ប្រធានាធិបតីអាហ្រ្វិកខាងត្បូង យ៉ាកុប ហ្ស៊ូម៉ា (Jacob Zuma) បានបដិសេធ ទៅលើការប្រព្រឹត្តអំពើពុករលួយបន្ទាប់ពីតុលាការធម្មនុញបានវិនិច្ឆ័យថាលោកបានចាយវាយថវិការដ្ឋ២០លានដុល្លារមិនត្រឹមត្រូវក្នុងបំណងពង្រឹងសន្តិសុខនៅគេហដ្ឋានរបស់លោក។
លោក Zuma បានសុំទោសក្នុងពេលលោកថ្លែងសន្ទរកថាដែលផ្សព្វផ្សាយកាលពីថ្ងៃសុក្រ ដោយនិយាយថាលោកគ្រាន់តែមានបំណងល្អក្នុងការចំណាយថវិការដ្ឋដើម្បីសាងសង់បន្ថែមអាងហែលទឹក និងកន្លែងបញ្ចាំងកុនក្នុងគេហដ្ឋានឯកជនរបស់លោក។ លោកថា៖
«ខ្ញុំសុំបញ្ជាក់ថា ខ្ញុំមិនដែលមានបំណងឬមានចេតនាក្នុងការរំលោភរដ្ឋធម្មនុញ្ញ ដែលជាច្បាប់កំពូលរបស់ប្រទេសទេ»។
មេដឹកនាំគណបក្សប្រឆាំងបានអំពាវនាវឲ្យមានការដាក់ទោសលោក Zuma ។ ទោះបីរឿងនេះទំនងជាគ្មានការដាក់ទោសមែន តែជំហានខុសឆ្គងនេះអាច ពង្រីកចលនាដ៏មានឥទ្ធិពលក្នុងការបង្ខំឲ្យលោកលាឈប់ពីមុខតំណែង។
