តម្លៃប្រេងឥន្ធន: នៅក្នុងសកលលោក ឥឡូវនេះ ឡើងជិតដល់ ១១០ដុល្លាមួយធុង ហើយបើបូករួមជាមួយអតិផរណាទៀត ចោទជាការគំរាមដល់ការងើបឡើងវិញនូវសេដ្ឋកិច្ចសកលលោក អ្នកសេដ្ឋសាស្ដ្រម្នាក់នៃធនាគារពិភពលោក នៅក្នុងប្រទេសថៃកំពុងព្រមានថា ទោះបីការតានតឹងបានធូរស្រាលនៅក្នុងមជ្ឈឹមបូព៌ាក៏ដោយ ប្រេងឥន្ធន: នឹងនៅតែថ្លៃដដែល ដោយមកពីសេចក្ដីត្រូវការយ៉ាងច្រើនពីប្រទេសចិន ឥណ្ឌា ហើយនឹងប្រទេសមានឧស្សាហកម្មដទៃៗទៀត។ តម្លៃប្រេងឥន្ធន: ហើយនឹងវត្ថុប្រើប្រាស់ប្រចាំថ្ងៃ បណ្ដាលឲ្យមានអតិផរណា ដែលឥឡូវនេះ គេមើលឃើញថា ជាសេចក្ដីព្រួយបារម្មចំបងមួយនៅប្រទេសថៃ ហើយនឹងនៅទូទាំងតំបន់នេះ។
នៅក្នុងសេចក្ដីរាយការណ៍តាមឃ្លាំមើលមួយស្ដីពីសេដ្ឋកិច្ចនៃប្រទេសថៃ ធនាគារពិភពលោកឲ្យដឹងថា តម្លៃប្រេងឥន្ធន: នៅក្នុងសកលលោក ឥឡូវនេះ ឡើងជិតដល់ ១១០ដុល្លាមួយធុង ហើយបើបូករួមជាមួយអតិផរណាទៀត ចោទជាការគំរាមដល់ការងើបឡើងវិញនូវសេដ្ឋកិច្ចសកលលោក។
តម្លៃប្រេងឥន្ធន: អន្ដរជាតិ នៅតែមានជិតដល់កម្រិតខ្ពស់បំផុត ចាប់តាំងពីឆ្នាំ២០០៨មក។ តម្លៃប្រេងឥន្ធន: នៅក្នុងសកលលោក ឡើងយ៉ាងខ្ពស់ដល់ ១៤៧ដុល្លាក្នុងមួយធុង នៅឆ្នាំ២០០៧ មុននឹងចុះនៅតិចជាង៥០ដុល្លានៅចុងឆ្នាំ២០០៨។
សេដ្ឋកិច្ចនៃស.រ.អ. ហើយនឹងប្រទេសមានឧស្សាហកម្មធំៗ នៅទ្វីបអឺរ៉ុប កំពុងតែខិតទៅមុខនៅក្នុងអ្វីដែលជាការងើបឡើងរបស់សេដ្ឋកិច្ចមិនរឹងមាំ ក្រោយពីវិបត្ដិហិរញ្ញវត្ថុឆ្នាំ២០០៨-២០០៩។ ប៉ុន្ដែលោក Frederico Gil Sander អ្នកសេដ្ឋសាស្ដ្រ សម្រាប់ប្រទេសថៃក្នុងតំបន់និយាយថា ការកើនឡើងនៃតម្លៃប្រេងឥន្ធន:តទៅទៀត នឹងគំរាមដល់ការងើបឡើងរបស់សេដ្ឋកិច្ច ហើយជំរុញឲ្យមានអតិផរណា។
