នៅមួយថ្ងៃមុនការឡើងសវនាការក្នុងសប្តាហ៍ទីបី ក្នុងថ្ងៃពុធស្អែក ក្នុងសំណុំរឿងក្បត់ជាតិ លោក កឹម សុខា ប្រធានគណបក្សសង្គ្រោះជាតិដែលត្រូវរំលាយ បានទទួលជួបពិភាក្សាជាមួយលោកស្រី Budliger Artieda ឯកអគ្គរដ្ឋទូតប្រទេសស្វីស ដែលមានស្ថានបេសកកម្មការទូតនៅទីក្រុងបាងកកប្រទេសថៃ។ នេះគឺជាជំនួបលើកទីពីររវាងលោក កឹម សុខា និងឯកអគ្គរដ្ឋទូតប្រទេសស្វីសលោកស្រី Budliger Artieda។
លោក កឹម សុខា ត្រូវបានចាប់ខ្លួនកាលពីដើមខែកញ្ញា ឆ្នាំ២០១៧ ដោយសមត្ថកិច្ចបានប្រើប្រាស់វីដេអូមានរយៈពេលជាងពីរនាទី ដែលស្រង់ចេញពីវីដេអូវែងជាងមួយម៉ោង មកធ្វើជាភស្តុតាងក្នុងការចាប់ខ្លួន ចោទប្រកាន់ ហើយឃុំខ្លួនលោកក្នុងពន្ធនាគារ និងបន្តសវនាការរហូតមកដល់ពេលនេះ។ លោក កឹម សុខា ត្រូវគេរំពឹងថានឹងបង្ហាញខ្លួននៅក្នុងសវនាការបន្តនៅក្នុងថ្ងៃពុធស្អែកនេះ ក្នុងសំណុំរឿងដែលមេបក្សជំទាស់រូបនេះ ត្រូវបានចោទពីបទឃុបឃិតជាមួយសហរដ្ឋអាមេរិក ដើម្បីរៀបគម្រោងផ្តួលរំលំរដ្ឋាភិបាលកម្ពុជា។
លោក កឹម សុខា ដែលបានទទួលសេរីភាពខ្លះ កាលពីខែវិច្ឆិកា ឆ្នាំ២០១៩ បានជួបសន្ទនាជាមួយលោកស្រីឯកអគ្គរដ្ឋទូតប្រទេសស្វីស នៅគេហដ្ឋានរបស់លោកក្នុងខណ្ឌទួលគោក រាជធានីភ្នំពេញ នារសៀលថ្ងៃអង្គារនេះ។
ក្រោយជំនួបជិតមួយម៉ោង លោកស្រី Budliger Artieda ឯកអគ្គរដ្ឋទូតប្រទេសស្វីសត្រូវបានអមដំណើរដោយលោក មុត ចន្ថា ជំនួយការផ្ទាល់លោក កឹម សុខា ចូលក្នុងរថយន្ត ដោយមិនបានផ្តល់ការអត្ថាធិប្បាយដល់កាសែតនោះទេ។ លោក កឹម សុខា ក៏សុំមិនផ្តល់ការអត្ថាធិប្បាយផងដែរ។
លោកមុត ចន្ថា ជំនួយការផ្ទាល់លោកកឹម សុខា ថ្លែងជាមួយអ្នកសារព័ត៌មាន បន្ទាប់ពីជំនួបរវាងលោក កឹម សុខា និងឯកអគ្គរដ្ឋទូតប្រទេសស្វីស នៅរាជធានីភ្នំពេញ ថ្ងៃទី២៨ ខែមករា ឆ្នាំ២០២០។ (ហ៊ុល រស្មី/VOA)
លោក មុត ចន្ថា ជំនួយការផ្ទាល់លោក កឹម សុខា បានប្រាប់អ្នកកាសែតថា លោកស្រី Budliger Artieda បានសួរសុខទុក្ខលោក កឹម សុខា អំពីស្ថានភាពសុខភាព និងដំណើរកាត់ក្តីលោក កឹម សុខា ដែលបានធ្វើឡើងជាច្រើនថ្ងៃមកនេះ។
លោកបានបញ្ជាក់ថា៖ «លោកស្រីគាត់សួរតែពីបញ្ហា ដែលគាត់បានលើកពីលើកមុន ពីការព្រួយបារម្ភពីបញ្ហាស្មាខាងឆ្វេងរបស់លោក ដែលមានបញ្ហា ឆ្អឹងដុះបុកសាច់ដុំហ្នឹង ហើយនិងបញ្ហាជំងឺផ្សេងៗទៀត ដែលគាត់បានជជែកគ្នាពីលើកមុន គាត់មកតាមដាន ជាពិសេសក្នុងកាលៈទេសៈនេះមានការស្ថានការណ៍គាបសង្កត់លើខ្លាចប៉ះពាល់លើបញ្ហាសុខភាព ហើយបាន គាត់បានសួរអំពីដំណើរសវនាការរយៈពេល បីថ្ងៃកន្លងមកហ្នឹង តែប៉ុណ្ណឹងទេ»។
នៅក្នុងសវនាការធ្វើឡើងពីសប្តាហ៍កន្លងមកនេះ លោក កឹម សុខា បានការពារខ្លួនលោកជាបន្តបន្ទាប់ថា លោកមិនមានបំណងធ្វើបដិវត្តន៍ពណ៌ផ្តួលរំលំរដ្ឋាភិបាល ហើយថា លោកបានជ្រើសរើសការបោះឆ្នោតតាមបែបប្រជាធិបតេយ្យ ដើម្បីប្រកួតខាងនយោបាយ។ លោក កឹម សុខា អះអាងថា លោកនៅតែប្រកាន់យកយុទ្ធសាស្ត្រ«អហិង្សា» ហើយថាទស្សនៈសាកលនៃការផ្លាស់ប្តូរបែបប្រជាធិបតេយ្យគឺត្រូវបំបាត់ «ខ្លៅ ខ្លាច ឃ្លាន»៕