កម្មករប្រមាណ ៥០ នាក់ ដែលធ្វើការនៅរោងចក្រមួយក្នុងខណ្ឌមានជ័យ រាជធានីភ្នំពេញ ត្រូវបានរកឃើញថា មានផ្ទុកវីរុសជំងឺកូវីដ១៩ កាលពីថ្ងៃពុធ ដែលនាំឲ្យមានការព្រួយបារម្ភអំពីលទ្ធភាពឆ្លងរាលដាលលឿនក្នុងសហគមន៍កម្មកររោងចក្រ។ នេះបើយោងតាមអាជ្ញាធរខណ្ឌមានជ័យ។
រោងចក្រនោះមានឈ្មោះថាសហគ្រាស ឌីនហាន់ (Din Han Enterprise) ដែលស្ថិតក្នុងភូមិថ្មី សង្កាត់ស្ទឹងមានជ័យ ខណ្ឌមានជ័យ ដែលជារោងចក្រតៃវ៉ាន់ផលិតអាវធំ អាវយឺតជាដើម និងមានកម្មករជាង ២ ពាន់នាក់។ នេះបើយោងតាមព័ត៌មានក្នុងបញ្ជីចុះឈ្មោះរបស់សមាគមរោងចក្រកាត់ដេរនៅកម្ពុជា (GMAC)។
លោក ឌី រ័ត្នខេមរុណ អភិបាលរងខណ្ឌមានជ័យ បានប្រាប់ VOA នៅថ្ងៃព្រហស្បតិ៍ថា កម្មកររោងចក្រប្រមាណ ៥០ នាក់ ត្រូវបានរកឃើញថាមានជំងឺកូវីដ១៩។ លោកបន្តថា ក្រុមគ្រូពេទ្យបន្តយកសំណាករបស់កម្មករដែលធ្វើការនៅក្នុងរោងចក្រនោះ។ លោកមិនទាន់អាចបញ្ជាក់ពីប្រភពនៃការឆ្លងជំងឺកូវីដ១៩ នៅក្នុងរោងចក្របានឡើយទេ។
បើតាមទំព័រហ្វេសប៊ុករបស់សាលាសង្កាត់ស្ទឹងមានជ័យ ក្រុមគ្រូពេទ្យបានចុះទៅយកសំណាករបស់កម្មករ កាលពីល្ងាចថ្ងៃទី ៧ ខែមេសា និងបន្តយកសំណាកនៅថ្ងៃព្រហស្បតិ៍នេះដែរ។
កាលពីថ្ងៃពុធ អភិបាលរាជធានីភ្នំពេញ លោក ឃួង ស្រេង ក៏បានបញ្ជាក់ប្រាប់សារព័ត៌មាន Freshnews ថា កម្មករនៅរោងចក្រឌីនហាន់ ជិត ៥០ នាក់ បានឆ្លងជំងឺកូវីដ១៩។
រដ្ឋបាលរាជធានីភ្នំពេញបានចេញសេចក្តីជូនដំណឹងមួយនៅថ្ងៃព្រហស្បតិ៍នេះ ដោយបានបញ្ជាក់ឈ្មោះរបស់កម្មករមកពីរោងចក្រ ឌីនហាន់ ដែលមានវីរុសជំងឺកូវីដ១៩។
VOA មិនទាន់អាចសុំការឆ្លើយតបពីលោក ងី មានហេង ប្រធានមន្ទីរសុខាភិបាលរាជធានីភ្នំពេញ និងតំណាងរោងចក្រឌីនហាន់ បានឡើយទេ នៅថ្ងៃព្រហស្បតិ៍នេះ។
ប្រធានសម្ព័ន្ធសហជីពកម្ពុជា លោកស្រី យ៉ាង សុភ័ណ្ឌ មានប្រសាសន៍ថា វាមានការលំបាកសម្រាប់កម្មកររោងចក្រ ក្នុងការរក្សាគម្លាតសុវត្ថិភាពនៅពេលកំពុងធ្វើការ ហើយថា នេះជាទំនួលខុសត្រូវរបស់ថៅកែរោងចក្រក្នុងការរៀបចំ។ លោកស្រីថា ការឆ្លងក្នុងសហគមន៍កម្មករ វានឹងបង្កផលលំបាកក្នុងការទប់ស្កាត់។