«អតិផរណាបានក្លាយទៅជាសេចក្ដីព្រួយបារម្ភចំបងមួយ ចំពោះអ្នកធ្វើគោលនយោបាយ ទាំងនៅក្នុងប្រទេសថៃនិងនៅនាយសមុទ្រ។ ហើយ សេចក្ដីព្រួយបារម្ភអំពីអតិផរណា ពិតជាពាក់ព័ន្ធទៅនឹងប្រេងឥន្ធន:ឡើងថ្លៃ។ ហើយយើងមិនគួររំពឹងថា តម្លៃប្រេងឥន្ធន:នឹងចាប់ផ្ដើមចុះថយយ៉ាងឆាប់រហ័សទេ ទោះបីគេដោះស្រាយស្ថានការណ៍នៅក្នុងមជ្ឈឹមបូព៌ាក៏ដោយ។ ហេតុដូច្នេះហើយ នៅក្នុងស្ថានភាពនេះ សារមួយគឺយើងប្រហែលជាមិនគូររំពឹងថា តម្លៃប្រេងឥន្ធន:នឹងចុះថយច្រើនទេ ។ តាមពិតទៅតម្លៃនោះទំនងដូចជានឹងនៅតែមានកម្រិតខ្ពស់»។
លោក Sander មានប្រសាសន៍ថា តម្លៃប្រេងឥន្ធន:ខ្ពស់ ក៏បណ្ដាលផងដែរ មកពី សេចក្ដីត្រូវការកើនឡើង មកពីក្រុមប្រទេសមានឧស្សាហកម្មថ្មី ដូចជាប្រទេសឥណ្ឌា និងប្រទេសចិន។ ប្រេងឥន្ធន:ឡើងថ្លៃចំពេលដែល ផលិតផលកសិកម្មប្រើប្រាស់ឡើងថ្លៃដែរ ទោះបីការកើនឡើងនៃ ផលិតផលទាំងនោះ ជំរុញសេដ្ឋកិច្ចនៅក្នុងប្រទេសដូចជា ប្រទេសថៃ ដោយបង្កើនអត្រាប្រាក់ចំណូលកសិករនិងប្រាក់ម៉ោង ក៏ដោយ។
តម្លៃប្រេងឥន្ធន:ទំនងដូចជានៅតែខ្ពស់ ដោយសារសេចក្ដីត្រូវការកើនឡើងពីប្រទេសជប៉ុន ដែលនៅក្នុងប្រទេសនេះ ការខូចខាតដោយសារការរញ្ជួយផែនដី ហើយនឹងរលកស៊ូណាមី នៅថ្ងៃទី១១ ខែមីនាបណ្ដាលឲ្យមានការបិទអាគារថាមពលនុយគ្លេអ៊ែរមួយ។ តាមធម្មតា សេចក្ដីត្រូវការថាមពលប្រមាណ៣០ភាគរយរបស់ប្រទេសជប៉ុន ត្រូវបានបំពេញដោយថាមពលនុយគ្លេអ៊ែរ។ ផលវិបាកនៃ ការរញ្ជួយផែនដី ទំនងដូចជាបង្ករឲ្យមានសេចក្ដីត្រូវការប្រេងឥន្ធន: ថែមទៀតនៅក្នុងប្រទេសជប៉ុន នៅក្នុងរយ:ពេលមធ្យម។
អ្នកសេដ្ឋសាស្ដ្រ លោក Sander មានប្រសាសន៍ថា ការឡើងថ្លៃប្រេងឥន្ធន:ថែមទៀត អាចចោទជាការប្រថុយគ្រោះថ្នាក់ជាក់ស្ដែង ចំពោះសេដ្ឋកិច្ចសកលលោក និងចំពោះសេដ្ឋកិច្ចនៃប្រទេសថៃ។ ប្រទេសអឺរ៉ុប ដែលកំពុងតែងើបឡើងវិញ ពីវិបត្ដិប្រាក់បំណុលធំធេង អាចបាត់បង់ទំនុកទុកចិត្ដ បើពួកគេមានការលំបាកក្នុងការសម្រួលសេដ្ឋកិច្ចជាថ្មីម្ដងទៀតនោះ៕
ប្រែសម្រួលដោយ កងស៊ីវន
