញមាន អង្គការសង្គមស៊ីវិលបានធ្វើការអប់រំ និងបញ្ជ្រាបការគោរពសិទ្ធិអ្នកស្រឡាញ់ភេទដូចគ្នាជាច្រើនឆ្នាំមកហើយ ដោយមានការគាំទ្រមួយកម្រិតធំពីរាជរដ្ឋាភិបាលកម្ពុជា និងអង្គការអន្តរជាតិជាច្រើន។ លោក ស៊្រុន ស៊្រន បានឲ្យដឹងថា នៅក្នុងកិច្ចពិភាក្សាស្តីពីអ្នកស្រឡាញ់ភេទដូចគ្នាថ្នាក់ជាតិនោះ មានការបេ្តជ្ញាចិត្តគាំទ្រ និងផ្តល់ជំនួយជាច្រើនពីរដ្ឋាភិបាល និងអង្គការដៃគូអភិវឌ្ឍន៍ផ្សេងៗទៀត។
លោកថា៖«ផ្នែករដ្ឋាភិបាលកាលពីម្សិលមិញហ្នឹង គឺឯកឧត្តម ខៀវ កាញារិទ្ធ បានប្រកាសមិនឲ្យមានការចាក់ផ្សាយ ឬចុះផ្សាយតាមសារព័ត៌មានផ្សេងៗ ក្នុងរូបភាពណាក៏ដោយ មិនឲ្យមានការរើសអើង។ ក្រសួងកិច្ចការនារីបានដាក់ផែនការសកម្មភាពការពារសិទ្ធិស្ត្រីទូទៅប្រទេស រួមទាំងស្ត្រីស្រឡាញ់ភេទដូចគ្នាដែរ»។
លោកក៏បានសង្កត់ធ្ងន់ថា លទ្ធភាពក្នុងការព្រាងច្បាប់ការពារសិទ្ធិអ្នកស្រឡាញ់ភេទដូចគ្នានៅកម្ពុជាអាចទៅរួច។ លោកថា៖«ក្រសួងមហាផ្ទៃបានត្រៀមខ្លួនរួចជាស្រេចក្នុងការការពារអ្នកស្រឡាញ់ភេទដូចគ្នា ដោយមិនមានការរើសអើង គាត់គួរតែមានសិទ្ធិបោះឆ្នោត គាត់គួរតែមានសិទ្ធិក្នុងការចូលរួមសកម្មភាពក្នុងសង្គមផ្សេងៗ។ ជាពិសេស គាត់អាចរៀបអាពាហ៍ពិពាហ៍បាន។ គ្រាន់តែថា ទាក់ទងនឹងច្បាប់អាពាហ៍ពិពាហ៍ហ្នឹងខាងក្រសួងនៅធ្វើការងារបន្តទៀត ពីព្រោះវាទាក់ទងនឹងការងារនៅសភា»។
បើសិនជាការព្រាងច្បាប់នេះចេញជារូបរាងពិតប្រាកដមែននោះ ប្រទេសកម្ពុជានឹងក្លាយជាប្រទេសដំបូងគេបង្អស់ ដែលអនុម័តច្បាប់ការងារសិទ្ធិរបស់ស្រឡាញ់ភេទដូចគ្នា ហើយដែលទំនងជាអនុញ្ញាតឲ្យមានការរៀបអាពាហ៍ពិពាហ៍របស់ក្រុមអ្នកស្រឡាញ់ភេទដូចគ្នា។ ប៉ុន្តែ លោក ស៊ុ្រន ស៊្រន ថា ដើម្បីសម្រេចបានលទ្ធផលនេះ មានកិច្ចការជាច្រើនដែលអង្គការរបស់លោក ក៏ដូចជាអង្គការ និងស្ថាប័នពាក់ព័ន្ធត្រូវធ្វើបន្តទៀត៕