លោកស្រីបញ្ជាក់ថា៖ «ប្រាកដណាស់ គាត់មានការព្រួយបារម្ភ គាត់ខ្លាច ប៉ុន្តែគាត់គ្មានជម្រើសក្នុងរើសថាគាត់ងាកទៅធ្វើអីផ្សេងក្រៅពីហ្នឹង។ ធម្មតាបើសិនជាគាត់មានជម្រើសផ្សេង គាត់មិននៅធ្វើការងារដោយមានការប្រមូលផ្តុំ ជិះឡានមានគ្នាច្រើន»។
ប្រសិនបើមានការអនុញ្ញាតឲ្យកម្មករសម្រាករយៈពេលខ្លី មេដឹកនាំសហជីពរូបនោះជំរុញឲ្យរដ្ឋាភិបាលក៏ដូចជារោងចក្រ ត្រូវបន្តផ្តល់ថវិកាឲ្យកម្មករ ដើម្បីឲ្យពួកគេអាចដោះស្រាយបន្ទុកក្នុងគ្រួសារនិងសងបំណុលធនាគារជាដើម។
VOA មិនអាចសុំការអត្ថាធិប្បាយពីលោកខេន លូ អគ្គលេខាធិការនិងលោក កាំង ម៉ូនីកា អគ្គលេខាធិការរងនៃសមាគមរោងចក្រនៅកម្ពុជាបានឡើយទេ។
នៅថ្ងៃព្រហស្បតិ៍នេះ ក្រសួងសុខាភិបាលបានឲ្យដឹងថា មនុស្ស ១១៣ នាក់ទៀត ត្រូវបានរកឃើញថាឆ្លងជំងឺកូវីដ១៩ ដែលនាំឲ្យករណីឆ្លងសរុបក្នុងព្រឹត្តិការណ៍ ២០ កុម្ភៈ មានចំនួន ២.៤៩៦ នាក់។
ករណីឆ្លងនៅថ្ងៃនេះ មាន ១០៣ នាក់ នៅរាជធានីភ្នំពេញ។ ប៉ុន្តែក្រសួងមិនបានបែងចែកថា មានកម្មកររោងចក្រប៉ុន្មាននាក់នោះទេ។ ក្រសួងសុខាភិបាលក៏បានឲ្យដឹងថា អ្នកស្លាប់ដោយសារជំងឺកូវីដ១៩ ក្នុងប្រទេសកម្ពុជា មានចំនួន ២៤ នាក់ ដោយអ្នកជំងឺ ២ នាក់ទៀត បានស្លាប់ ក្រោយពីក្រសួងសុខាភិបាលបានប្រកាសកាលពីព្រឹកថ្ងៃព្រហស្បតិ៍។
តំណាងអង្គការសុខភាពពិភពលោក (WHO) លោកស្រី Li Ailan មានប្រសាសន៍ថា លោកស្រីមានការព្រួយបារម្ភជាខ្លាំងអំពីស្ថានភាពឆ្លងបច្ចុប្បន្ននេះ ដោយសារ «នេះជាសញ្ញាព្រមានមួយថាវីរុសនេះកំពុងតែរាលដាលស្ងាត់ៗ នៅក្នុងសហគមន៍»។
លោកស្រីប្រាប់ VOA កាលពីថ្ងៃពុធ តាមសារអ៊ីមែលថា៖ «ជំងឺកូវីដ១៩ អាចរាលដាលស្ងាត់ៗ ពីព្រោះពាក់កណ្តាលនៃករណីដែលរកឃើញនៅក្នុងការផ្ទុះឆ្លងនេះ មិនមានបង្ហាញរោគសញ្ញាអ្វីទេ។ នេះមានន័យថា ប្រជាពលរដ្ឋមិនគិតថា ពួកគេឈឺនោះទេ ប៉ុន្តែតាមពិតទៅ ពួកគេរាលដាលជំងឺនេះទៅគ្នា នៅកន្លែងណាក៏ដោយ ដែលពួកគេធ្វើដំណើរ»។
លោកស្រីលើកទឹកចិត្តឲ្យប្រជាពលរដ្ឋស្នាក់នៅផ្ទះ ហើយកុំចេញទៅណាក្នុងឱកាសបុណ្យចូលឆ្នាំប្រពៃណីខ្មែរខាងមុខនេះ៕