អង្គការសុខភាពពិភពលោក និងក្រុមជំនួយការអង្កេតរបស់ខ្លួន ភ្នាក់ងារអន្តរជាតិសម្រាប់សិក្សាអំពីជំងឺមហារីក ឬ IARC បញ្ជាក់កាលពីថ្ងៃទី ៣១ ខែឧសភា ឆ្នាំ២០១១ នេះថា ការសិក្សាជាច្រើនក្នុងប៉ុន្មានទស្សវត្សរ៍មកនេះ បង្ហាញថា មានទំនាក់ទំនងរវាងការប្រើប្រាស់ទូរសព្ទដៃ និងគ្រោះថ្នាក់ដល់ខួរក្បាល។ លោក វេជ្ជបណ្ឌិត ដ្យូណាហាន សាម៉េត (Jonahan Samet) ជាប្រធានក្រុមការងារ IARC ដែលមានសមាជិកជាអ្នកវិទ្យាសាស្រ្តអន្តរជាតិចំនួន៣១រូប មកពី១៤ប្រទេសផ្សេងគ្នា បានធ្វើសេចក្តីប្រកាសនេះនៅក្នុងការបូកសរុបកិច្ចប្រជុំក្រុមការងារអស់រយៈមួយសប្តាហ៍នៅទីក្រុងលីយ៉ុង (Lyon) ប្រទេសបារាំង។ លោកមានប្រសាសន៍ថា៖
«ក្រុមការងារនេះ ចាត់ទុកកន្លែងវិទ្យុ និងអេឡិកត្រូម៉ាញេទិក ថា អាចបង្កឲ្យមានជំងឺមហារីកដល់មនុស្ស។ ផ្នែកនេះគឺស្ថិតក្នុងចំណាត់ថ្នាក់ដែលត្រូវបានប្រើដោយភ្នាក់ងារអន្តរជាតិសិក្សាអំពីជំងឺមហារីក»។
ក្រុមការងារផ្តល់យោបល់ថា ដោយសារមានមនុស្ស៥.០០០.០០០.០០០នាក់នៅជុំវិញពិភពលោកកំពុងប្រើទូរស័ព្ទដៃ ការសិក្សាស្រាវជ្រាវពីប្រធានបទនេះគឺមានភាពចាំបាច់ណាស់។ របាយការណ៍នេះបង្ហាញពីគ្រោះថ្នាក់ជាខ្លាំងចំពោះអ្នកដែលប្រើទូរសព្ទច្រើន និងអ្នកដែលប៉ះពាល់នឹងប្រភពវិទ្យុសកម្មផ្សេងៗ។ លោកវេជ្ជបណ្ឌិតបន្តថា៖
«យើងក៏ពិចារណាយ៉ាងប្រុងប្រយត្ន័ផងដែរពីប្រភពផ្សេងៗ ដែលមនុស្សជាច្រើនប្រឈមនឹងកន្លែងហ្រ្វេកង់វិទ្យុ និងអេឡិកត្រូម៉ាញេទិក ប្រភពដើមនៃកន្លែងទាំងនេះពីព្រោះតែវាកើតមកពីឧបករណ៍ជាច្រើនដូចជា ទូរសព្ទគ្មានខ្សែ ហើយយើងពិនិត្យមើលយ៉ាងហ្មត់ចត់ទៅលើបាតុភូតរូបវិទ្យាដែលតាមរយៈបាតុភូតនេះ ការប៉ះផ្ទាល់ទៅនឹងកន្លែងទាំងនេះ អាចធ្វើឲ្យរាំងស្ទះប្រព័ន្ធជីវសាស្រ្តនានា និងបង្កឲ្យកើតជាជំងឺមហារីកផ្សេងៗ»។
ក្រុមការងារ IARC បានជួបប្រជុំនៅប្រទេសបារាំងក្នុងរយៈពេលប្រាំបីថ្ងៃ កន្លងមកនេះដែលបានត្រួតពិនិត្យមើលរាល់ការសិក្សាស្រាវជ្រាវមុនៗស្តីពីផលប៉ះពាល់របស់វិទ្យុសកម្ម និងអេឡិកត្រូម៉ាញេទិកមកលើមនុស្ស និងសត្វ ក្នុងពេលមួយទស្សវត្សរ៍កន្លងមកនេះ។
ប្រែសម្រួលដោយ ហ៊ុយ សម្ផស្ស
