ទីក្រុងហ្សឺណែវ៖ វេទិកាសេដ្ឋកិច្ចសកលលោកនៅឆ្នាំនេះ នឹងបកស្រាយអំពីសារៈសំខាន់នៃការផ្លាស់ប្តូរអំណាចនយោបាយ និងសេដ្ឋកិច្ចពីប្រទេសអភិវឌ្ឍន៍ទៅប្រទេសជាតិកំពុងមានសេដ្ឋកិច្ចងើបឡើងនៅក្នុងពិភពលោកកំពុងអភិវឌ្ឍន៍។ មេដឹកនាំពាណិជ្ជកម្ម រដ្ឋាភិបាលនិងសង្គមស៊ីវិលជាង២៥០០នាក់នឹងជួបជុំគ្នានៅក្នុងភូមិលើកំពូលភ្នំប្រទេសស្វីសនៅសប្តាហ៍ក្រោយ។
ពិភពលោកកំពុងងើបចេញពីអ្វីដែលត្រូវគេមើលឃើញថា ជាការធ្លាក់ចុះផ្នែកសេដ្ឋកិច្ចដ៏យូរបំផុតនិងដ៏ខ្លាំងបំផុតចាប់តាំងពីទសវត្សរ៍១៩៣០មក។ អ្វីដែលកំពុងលេចចេញឡើងក្រោយពីវិបត្តិហិរញ្ញវត្ថុគឺពិភពលោកកាន់តែស្មុគ្រស្មាញនិងពឹងពាក់គ្នាទៅវិញទៅមកកាន់តែខ្លាំងឡើង។
លោក ក្លូស ស្វ័ប(Klaus Schwab) ជាស្ថាបនិកវេទិកាសេដ្ឋកិច្ចសកលលោក និយាយថា សន្ទុះនៃការផ្លាស់ប្តូរនិងការបញ្ចូលរបៀបបច្ចេកវិទ្យាថ្មីដែលកើតមានឡើងគឺជាការអស្ចារ្យមួយហើយនឹងកំពុងបង្កើតការពិតដ៏ថ្មីមួយ។ លោក ប្រាប់ វីអូអេថាកត្តាដ៏សំខាន់បំផុតមួយនៃការពិតថ្មីគឺការផ្លាស់ប្តូរអំណាចភូមិសាស្រ្តនយោបាយ ហើយនឹងអំណាចភូមិសាស្រ្តសេដ្ឋកិច្ចពីខាងជើងទៅខាងត្បូងនិងពីខាងលិចទៅខាងកើត។
"នេះមិនមែនត្រឹមតែផលវិបាកខាងនយោបាយនិងសេដ្ឋកិច្ចប៉ុណ្ណោះទេ ខ្ញុំគិតថា ពិភពលោកនឹងសម្របទៅតាមការផ្ទុះឡើងនូវការផ្លាស់ប្តូរយ៉ាងខ្លាំង។ ខ្ញុំមានការរីករាយយ៉ាងខ្លាំងរង់ចាំមើលលទ្ធផលនៃជំនួបរវាងប្រធានាធិបតីសហរដ្ឋអាមេរិកនិងប្រធានាធិបតីប្រទេសចិន ដែលនឹងក្លាយជាសូចនាករមួយវាស់ស្ទង់កម្រិតដែលយើងអាចស្ថាបនាពិភពលោក ដែលយើងអាចរស់នៅសុខដមរមនានឹងគ្នា ទោះបីមានការផ្លាស់ប្តូរអំណាចនេះក្តី។ ដូច្នេះ បញ្ហានេះនឹងក្លាយជាបញ្ហាគ្របដណ្តប់ក្នុងវេទិកាសេដ្ឋកិច្ចនៅទីក្រុង ដាវូស(Davos)"។
ការប្រជុំរាប់រយលើបញ្ហានយោបាយ ពាណិជ្ជកម្ម វិទ្យាសាស្រ្តនិងវប្បធ៌មនឹងកើតមានឡើងក្នុងរយៈពេលជាង៥ថ្ងៃនេះ។ ការជួបប្រជុំដែលត្រូវបានរៀបចំទាំងនេះធ្វើស្របពេលជាមួយគ្នានឹងកិច្ចសន្ទនាក្រៅផ្លូវការ ឯកជនក្នុងចំណោមមេដឹកនាំពិភពលោក។ កិច្ចប្រជុំទាំងនេះត្រូវបានហៅថា ការសន្ទនានៅតាមរបៀង ជួនកាលបង្កើតគំនិតផ្តួចផ្តើមសម្រាប់ផ្លាស់ប្តូរយ៉ាងសំខាន់៕
ប្រែសម្រួលដោយលោកជឹង ប៉ូជីន